މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) މެދުވެރިކޮށް ސަރުކާރުގެ ޓެކްސީ ލައިނެއް ތައާރަފްކުރަން ސަރުކާރުން ނިންމި ނިންމުމާ ގުޅިގެން ގިނަ ބައެއްގެ ފާޑުކިޔުން އަމާޒުވެފައިވާއިރު، އެކަމުގެ ސަބަބުން އަމިއްލަ ޓެކްސީ ވިޔަފާރިތައް ބަނގުރޫޓުވެ، ބޭއިންސާފު މޮނޮޕޮލީއެއް އުފެދޭނެ ކަމުގެ ކަންބޮޑުވުން އިތުރުވެއްޖެއެވެ.

އިލެކްޓްރިކް ވެހިކަލް (އީވީ) ބޭނުންކޮށްގެން ޒަމާނީ، އެޕް ބޭސްޑް ޓްރާންސްޕޯޓް ފޯރުކޮށްދިނުމުގެ މަގްސަދުގައި ކުރިއަށް ގެންދާ މި ހަރަކާތުގެ އަމާޒަކީ، އަމިއްލަ އޮޕަރޭޓަރުންނާ ސީދާ ވާދަކުރުމުގެ ބަދަލުގައި ޓެކްސީގެ ގަވާއިދުތައް ހަރުދަނާކޮށް، ހިދުމަތުގެ ފެންވަރު ރަނގަޅު ކުރުމަށް ސަރުކާރުން ސަމާލުކަން ދޭން ޖެހޭ ކަމަށް ގިނަ ބަޔަކު ދަނީ ބުނަމުންނެވެ.
އިންޑަސްޓްރީގެ ސްޓޭކްހޯލްޑަރުންނާއި ޕްރައިވެޓް ޓެކްސީ އޮޕަރޭޓަރުން ބިރުގަންނަނީ ސަރުކާރުގެ އެހީގައި ހިދުމަތް ދޭން ފެށުމުން އެ މީހުން ވިޔަފާރީގެ މައިދާނުން ބޭރުވެދާނެތީއެވެ. އެމްޓީސީސީއަށް ދައުލަތުގެ އެއްބާރުލުމާއި ވަސީލަތްތައް ލިބުމުން މިނިވަން ޓެކްސީ ޑްރައިވަރުންނަށް ވާދަކުރަން އުނދަގޫވެ، މި ދާއިރާއިން ގިނަ އަދަދެއްގެ ވަޒީފާ ގެއްލޭނެ އެވެ.
ފާޑުކިޔާ ފަރާތްތަކުން ބުނަނީ ހަގީގީ މައްސަލައަކީ މިހާރު އޮތް ނިޒާމުގެ ތެރެއިން އެކަށީގެންވާ ގަވާއިދުތަކާއި ފެއާ ސްޓްރަކްޗާތަކާއި ސާވިސް ކޮލިޓީ އެންފޯސްމަންޓް ނެތުމެވެ. ސަރުކާރުން ހިންގާ ޓެކްސީ ލައިނެއް ތައާރަފް ކުރުމުގެ ބަދަލުގައި ލައިސަންސް ހަރުދަނާ ކުރުމާއި މިހާރު ހުރި ޓެކްސީތަކަށް ޑިޖިޓަލް ބުކިން ސިސްޓަމްތައް ތައާރަފްކުރުމާއި އިންސާފުވެރި އަގު ކަނޑައެޅުމުގެ ނިޒާމުތައް ތަންފީޒުކުރުން ފަދަ އިސްލާހުތައް ސަރުކާރުން ތަންފީޒު ކުރަން ޖެހޭ ކަމަށް އެ ފަރާތްތަކުން ދެކެއެވެ.
”ޕަބްލިކް ޓްރާންސްޕޯޓް ރަނގަޅު ކުރަން ސަރުކާރުން ބޭނުންނަމަ އިންޑަސްޓްރީ ރެގިއުލޭޓް ކުރަން ޖެހޭ، އެ އިންޑަސްޓްރީ އަތުލައިގެން ނުވާނެ. ސަރުކާރުގެ ޓެކްސީ ހިދުމަތަކުން ވާދަވެރިކަން ނައްތާލައި ދިރިއުޅުން ހަލާކުވެގެން ދާނެ،“ އަމިއްލަ ޓެކްސީ އޮޕަރޭޓަރަކު ބުންޏެވެ.
މީގެ އިތުރުން ސަރުކާރުން ހިންގާ ޓެކްސީ ލައިނެއްގެ ފީސިބިލިޓީ އާއި ދެމެހެއްޓެނިވި ކަމާ މެދު ވެސް ވަނީ ކަންބޮޑުވުން ފާޅުކޮށްފަ އެވެ. ދިގު މުއްދަތަކަށް ފަންޑު ކުރާނީ ކިހިނެއްތޯ އާއި އަގުތައް ވާދަވެރިކަމާއެކު ދެމިއޮންނާނެތޯ އާއި މާލީ ތަކުލީފަކާ ކުރިމަތިނުލައި ހަރުދަނާ ގޮތެއްގައި ހިންގޭނެކަމާ މެދު ސުވާލު އުފެދެ އެވެ.
މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓުގައި މިއަހަރު ފުރަތަމަ ފިޔަވަހި ފެށުމަށް ހަމަޖެހިފައިވާއިރު، ކަމާބެހޭ ފަރާތްތަކުން ދަނީ އެފަރާތްތަކުގެ ވިސްނުން އަލުން މުރާޖައާކޮށް ޑްރައިވަރުންނާއި ފަސިންޖަރުންނަށް ވެސް ފައިދާ ކުރާނެ އިންސާފުވެރި އަދި ވާދަވެރި މާކެޓެއް ގާއިމުކުރުމަށް ސަމާލުކަން ދިނުމަށް އިލްތިމާސް ކުރަމުންނެވެ.