ފުލުހުންގެ ޚިދުމަތުގެ އިކޮނޮމިކް ކްރައިމް އިންވެސްޓިގޭޝަންގެ ހެޑްގެ މަސްއޫލިއްޔަތުތަކުން ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ވަގުތީ ގޮތުން އެކަހެރިކޮށްފިއެވެ.
ރަޖުނީއާ ގުޅޭ ގޮތުން ސޯޝަލްމީޑިއާގައި އާންމުވެފައިވާ މައުލޫމާތާ ގުޅިގެން ބަލަންޖެހޭ ކަންކަން ފުލުހުންގެ ޚިދުމަތުން ދަނީ ބަލަމުންނެވެ.
ނުގަވާއިދުން ވިނަރެސް ފުލެޓުތަކެއް ދީފައިވާ މައްސަލައެއް ފެންމަތިވެފައިވާއިރު، ސޯޝަލްމީޑިއާގައި އާންމުވެފައިވާ ވިނަރެސް ފުލެޓު ލިބުނު މީހުންގެ ލިސްޓުގައި ރަޖުނީގެ ނަން ވެސް އެބައޮތެވެ.
އެސިސްޓެންޓް ކޮމިޝަނަރ އޮފް ޕޮލިސް އަދި ފުލުހުންގެ ތަރުޖަމާނު އަޙްމަދު ޝިފާން މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެސްޕީ ރަޖުނީ ކުރައްވަމުން ގެންދެވި މަސައްކަތްތައް ވަގުތީ ގޮތުން އެހެން ފަރާތަކާ ހަވާލުކުރެވިފައިވާ ކަމަށެވެ.
ޝިފާން ވިދާޅުވީ މިކަމަކީ އިކޮނޮމިކް ކްރައިމް އިންވެސްޓިގޭޝަންސްގައި މިވަގުތު ކުރަމުންގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި، އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށްޓަކައި ގެނައި ބަދަލެއް ކަމަށެވެ.
މި ނިންމުމަކީ އެސްޕީ ރަޖުނީއާ ގުޅޭ ގޮތުން ފުލުހުންގެ ޚިދުމަތުން ޔަގީންކުރަމުންދާ ކަންކަމުގައި، އެ ފަރާތުން އެއްވެސް ނުރަނގަޅު އަމަލެއް ހިންގާފައިވާކަން މިހާތަނަށް ފާހަގަކުރެވިގެން ނިންމި ނިންމުމެއް ނޫން ކަމަށް ވެސް ޝިފާން ވިދާޅުވިއެވެ.
ރަޖުނީ ޝުއައިބު. ފޮޓޯ: މިހާރު
