ދިވެހިރާއްޖެއަށް ނޮވެމްބަރު 3، 1988 ގައި ދިން އުދުވާނީ ހަމަލާއިން ގައުމު ސަލާމަތް ކުރުމުގެ ޖިހާދުކުރަނިކޮށް ޝަހީދުވި ސިފައިންގެ އާއިލާތަކަށް އިނާޔަތް ދޭ އުސޫލު ޑިފެންސް މިނިސްޓްރީން އާންމުކޮށްފި އެވެ.

އެ އުސޫލުގައިވާ ގޮތުން ޝަހީދުވި ސިފައިންގެ އާއިލާތަކުގެ އިތުރުން ނޮވެމްބަރު 3، 1988 ގެ ހަނގުރާމައިގައި ދައްކުވައިދިން އާދަޔާހިލާފު ހިތްވަރު ފާހަގަކޮށް ޝަރަފުގެ ނިޝާން ދެވިފައިވާ މީހުންނަށް ވެސް އިނާޔަތް ދޭނެ އެވެ.
ހަނގުރާމައިގައި ޝަހީދުވި ސިފައިންގެ މީހާގެ އާއިލާ މެންބަރުންގެ ތެރެއިން ދުނިޔޭގައި ތިބި ކޮންމެ މީހަކަށް (މަންމަ، ބައްޕަ، ދަރިން އަދި ހުވަފަތްވި އަނބިމީހާ) ދުނިޔޭގައި ހުރި ދުވަހަކު ކޮންމެ މަހަކު 9،000ރ. ދޭން ޖެހޭނެ ކަމަށް އުސޫލުގައި ބަޔާންކޮށްފައިވެ އެވެ.
އުސޫލުގައި ބުނީ އެ ފަރާތްތަކަށް އެލަވަންސް ދޭނީ އެ މީހުން މަރުވަންދެން ކަމަށެވެ. އަދި އެ މީހުން މަރުވުމުން އާއިލާގެ ފަރާތުން އެކަން ޑިފެންސް މިނިސްޓްރީއަށް އެއް މަސް ތެރޭ އަންގަން ވާނެ ކަމަށް ވެސް އުސޫލުގައި ވަނީ ބުނެފަ އެވެ.
ނޮވެމްބަރު 3، 1988، ގައި ދިން އުދުވާނީ ހަމަލާއިން ގައުމު ސަލާމަތް ކުރުމުގެ މަތިވެރި ޖިހާދުކުރި ސިފައިންގެ ތެރެއިން ޝަހީދު ނުވި ނަމަވެސް އެ ދުވަހު ހަނގުރާމައާ ގުޅިގެން މެޑަލް ލިބުނު ބޭފުޅުންނަށް ވެސް އުމުރުދުވަހަށް ފައިސާ ދޭން ސަރުކާރުން ނިންމައިފި އެވެ. އަދި، ހަނގުރާމައިގައި ދައްކުވައިދިން އާދަޔާހިލާފު ހިތްވަރު ފާހަގަކޮށް ޝަރަފުގެ ނިޝާން ދެވިފައިވާ މީހުންނަށް ވެސް އިނާޔަތް ދޭނެ އެވެ.