މިއީ އިޒްރޭލުން މެދުއިރުމަތީގައި ހިންގަމުން އަންނަ ލޭއޮހޮރުވުންތަކާއި ބިން ވެރިކުރުމުގެ ޖަރީމާތަކާއި ދެކޮޅަށް އަމިއްލަ ނަފުސާއި ޤައުމުގެ ދިފާޢުގައި އިޒްރޭލަށް ގެއްލުމެއް ދޭ ކޮންމެ ބަޔަކަށް ތާއީދު ކުރާކަން ދައްކަންޖެހޭ ވަގުތެއް ކަމަށް ވީނަމަވެސް ދިވެހިންގެ ތެރެއިން މަދު މީހަކު މުސްލިމުންގެ މެދުގައި ފަސާދަ އުފެދޭގޮތަށް އީރާނާއި މެދު ނަފްރަތު އުފެދޭ ބާވަތުގެ ވާހަކަތައް ލިޔެ މީޑިޔާގެ ވަސީލަތްތައް މެދުވެރިކޮށް ދޫކުރަމުން ގެންދިޔުމަކީ، މިއަދު އިސްލާމީ އުއްމަތު އޮތް ހާލަތަށްބަލާއިރު ދުންއަރާތަނަކަށް ދަރުއުކުން ފަދަ ކަމަކަށް ނޫނީ ނުވާނެއެވެ.

ދީނުގައި ނެތްކަމެއް އޮތްކަމެއްކަމަށް ދެކިގެން ކޮށްފި ކޮންމެކަމެއް ރައްދުވަނީ އެކަމެއް ކުރި މީހަކަށެވެ. އެކަމެއް ދީނަކަށް ރައްދެއް ނުކުރެވޭނެއެވެ. އެހެން ކަމުން ﷲ ގެ އެއްކައުވަންތަކަން ޤަބޫލުކޮށް ރަސޫލާ محمد صلّى اللَّه عليه وسلّم އެއީ ﷲ ގެ ރަސޫލާ ކަމަށް ޤަބޫލު ކުރާ ބައެއް މީހުންގެ ފަރާތުން ޝިރުކުގެ ޢަމަލުގެ ތެރޭގައި ހިމެނޭ ކަންކަމާއި ބިދުޢަތަކާއި ޚުރާފާތްކަމުގައި ހިމެނޭ ޢަމަލުތައް ރަނގަޅު ކުރުވަން ބޭނުން ނަމަ އެކަން ކުރަން ޖެހޭނީ ﷲ ގެ މަތިވެރި ވަޙީ ބަސްފުޅު ގައި އަމުރު ކުރައްވާފައިވާ ގޮތަށެވެ.

ﷲގެ މަގަށް ދަޢުވަތު ދިނުމަށް އިސްލާމް ދީނުގައި އޮތް ޢިލްމީ ހަމަތަކާއި މަންހަޖުގެ ތެރެއިންނެވެ. އެއީ ޙިކުމަތާއި ރިވެތިގޮތުގައެވެ. އިޙްތިރާމާއި އަޑުއެހުމާއެކުގައެވެ. ތިމާ އާއި އަނެކާ ގެ ވިސްނުމުގެ ތަފާތުކަން އެނގި ހުރެ ތަފާތުކަން އަދި ޚިލާފުހުރި ކަންކަން ހައްލު ކުރާނެ ހުނަރާއެކުގައެވެ. އެކަލާން ވަޙީ ބަސްފުޅު ގައި ވަނީ ، ٱدْعُ إِلَىٰ سَبِيلِ رَبِّكَ بِٱلْحِكْمَةِ وَٱلْمَوْعِظَةِ ٱلْحَسَنَةِ ۖ وَجَـٰدِلْهُم بِٱلَّتِى هِىَ أَحْسَنُ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِۦ ۖ وَهُوَ أَعْلَمُ بِٱلْمُهْتَدِينَ﴿١٢٥﴾
ރަސޫލާ ﷺ އެވެ! ހަރުކަށިކަމެއް ނެތި މަޑުމައިތިރިކަމާ އެކު ޙިކްމަތްތެރި ގޮތުގައި މާތް ﷲގެ ދީނަށާއި އެކަލާނގެ ޤުދްސިއްޔަ ޝަރީޢަތަށް ގޮވައިލައްވާށެވެ. އަދި ދެކޮޅުވެރިންނާއި އެންމެ ރިވެތި ގޮތުގައި (މުނާޒަރާގެ ގޮތުގައި) ދަލީލާއި ޙުއްޖަތާއެކު ޖަދަލުކުރައްވާށެވެ. މަގުފުރެދިފައިވާ މީހުންގެ ޙާލާއި، ތެދުމަގު ލިބިފައިވާ މީހުންގެ ޙާލު މާތް ﷲ މޮޅަށް ދެނެވޮޑިގެން ވެއެވެ. އަދި ކޮންމެ ބަޔަކަށް އެބަޔަކަށް ލިބެންވާ ޖަޒާ ދެއްވާނެއެވެ.
[النحل: 125]

މިއާޔަތަށް ބެލުމުން އެނގެނީ ދީނަށް ގޮވާލުމުގައި ޝީޢީންކާފަރު ސުންނީން މުސްލިމު ކިޔުމެއް ނެތްކަމެވެ. ދީނުގައި ނެތްކަމެއް އެއީ އޮތްކަމެއް ކަމަށް ދައްކާނަމަ ނުވަތަ ނެތްކަމެއް އޮތްކަމެއްކަމުގައި ދެކިގެން ކުރާނަމަ ދީނުގައި އޮތް ގޮތް ހުއްޖަތާއި ދަލީލާއެކު ބުނެދޭށެވެ. ވަކި ފިރުޤައަކަށް ވަކި ޘަޤާފަތަކަށް ވަކި މީހަކަށް ވަކި ބަޔަކަށް ވަކި ޤައުމަކަށް ޓާގެޓު ނުކުރާށެވެ. އޭރުން ވަނީ ފަސާދައެވެ. އެއީ ފިތުނައެވެ.

އެހެންކަމުން ފުރަތަމަ ބޮޑު ހަނގުރާމަ ބުނުމާއެކު ޢަރަބި ކަރާގެ ޤަބީލާތަކުގެ ވެރިން އިނގިރޭސިވިލާތުން ޖެހި މަޅީގައި ޖެހެން މެދުވެރިކުރުވި ކަންތައްތަކަށް ފަހު އިނގިރޭސިންގެ މަކުރުވެރި ރޭވުމާއި ނުފޫޛުގެ ދަށުން ހިޖާޒުކަރައިގެ ބިންތައް ބަހާލައި ޔަހޫދީންނަށް “ އިޒްރޭލުކިޔުނު ޞަހުޔޫނީ ދައުލަތެއް އުފަން ކުރުވި ފަހުން ޔަހޫންދީން މެދުއިރުމަތީގައި ހިންގާ ލޭއޮހޮރުވުން ތަކާއި ބިންތައް ފޭރުމުގެ ޖަރީމާތައް އެތައް ޒަމާނަކަށް ދެމިގެން ދިޔުމާއެކު އީރާނުން އަމިއްލަ ނަފްސުގެ ދިފާއުގައި އިޒްރޭލަށް ވަރުގަދަ ހަމަލާތަކެއް ދެމުން އަންނަ ވަގުތެއްގައި ސީދާ އީރާނަށް ޓާގެޓްކޮށް ބައެއް ދިވެހިން މީޑިޔާގެ ވަސީލަތްތަކުގައި ބަދުބަސް ރައްދުކޮށް ޒާތީ ވިސްނުމުގައި ފިތުނައަށް މަގުފަހިވާގޮތަށް ޙިކުމަތްތެރިކަން ކުރިއަށް ނުނެރެ ބުއްދި އާއި މަޞްލަޙަތު އިސްކުރުމެއް ނެތި ލިޔާ ލިޔުންތަކުން އިތުރަށް މުސްލިމުންގެ ތެރޭގައި ބައިބައިވުން އުފެދުން ނޫން ނަތީޖާއެއް ނުނިކުންނާނެއެވެ.