ރައީސް ޑރ. މުޙައްމަދު މުޢިއްޒު، އެސްޓޯނިއާ އަށް ކުރެއްވި ރަސްމީ ދަތުރުފުޅުގައި، އެސްޓޯނިއާގެ ޑިޖިޓަލް އެޑްވައިޒަރީ ކައުންސިލާއެކު ބައްދަލުވުމެއް ބާއްވާފިއެވެ. މި ބައްދަލުވުމުގައި ދިވެހިރާއްޖޭގެ ޑިޖިޓަލް ޓްރާންސްފޮމޭޝަންގެ ލަނޑުދަނޑިތައް ޙާޞިލުކުރުމަށް އެސްޓޯނިއާގެ ދުނިޔޭގައި ފާހަގަކުރެވިފައިވާ ޑިޖިޓަލް ކުރިއެރުންތަކުން ފިލާވަޅު ލިބިގަތުމާއި އެކުގައި މަސައްކަތްކުރުމަށް މަޝްވަރާކުރެވުނެވެ.
މި މަޝްވަރާތަކުގައި، ޑިޖިޓަލް އިންފްރާސްޓްރަކްޗަރއެއް ބިނާކުރުމަށް ސަރުކާރާއި އަމިއްލަ ދާއިރާގެ ބައިވެރިވުމުގެ މުހިންމުކަން ފާހަގަކުރެވުނެވެ. އެސްޓޯނިއާގެ ޑިޖިޓަލް ވެރިކަމުގައި، ރައްޔިތުންނަށް އަމާޒުކުރެވިފައިވާ ޚިދުމަތްތަކާއި އީ-ގަވަރނަންސްގައި ލިބިފައިވާ ކާމިޔާބީތަކަކީ ދެމެހެއްޓެނިވި އަދި އީޖާދީ ޑިޖިޓަލް އިޤްތިޞާދެއް އުފެއްދުމަށް ދިވެހިރާއްޖެއިން ކުރަމުންދާ މަސައްކަތަށް އިލްހާމެއްކަމުގައި ވިއެވެ.
ރައީސް މުޢިއްޒު، އެމަނިކުފާނުގެ ސަރުކާރުން ”ޑިޖިޓަލް-ފަސްޓް“ ގެ ވިސްނުމުގައި ފަސޭހައިން ލިބެންހުރުމާއި، ދެމެހެއްޓެނިވި ގޮތާއި، ވިލުންވެރިކަން އިސްކަންދޭ ސަރުކާރެއް އުފެއްދުމުގެ ތަޞައްވުރު ހިއްސާކުރެއްވިއެވެ. އަދި ޚާއްޞަކޮށް ސަރުކާރުގެ ޚިދުމަތްތައް ހަލުވިކުރުމާއި ރައްޔިތުން ބާރުވެރިކުރުވުމަށް، ދުނިޔޭގައި ކާމިޔާބު ވެފައިވާ ސްޓްރެޓެޖީތައް ދިވެހިރާއްޖޭގެ ޚާއްޞަ ބޭނުންތަކާ އެކަށޭނަ ގޮތަށް ބަދަލުކުރުމުގެ މުހިންމުކަން ފާހަގަކުރެއްވިއެވެ.
އެސްޓޯނިއާގެ ޑިޖިޓަލް އެޑްވައިޒަރީ ކައުންސިލުން، ޚިދުމަތްތައް އަލުން ފަރުމާކުރުމާއި އީޖާދުކުރުމުގެ ދާއިރާތަކުގައި ތަޖުރިބާ ހިއްސާކޮށް، ދިވެހިރާއްޖެއަށް އެހީތެރިވުމުގެ ޝައުޤުވެރިކަން ފާޅުކުރިއެވެ. އަދި ޑިޖިޓަލް އީޖާދުތައް ކުރިއެރުވުމުގައި މުހިންމު ދައުރެއް އަދާކުރާ ސްޓެމް ތަޢުލީމާއި ހަގީގީ ވިސްނުން ޅަފަތުގައި އަށަގެންނެވުމުގެ މުހިންމުކަންވެސް ފާހަގަކުރެވުނެވެ.
އެސްޓޯނިއާގެ ރައީސް ޑރ. އަލާރ ކަރިސް، ޑިޖިޓަލައިޒޭޝަނަށް ދިވެހިރާއްޖެއިން ދެއްވާ އަހައްމިއްޔަތު ތަޢުރީފުކުރައްވައި، ޓެކްނޮލޮޖީ ކުރިއެރުވުމުގައި ބައިނަލްއަޤްވާމީ އެއްބާރުލުމުގެ މުހިންމުކަން ފާހަގަކުރެއްވިއެވެ.
