ބ. ހިތާދޫއަށް ފޯރުކޮށްދިން ޕެޓްރޯލްގައި މައްސަލަޖެހި އުޅަނދުފަހަރަށް ބޮޑެތި ގެއްލުންތަކެއް ވަމުންދާ ކަމަށް ބުނެ ޝަކުވާތައް އަންނަނީ އިތުރުވަމުންނެވެ.
ފިއުލް ސަޕްލައި މޯލްޑިވްސް (އެފްއެސްއެމް) އިން ބ. އަތޮޅުގެ ބައެއް ރަށްތަކަށް ފޯރުކޮށްދީފައިވާ ޕެޓްރޯލްގެ ފެންވަރު ދަށްވެ، އޭގައި އިތުރު ކެމިކަލްތަކެއް ހުރިކަމަށް ބެލެވިގެން ގިނަ އަދަދެއްގެ އުޅަނދުފަހަރަށް ބޮޑެތި ގެއްލުންތަކެއް ލިބެމުންދާ ކަމަށްބުނެ ޕެޓްރޯ ވިއްކާފަރާތަކާއި ގަންނަފަރާތްތަކާއި ދެމެދު މައްސަލަތައް އިތުރުވެ ޒުވާބު އުފެދޭގޮތްވަނީ ވެފައެވެ.
ގަނެ ބޭނުންކުރާ ފަރާތްތަކުން ބުނެ ޝަކުވާ ކުރަމުން އަންނަނީ ވިއްކާ ޕެޓްރޯ ގަޑުބަޑު ވެފައިވާ ކަމަށެވެ. ނުވަތަ ޕެޓްރޯލްގެ ކޮލިޓީ ވަރަށް ދަށްކަމުގެ ޝަކުވާއެވެ. މި މައްސަލައިގައި އެންމެ ބޮޑު ޝަކުވާއެއް އުފުލަމުންދަނީ ބ. ހިތާދޫގެ ރައްޔިތުންނާއި އެ ރަށުގައި ތެޔޮ ވިއްކާ ފަރާތްތަކުންނެވެ.
މިކަމާ ގުޅިގެން ހިތާދޫގައި އެފްއެސްއެމްގެ ޕެޓްރޯލް ވިއްކާ ފަރާތުން މަޢުލޫމާތު ދިންގޮތުގައި، މި ފަހުން އެ ރަށަށް ގެނައި ޕެޓްރޯލް ބޭނުންކުރަން ފެށި ފަހުން ރަށުގެ ގިނަ ސައިކަލްތަކެއް ދުއްވަނިކޮށް ހުއްޓުމާއި، އިންޖީނަށް މައްސަލަ ދިމާވުމުގެ ޝަކުވާ އާންމުންގެ ފަރާތުން އަންނަނީ އިތުރުވަމުންނެވެ. އަދި ހަމައެއާއެކު، ކަނޑު އުޅަނދުފަހަރު ނުވަތަ ލޯންޗްތަކުގެ އިންޖީނުތަކުގެ އަޑީތެޔޮ އާދަޔާ ހިލާފަށް އިތުރުވެ، އިންޖީނުގެ މަސައްކަތަށް ބުރޫއަރަމުންދާކަން ވަނީ ފާހަގަކުރެވިފައެވެ.
މި މައްސަލަ ދިރާސާކުރި މެކޭނިކުންނާއި ތަޖުރިބާކާރުން ބުނާ ގޮތުގައި، ޕެޓްރޯލްގައި ހިމެނިފައިވާ ނޭނގޭ ކެމިކަލްއެއްގެ ސަބަބުން އިންޖީނުގެ އެތެރޭގެ ބައިތަކަށް ގެއްލުންވެ، ތެޔޮ އެންދުމުގެ ނިޒާމަށް ބޮޑެތި ބަދަލުތަކެއް އަންނަނީއެވެ. މީގެ ސަބަބުން އިންޖީނުގެ ފިސްޓަންތަކާއި ވޭލްތަކަށް ދާއިމީ ގެއްލުން ލިބުމުގެ ބިރު އޮތްކަމަށާއި މިއީ އުޅަނދު ދުއްވާ ފަރާތްތަކަށް މާލީ ގޮތުން ބޮޑު ގެއްލުން ވެގެންދާނެ ކަމެއް ކަމަށެވެ.
ހިތާދޫގައި އެފްއެސްއެމްގެ ޕެޓްރޯލް ވިއްކާ އެޖެންޓް ބުނި ގޮތުގައި، މި މައްސަލަ ފާހަގަކުރެވުނު ހިސާބުން ފެށިގެން ތަކުރާރުކޮށް އެފްއެސްއެމްގެ މައި އޮފީހަށް މިކަމުގެ ޝަކުވާ ވަނީ ކުރަން ފަށައިފައެވެ. ނަމަވެސް، އެ ކުންފުނިން މިހާތަނަށް މިކަމުގެ އެއްވެސް ޒިންމާއެއް އުފުލާފައި ނުވާކަމަށާއި، އަދި މިކަން ހައްލުކުރުމަށް އެއްވެސް އެއްބާރުލުމެއް ލިބިފައި ނުވާކަން އޭނާ ކިޔައިދިނެވެ.
މި މައްސަލަ ހަމައެކަނި ހިތާދޫއަށް ހުއްޓިފައެއް ނުވެއެވެ. އިތުބާރު ހުރި މަސްދަރަކުން ލިބުނު މަޢުލޫމާތަށް ބަލާއިރު، ބ. އަތޮޅުގައި އޮންނަ މަޝްހޫރު ރިސޯޓެއް ކަމަށްވާ ”ސީސައިޑް ފިނޮޅު“ އަށް އެފްއެސްއެމް އިން އެންމެ ފަހުން ފޮނުވި ދެ ލޯޑްގެ ޕެޓްރޯލްގައިވެސް މި މައްސަލަ ވަނީ ޖެހިފައެވެ. އެ ރިސޯޓުގެ އުޅަނދުފަހަރަށްވެސް މިކަމުގެ ސަބަބުން ބޮޑެތި ގެއްލުންތަކެއް ވެފައިވާކަމަށް ބުނެއެވެ. މިއީ މުޅި އަތޮޅުގެ ދަތުރުފަތުރާއި އިޤްތިޞާދަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި ގިނަ ބަޔަކު ސިފަކުރަން ފަށައިފައިވާ ކަމެކެވެ.
ރާއްޖޭގެ އެންމެ ބޮޑު ތެޔޮ ފޯރުކޮށްދޭ ކުންފުނީގެ ފަރާތުން ފޯރުކޮށްދޭ ތެލުގެ ފެންވަރު މިހާ ދަށަށް ގޮސް، އާންމުންގެ މުދަލަށް ގެއްލުންވަމުންދާއިރު، ކަމާބެހޭ އިދާރާތަކުން މިކަން ސީރިއަސް މައްސަލައެއްގެ ގޮތުގައި ބަލައި، ގެއްލުންވާ ފަރާތްތަކަށް ބަދަލު ހޯދައިދޭންޖެހެއެވެެ. އެފްއެސްއެމް ފަދަ ދައުލަތް ހިއްސާވާ ސަރުކާރުން ހިންގާ ކުންފުންޏަކުން މިފަދަ ކަންކަމުގައި މިގޮތަށް އިހުމާލުވުމަކީ ބަލައިގަނެވޭނެ ކަމެއް ނޫން ކަމަށްވެސް އެ ރަށުގައި އެފް.އެސް.އެމްގެ ޕެޓްރޯލް ވިއްކާފަރާތުން ވަނީ ބުނެއެވެ. އެމީހުން ބުނީ ހުރިހާ އެއްޗެއްގޮވާ އަޑުލަނީ ތިމަންމެނާ ދިމާލަށް ކަމަށެވެ.
މި މައްސަލާގައި އެފްއެސްއެމްގެ ބަހެއް ހޯދަން ގުޅައިގެން ފޯނަށް ޖަވާބެއް ލިބިފައެއް ނުވެއެވެ.
