ބޭހާއި ނުކުޅޭތިބަޑި ނޭންގި ހުއްޓާއަދައިދާނޭ ގޮއިމަކޮޔާ ފިހިދާނޭ… މިއީ ދިވެހިންގެ ތެރޭގައި މިހާރުވެސް އާންމުކޮށް ބޭނުންކުރެވޭ ބަސްކޮޅެކެވެ. އަޅުގަނޑުމެން ދެކޭގޮތުގައި މި ބަސްކޮޅުގެ މުރާދަކީ ކަމެއް އޮތްގޮތް ރަނގަޅަށް އެނގިގެންނޫނީ އެކަމެއްގެ ތެރެއަށް ފުންމާލުމުގެ ނުރައްކާތެރިކަން ބަޔާން ކޮށްދިނުމެވެ.                                       

ދިވެހިރާއްޖެއަށް ޑިމޮކްރެސީގެ ވެރިކަން ތަޢާރުފް ކޮށްދިނީ ރައްޔިތުން އެނިޒާމަކަށް ހޭލުންތެރި ކުރުވާފައެއް ނޫނެވެ. އެސިސްޓަމް ހިންގުމަށް ބުނަނީ ކޯއްޗެއްކަމެއް ކިހިނެއްކަމެއްވެސް އޭރު އެނގޭ މީހުން ވަރަށް މަދެވެ. ޑިމޮކްރެސީއޭ މި ކިޔާ ވެރިކަމަކީ ވަކި ގައުމަކުން ބޭނުންވާގޮތް ނުވަތަ ގައުމެއްގައި ހިމެނޭ ވަކި ބަޔަކު ބޭނުންވާގޮތަކަށް ގައުމުގެ ކަންތައްތައް އިންތިޒާމްކޮށް ހިންގުން ބައްޓަންކުރުންކަން މިހާރު އެގިއްޖެއެވެ. ޑިމޮކްރެސީއަކީ ރައްޔިތުންނަށްޓަކައި ރައްޔިތުން އެކަށައަޅާ ވެރިކަމެކޭ ބުނާ ބުނުމަކީ ބޮޑުވެގެންވާ އޮޅުވާލުމެކެވެ.

އެހެން ގައުމެއްގެ ވާހަކަ އަޅުގަނޑުމެން ދެން ދައްކާކަށް ބޭނުމެއް ނޫނެވެ. މިގައުމަށް ޑިމޮކްރެސީ ގެނައުމަށްފަހު ފާއިތުވެގެންމިދާ ދުވަސްތަކުގައި ރައްޔިތުންގެ އާންމު ހާލަތަށް އައި ހެޔޮ ބަދަލެއް ފާހަގައެއް ނުކުރެވެއެވެ. ގައުމު ދަރަނިވެރި ކޮށްލައިފި ކަމީ ދެބަސްވެވެން ނެތް ޙަގީގަތެކެވެ. ނަން ޑިމޮކްރެސީގެ ވެރިކަމަކުން ކޭބަޔަކު ކައި ދައުލަތް ހުސްކޮށްފިއެވެ. ބަޔަކުމީހުން މުއްސަނދިވެ ފައިސާވެރިންނަށް ވެފައި ޔަގީނުންވެސް އެބަތިއްބެވެ. ހަމަގައިމުވެސް ގައުމުގެ ދަރަނި އަރައިގޮއްސާ މިވަނީ އާސްމާނަށެވެ. އަދި މިބުނެވުނު ޑިމޮކްރެސީ ގެ ވެރިކަން އައުމަށްފަހު އޭގެކުރިން ގައުމުގައި އަޑުނީވޭ ކުށްތަކާއި ވައްކަމާއި ފޭރުންތައް ގިނަކަން ފާހަގަކުރެވެއެވެ. މަގުމަތީގެ އަމާންކަންވެސް ވަނީ ގެއްލިފައެވެ.                                                      

ދިވެހިރާއްޖެއަށް ޑިމޮކްރެސީ ގެނައުމުގައި ބޭރުގެ އެއްވެސް ނުފޫޒެއް ނެތްކަމަށާއި އެއީ ރައްޔިތުން ހިތާ ފުރާނައިން އެދިގެން ގެނުވި ބަދަލެއްކަމަށް އެކަމުގައި އުޅުނު ބަޔަކު މިހާރުވެސް ދައުވާ ކުރެއެވެ. އެކަމަކު ހަގީގަތަކީ ދިވެހި ރާއްޖެއަށްވެސް ޑިމޮކްރެސީ ގެނައުމަށްޓަކައި ބޭރުގެ ޖަމާއަތްތަކުން ގެންދިޔައީ އިންވެސްޓްކޮށް އިގްތިސާދީ ފިއްތުންތައްވެސް ކުރިމަތިކުރަމުންނެވެ. ރާއްޖޭގެ ފަތުރުވެރިކަން ނެތިކޮށްލަން ކުރަމުންދިޔަ އިޝްތިހާރުތަކާއި ކެމްޕޭންތަކުގައި ކުލަ ޖެހިގެން ދިޔަމިންވަރު އަދި ހަނދާނެއް ނުނެތެއެވެ.                                    

ދުނިޔޭގެ ގިނަ ގައުމުތަކަށް ގެނެސްފައިވަނީ ހުޅަނގުގެ އެބުނާ އެންމެން ހަމަހަމަ އެންމެނަށްވެސް ގައުމުގެ މުއްސަދިކަން ލިބޭނެ އެންމެނަށް ޢަމަންއަމާން ލިބިދެން ޢަދުލުއިންސާފުގެ ލާމަސީލު  ޑިމޮކްރެސީއެއް ނޫނެވެ. އެހެނީ ހުޅަނގުގެ ގައުމުތަކުގައިވެސް ޑިމޮކްރެސީ އޮތީ ތަފާތު ގޮތަގޮތަށް ބައްޓަންކޮށްފައެވެ. ދިވެހިރާއްޖޭގައިވެސް މުޅިއުމުރަށް ވަކިމީހަކު ވެރިކަން ކުރެވޭގޮތަށް އޮތް އޮތުން ނިމުމަކަށްގެނެސް ދިވެހި ވަންތަ ”ޑިމޮކްރެސީއެއް“ ތަޢާރުފް ކުރެވިދާނެއެވެ. އެމެރިކާގެ ގާނޫނު އަސާސީ ކޮޕީކޮށްގެން އެމެރިކާގެ ޑިމޮކްރެސީ ގެންނާކަށް ނުޖެހެއެވެ. އެހެނީ އެއީވެސް ޢމަލުކުރެވޭ އެއްކަށްވެސް ނުވާތީއެވެ!                                        

އެމެރިކާއާއި ހުޅަނގުގެ ޑިމޮކްރެސީ ތައާރުފް ކުރުމުގެ އަސާސްތަކުގެ ތެރޭގައި ހިމެނޭހަގީގަތްތަކެއް އެކަމަކު ތާރީޚް ކްލާސްތަކުގައި ކިޔަވާދޭން ބޭނުންނުވާތީ އޮންނަނީ ސިއްރުކޮށްފައޭބ ުނެވިދާނެއެވެ. ބައެއް ގައުމުތަކަށް ޑިމޮކްރެސީ މަޖްބޫރުކުރުވައި ކަރުމަޅި ޖެއްސިގޮތުގެ ޚުލާސާއެއް ކިއުންތެރިންނާ ހަމަޔަށް ގެނެސްދޭން ބޭނުމެވެ.                                         

ކޮންގޯއަށް ލިބިފައިވާ ޔޫރޭނިއަމްގެ މުއްސަނިދިކަމަކީ ގައުމުގެ މިލްކިއްޔާތެއްކަމުގައި ހައްދަވަން 1961 ވަނައަހަރު ކޮންގޯގެ ބޮޑުވަޒީރު  ޕެޓްރިސް ލުމުމްބާ ބޭނުންފުޅުވިއެވެ. ޔަހޫދީ އެމެރިކާގެ ސީ އައި އޭގެ ޑީކްލަސިފިކޭޝަން ލިއެކިއުންތަކުގައި ބުނެފައިވާގޮތުން އެމެރިކާ ރައީސް އައިޒަން ހާވަރއަށް ބޮޑުވަޒީރު ލުމުމްބާގެ އެ ފައިސަލާއާމެދު  އެއްބަސްނުވެވިގެން ބޮޑުވަޒީރު ލުމުމްބާ އަވަހާރަ ކޮށްލަން އެންގެވިއެވެ. އެ  އަމުރަށް ލުމުމްބާ މަރާލެވުނެވެ. އަދި އެއަށްފަހު އެމަނިކުފާނުގެ ހަށިކޮޅު އަލިފާން އާވީގެ ތެރެއަށް ގިރުވާލެވުނީއެވެ. ދެން ސީ އައި އޭ އިން ޖޯސެފް މަބޫޓޫ އަށް ކޮންގޯގެ ބޮޑުވަޒީރުކަން ހަވާލުކުރިއެވެ. 34 އަހަރުވަންދެން ގޮށްމުށުގެ ބާރުގައި އެމެރިކާއިން ބޭނުންވިގޮތަށް އޭނާ ވެރިކަން ކޮށްދިނެވެ.                                            

ޗިލީގެ ކޮޕަރ މައިންތައް 1973 ވަނައަހަރު ގައުމުގެ ބާރުގެ ދަށަށް ގެނައުމަށް އެ ގައުމުގެ ރައީސް ސަލްވެޑޯރ އެލެންޑޭ ނިންމެވިއެވެ. އެމެރިކާގެ ޚާރިޖިއްޔާގެ ތާރީޚީ ލިއެކިއުންތަކުން ދައްކާގޮތުގައި އެލަންޑޭގެ މިނިންމުމާގުޅިގެން އެ ގައުމުގައި ދާޚިލީ ހަމަނުޖެހުމެއް ހިންގުމަށް ސީ އައި އޭ އިން 8 މިލިއަން ޑޮލަރ ހޭދަކޮށްފައިވެއެވެ. އެންމެފަހުން  އެ ގައުމު ސިފައިންގެ ބާރުގެ ދަށަށް ގެނެވި ޖެނެރަލް ޕިނޮޝޭ ވެރިކަމަށް ގެނެވުނެވެ. ސިފައިން ގެނައި މި ބަޣާވަތުގައި ވެރިކަން ދިފާއު ކުރުމުގެ ތެރޭގައި އަލަންޑޭ މަރާލެވުނީއެވެ.  ޖެނެރަލް ޕިނޯޝޭގެ ވެރިކަމުގައި އެމެރިކާގެ ބައިވެރިވުމާއެކު ޗިލީގެ ސާޅީސް ހާހަށްވުރެން ގިނަ ރައްޔިތުން ތަފާތު ބޮޑެތި އަނިޔާތަކާ ކުރިމަތިލާންޖެހުނެވެ.                                                 

އިރާނުގެ ތެލަކީ އެ ގައުމުގެ މިލްކެއް ކަމުގައި 1953 ވަނަ އަހަރު ބޮޑުވަޒީރު މުޙަންމަދު މުސައްދިގް ކަނޑައެޅުއްވިއެވެ. އެމަނިކުފާނުގެ ވެރިކަން ނިންމާލުމަށްޓަކައި ސީ އައި އޭ އިން އޮޕަރޭޝަން އެޖެކްސް ގެ ނަމުގައި ގައުމު ހަލަބޮލި ކޮށްލިއެވެ. އެމެރިކާގެ ނޭޝަނަލް ސެކިއުރިޓީ އާއިބެހޭ ޑިކްލާސިފައިޑް ލިއެކިއުންތަކުން އެނގޭގޮތުގައި މި ހަރަކާތުގައި އެމަނިކުފާނުގެ ވެރިކަން ވައްޓާލުމަށްފަހު އެމެރިކާއިން މުހައްމަދު ރިޒާޕަހެލަވީގެ ޚުދުމުޚްތާރު ވެރިކަން ތައާރުފް ކުރިއެވެ. މުޙައްމަދު މުސައްދިގް އަވަހާރަވަންދެންވެސް ހުންނެވީ ޖަލުން ނެރުމަށްފަހު ގޭބަންދުގައެވެ.     

ގުއާޓަމާލާގެ ރައީސް ޖެކޯބޯ އާރބެންޒް 1954 ވަނައަހަރު  ތަޢާރުފްކުރެއްވި އެ ގައުމުގެ ބިންބޭނުންކުރުމުގެ ގާނޫނުގެ ސަބަބުން އެ ގައުމުގައި މޭވާހެއްދުމުގެ މަސައްކަތުގައި ކުރި އަރަމުންދިޔަ އެމެރިކާގެ ކުންފުނިތަކުން ހޯދަމުންގެންދިޔަ ފައިދާއަށް ގޮންޖެހުމާ ކުރިމަތިލާން ޖެހުނެވެ. ސީ އައި އޭ ގެ ލިއެކިއުންތަކުން އެނގޭގޮތުގައި އެމަނިކުފާނުގެ ވެރިކަން ވައްޓާލުމަށް ހިންގުނު އޮޕަރޭޝަން ޕީ ބީ ސަކްސެސްގައި އެމަނިކުފާނު ވެރިކަމުން ދުރުކުރެވުނެވެ. އެއަށްފަހު އެމެރިކާއިން ބޭނުވާގޮތަށް މިލިޓްރީ ގޮށްމުށުގެ ސަރުކާރެއް އެގައުމުގައިވެސް އުފަންކުރުވީއެވެ. މި ހަރަކާތާއި ގުޅިގެން ގައުމަށް މެދުވެރިވި ދާޚިލީ ކޯޅުންގަނޑުގެ ތެރޭގައި  ދެލައްކައަށްވުރެން ގިނަ ރައްޔިތުން މަރާލެވުނެވެ.                                          

އެމެރިކާގެ އަމުރަށް ކިޔަމަން ވުމަށް 1963 ވަނައަހަރު ވިއެޓްނާމްގެ ރައީސް ގޯ ޑިން ޑިއެމް އިންކާރުކުރެއްވުމުން ސީ އައި އޭ އިން އިންތިޒާމް ކުރި ބަޣާވަތެއްގައި އެ މަނިކުފާނާއި އެމަނިކުފާނުގެ ކޮއްކޮ މަރާލެވުނެވެ. އެއަށްފަހު އެމެރިކާއިން ފަސްލައްކަ ސިފައިން އެކުލެވޭ ލަޝްކަރެއް ވިއެޓްނާމަށް ފޮނުވިއެވެ. ނަތީޖާއަކަށްވެގެން ދިޔައީ އެތައްމިލިއަން މީހުން މަރުވެގެން ދިއުމެވެ.                                                       

އެމެރިކާ ޑޮލަރަށް ބަރޯސާވުން ކުޑަކުރުމަށްޓަކައި ރަނުގެ މައްޗަށް ބިނާކޮށް އެފްރިކާގެ ފައިސާއެއް އުފައްދަން 2011 ވަނައަހަރު ލީބިޔާގެ ލީޑަރ މުއަންމަރު ގައްޒާފީ ބޭނުންފުޅު ވިއެވެ. ދެން ފެނިގެންދިޔައީ އެމެރިކާގެ އިސްނެގުމާއެކު ނޭޓޯއިން ލީބިޔާއަށް ބޮން އަޅައި ސުންނާފަތި ކޮށްލި ތަނެވެ. އަދި މަގުމަތީ ކުއްތާއެއް މަރާލުމާއެއްފަދައިން ގައްޒާފީ ޝަހީދުކޮށްލިއެވެ. ލީބިޔާއަކީ އެފްރިކާ ބައްރުގައި އޮތް އެންމެ މުއްސަނދި ގައުމުގެ ޝަރަފްވެރި މަގާމުގައި އޮތުމާއެކު ދުނިޔޭގެ އެއްވެސް ގައުމަކަށް ނުވަތަ މުއައްސަސާއަކަށް ދަރާފައިނެތް ގައުމުތަކުގެ ތެރޭގައި ވަނީ ހިމެނިފައެވެ. ލީބިޔާއަށް ގެނެސްދިން ޑިމޮކްރެސީގައި މިއަދުވެސް އެ ގައުމު އެދަނީ ބަޑަށްޖެހި ވީދި ކުދިކުދި ވަމުންނެވެ.                                                  

2003 ވަނައަހަރު އެމެރިކާއިން އިރާގަށް އަރައިގަތީ އެގައުމުގައި ގިނައަދަދަކަށް ފަނާކުރަނިވި ހަތިޔާރު ހުރި ކަމުގެ ބަހަނާގައެވެ. ހުރިއްޔާ ހުންނާނީ އީރާނާއި ހަގުރާމަކުރުމަށް ކުރީގެ އެމެރިކާގެ މިތުރު ސައްދާމް އަށް އެމެރިކާ އާއި ހުޅަގުން ދީފައިވާ އެއްޗެއްތާއެވެ! އެކަމަކު އިރާގު ފުނޑާލައި އެތަކެއް ލައްކަ މީހުނެއް މަރާފައި އެގައުމުގެ ރަނާއި ތެލާ ފޭރުމަށް ފަހު އެމެރިކާގެ ޖަސޫސީ އިދާރާއިންވެސް އެއްބަސްވެފައިވަނީ އިރާގުގައި އެފަދަ އެއްވެސް ހަތިޔާރެއް ނެތްކަމަށެވެ. އެމެރިކާއިން އިރާގުގައިކުރި ހަނގުރާމައިގާ މިލިއަނަކަށްވުރެންގިނަ ރައްޔިތުން މަރާލެވުނެވެ. އަދި އެ ގައުމުގެ ރައީސް ސައްދާމް ހުސޭންއަށް މަރުގެ އަދަބު ދިނުމަށްފަހު ގެނައި ޑިމޮކްރެސީގައި މިއަދާ ހަމަޔަށްވެސް ގައުމުގެ އަމާންކަން ވަނީ ގެއްލިފައެވެ. ދަރަނިވެރިވެ ނަސްލީ ހަނގުރާމައިން ގައުމު ނެތިކޮށްލެވިފައެވެ.                                          

2006 ވަނައަހަރު ގާނާގެ ރައީސް ކުވާމެ އެންކުރުމާ އައި އެމް އެފް ގައި ހުޅަނގުގެ ބޭންކު ތަކާއި ގުޅުންކަނޑާލުމުގެ ނަތީޖާއަކަށްވީ  ގާނާގައި ސީ އައި އޭ ގެ ބައިވެރިވުމާއެކު މިލިޓްރީން ހިންގި ބަގާވަތުގައި އެމަނިކުފާނު ޗައިނާއަށް ވަޑައިގަތުމުގެ ބަހަނާގައި ދުވަހަކުވެސް ނާދެވޭގޮތަށް ގައުމުން ބޭރަށް އަރުވާލެވުނީ އެވެ.                                      

ކިއުބާއިން 1967 ވަނައަހަރު ދެކުނު އެމެރިކާގެ ގައުމުތަކުންވެސް ސޯޝަލިޒަމްއަށް ތާއީދުކުރަން ޗިއޭ ގްވާރާގެ ގޮވާލަން ފެށުމުން އެމަނިކުފާނު ބޮލީވިއާއަށް ފޮނުވާލީކަން ލިއެކިއުންތަކުން އެނގެއެވެ. އޭގެފަހުން ބޮލީވިއާގައި ހުންނަވަނިކޮށް އެމަނިކުފާނު އަތުލައިގަނެ މަރާލީއެވެ.           

1980 ގެ އަހަރުތަކުގައި ނިކަރަގުއާގައި ސީ އައި އޭ އިން ޚަރަދުކޮށްގެން ސަރުކާރާ އިދިކޮޅު         މީހުންލައްވާ އީރާނުސަރުކާރާ ދެކޮޅަށްވެސް ހަރަކާތްތެރިވުމަށް އަންގައި ނިކަރާގުއާގައި އޭރުއޮތް ލެފްޓް-ވިންގް ސެންޑިނިސްތާގެ ސަރުކާރާ ދެކޮޅަށް ހަނގުރާމަ ކުރުވިއެވެ. މި ދެކޮޅުވެރިކަމުގައި ނިކަރަގުއާގެ ތިރީސްހާސް މީހުންގެ ފުރާނަ ގެއްލިގެން ދިޔައެވެ.                     

1983 ވަނައަހަރު ގްރެނާޑާގައި ބޮޑުވަޒީރު މޮރިސް ބިޝޮޕް ކިއުބާއާއި އެއްބައިވަންތަކަން ގާއިމްކުރުމުން އެމެރިކާއިން 7000 ސިފައިންގެ ލަޝްކަރަކާއެކު ގްރެނެޑާއަށް އަރާގަތްކަން އެމެރިކާގެ މިލިޓްރީ ރެކޯރޑްތަކުގައި ފާހަގަކޮށްފައި ވެއެވެ. އަދި އެ ލަޝްކަރު ފޮނުވުމުގެކުރިން ބޮޑުވަޒީރު މޮރިސް ބިޝޮޕް މަރާލިއެވެ. އެއަށްފަހު ހުޅަނގުގެ ގައުމުތަކަށް ސަނާކިއުމުގައި ދެމި ތިބޭނެ ސަރުކާރެއް ގްރެނަޑާގައި ގާއިމް ކުރުވިއެވެ.                              

1989 ވަނައަހަރު ޕެނަމާގައި ވެރިއަކަށް ހުންނެވި ޖެނެރަލް މެނުއަލް ނޮރިއޭގާ އަކީ އެއްދުވަސްވަރެއްގައި ސީ އައި އޭ ގެ ބައިވެރިއެކެވެ. އެކަމަކު އޭނާގެ ވިސްނުން ބަދަލުވާން ފެށިކަން އެނގުމާއެކު އެމެރިކާ ސިފައިންގެ ލަޝްކަރެއް އެގައުމަށް އަރައިގަތެވެ. އަދި މި އަރައިގަތުމުގައި އެގައުމުގެ ތިންހާސް ރައްޔިތުން މަރާލާފައިވާކަން އިންސާނީ ހައްގުތަކަށް ވަކާލާތު ކުރާ ޖަމްއިއްޔާތަކުގެ ތަހްގީގަށް އެނގި ރެކޯޑްކުރެވިފައި ވެއެވެ.                                 

1980  ގެ އަހަރުތަކުގައި އަފްޣާނިސްތާނަށް އެމެރިކާ ސިފައިން އަރައިގަނެ ސޮވިއެޓުންނާ ދެކޮޅަށް ހަނގުރާމަކުރުމަށްޓަކައި މުޖާހިދީން ތަމްރީނުކޮށް ހަތިޔާރު ދީ ހަދަމުން ގެންދިޔައެވެ. ފަހުން އެ ޖަމާއަތަކީ ތާލިބާނުންކަމުގައި ތަޢާރުފް ވެގެންދިޔައެވެ. އަފްޣާނިސްތާނުގެ ހަނގުރާމަ އެތައް އަހަރަކަށް ދެމިގެންދިޔައެވެ.                                                  

2019 ވަނައަހަރު ވެނެޒޫލާގައި ރައީސް އަކަށް ނިކޯލަސް މުދުރޯ އިންތިޚާބު ކާމިޔާބު ކުރެއްވިކަމުގައިވިޔަސް އެމެރިކާއިން ބަލައިގަތީ ހުއާން ގުއައިޑޯ އަކީ އެ ގައުމުގެ ރައީސްކަމަށެވެ. ނިކޯލަސް މުދުރޯގެ ސަރުކާރަށް އެމެރިކާއިން އިދްތިސާދީ ގޮތުން ދުއްތުރާކުރަން ފަށައިގަތެވެ. އަދި އެއަށްފަހު ސީ އައި އޭ ގެ ބައިވެރިވުމާއެކު އެތައްފަހަރަކު ބަގާވަތުގެ ހަރަކާތްތައް ހިންގާފައި ވެއެވެ.                                                        

1965 ވަނައަހަރު އިންޑޯނޭޝިޔާގައި ކޮމިއުނިސްޓުންގެ ހަރަކާތްތައް އެ ގައުމުގެ މިލިޓްރީންނަށް ސީ އައި އޭ އިން ފޯރުކޮށްދެމުން ގެންދިޔައެވެ. އިންޑޮނޭޝިޔާގައި އުފެއްދި މި ދެކޮޅުވެރިކަމުގައި އަނިޔާވެރިކަން ހައްދުފަހަނަޅައިގޮސް ގައުމުގެ މިލިއަނެއްހާ ރައްޔިތުން މަރާލާފައިވާކަމަށް އެމެރިކާ އެމްބަސީގެ ލިއެކިއުންތަކުން އެނގެއެވެ.                                     

15 ގައުމެއްގެ އެތައް މިލިއަން ރައްޔިތުންގެ ފުރާނެ ގެއްލި ގައުމުގެ އިގްތިސާދު ފާލުންނެއްޓި ގައުމުތަކުގައި ނުހުއްޓި ދެމިގެންދާ ދާޚިލީ ދެކޮޅުވެރިކަމެއް އަސްލަކަށް ވެގެން ގޮސްފައިވަނީ ހުޅަނގުން ބޭނުންވާ ”ޑިމޮކްރެސީ “ ގައުމުތަކުގައި ތަޢާރުފް ކުރުމެވެ. އެމެރިކާއިން ބޭނުންވާގޮތަށް ގައުމުތައް ބައްޓަން ކުރުމުގެ ނަމުގައެވެ.                                  

ބާރުގެ ބޭނުންކޮށްގެން ޑިމޮކްރެސީގެނައި އެއްވެސް ގައުމެއް ކާމިޔާބީއެއް ހޯދި އަމާންކަމެއެ ލބިފައެއް ނެތެވެ. ގިނަ ގައުމުތަކެއްގައި ތަންކޮޅެއް ފަހުންނަމަވެސް ގައުމަށްޓަކައި ޖިހާދުކުރެއްވި ބަތަލަކު ވަޑައިގެން އެފަދަ ބައެއްގައުމުތައް ވަނީ އަލުން ހަމައަކަށް އަޅުވާފައެވެ. އަދި ފިއްތުންތައް އިންތިހާއަށް ކުރިމަތި ކުރަމުންގެންދާއިރު މިނިވަންވެގަތުމުގެ ރޫހް ފަނޑުކޮށެއްވެސް ނުލެވެއެވެ. އެފުރިކާގެ ގައުމުތަކުން މިކަމަށް މިސާލު ލިބިގަނެވޭނެއެވެ. އެމެރިކަގައި އެތަނުގެ ރައީސް ޓުރަމްޕްގެ  އަނިޔާވެރިކަމާއި ދެކޮޅަށް މިލިޔަނަކަށްވުރެވެސް ގިނަ މީހުން ނުކުމެ މުޒާހަރާ އެބަކުރެތެވެ. މައިތިރި ކުރުމަށްޓަކާ ތަޅާ ރޯނާކޮށްލާތަންވެސް މީޑިޔާތަކުން އެބަފެނެއެވެ. އެހެނަސް ބޮޑެތި މީޑިޔާތަކުން ދައްކަނީ 90 މިލިޔަންގެ އާބާދިއެއް އޮތް އިސްލާމިކް ރިޕަބްލިކް އޮފް އީރާނުގެ މަގުތަކުގައި އުޅޭ 30 ހަކަހާސް މީނުންނެވެ. އަދި ކޮންމެހެން އެމީހުންގެ ޙިމާޔަރުގައި އެމެރިކާ އާއި ޑިމޮކްރެސީ ގުރޫޕް ހިތްދަތިވެ ކަންބޮދުވެގެން އުޅޭތަނެވެ. މިބައިގަނޑަކީ ގާޒާގެ ގަތުލުއާންމު ހިންގުމުގައި ބައިވެރިވެ ވާގިދީ ނަސްލެއް ނައްތާލުމަށް ގޮވާ ވާގިވެރިވި ޑިމޮކްރެޓުން ނެވެ. ޢަޖައިބެއް ނުވާަނެހެއްޔެވެ. މިއީ ފަހުމްނުވި ޑިމޮކްރެސީ އެކެވެ.