އަދީބާއި އެސްއޯއެފްގެ ވެރިންނާއެކު ހަދާފައިވާ އެއްބަސްވުންތައް ބާތިލުކޮށްފި

Loading

January 19, 2025
profile
Facebook
Twitter
WhatsApp

އެމްއެމްޕީއާރްސީގެ ޚިޔާނާތުގެ މައްސަލައާ ގުޅިގެން ތަހުގީގަށް އެއްބާރުލުން ދިނުމަށް ޝަރުތުކޮށް ޕްރޮސެކިއުޓާރ ޖެނެރަލް (ޕީޖީ) ގެ އޮފީހުން ކުރީގެ ނައިބު ރައީސް އަޙްމަދު އަދީބާއި، ޚިޔާނާތުގެ ފައިސާ ދައުރުކުރުމުގައި ހަރަކާތްތެރިވި އެސްއޯއެފް ކުންފުނީގެ ވެރިންނާއެކު ހަދާފައިވާ އެއްބަސްވުންތައް ބާތިލުކޮށްފިއެވެ.

ޕީޖީ އޮފީހުން މިއަދު ބުނީ އަދީބާއި، މ.ލޭންޑް އޮފް ގާޑެން، އަޙްމަދު އިޝްފާހު ޢަލީއާއި، މ.ސެސްނާ، މުޙައްމަދު ޢައްލާމް ލަޠީފާއި، ގ.އޮއިވާލި، މުޙައްމަދު ޙުސައިނާއެކު ހަދާފައިވާ އެއްބަސްވުންތައް މިއަދު ބާތިލުކޮށްފައިވާ ކަމަށެވެ.

އެ މީހުންނާއެކު ދައުލަތުން އެއްބަސްވުން ހެދީ ތަހުގީގަށް އެއްބާރުލުން ދިނުމަށް ޝަރުތުކޮށް ކަމަށްވިޔަސް، އެ މީހުންގެ ފަރާތުން މައްސަލާގެ ތަހުގީގަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ލިބެމުންނުދާ ކަމަށް ތަހުގީގީ އިދާރާތަކުން މައުލޫމާތު ދީފައިވާ ކަމަށް ޕީޖީ އޮފީހުން ވަނީ ބުނެފައެވެ.

އެގޮތުން މި އެއްބަސްވުންތައް ނިމުމަކަށް ގެންނަން ޕީޖީ ޢައްބާސް ޝަރީފް ނިންމެވީ ކަމަށް ޕީޖީ އޮފީހުން ބުންޏެވެ.

ޕީޖީ އޮފީހުން އިތުރަށް ބުނީ މި އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި، އެ މީހުންގެ މައްޗަށް ތުހުމަތުކުރެވޭ މައްސަލަތަކުގެ ތަހުގީގު ކުރިއަށް ގެންގޮސް ވީ އެންމެ އަވަހަށް އެ އޮފީހަށް ހުށަހެޅުމަށް ދިވެހި ފުލުހުންގެ ޚިދުމަތަށާއި، އެންޓި ކޮރަޕްޝަން ކޮމިޝަން (އޭސީސީ) އަށް އަންގާފައިވާ ކަމަށެވެ.

ފޮޓޯ: ސަން

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް