މާލޭ އަލިކިލެގެފާނު މަގުން ސައިކަލެއްގައި ދުއްވާފައި ދިޔަ އަންހެނެއްގެ ކަރުގައި އޮތް ރަން ފަށް ފޭރިގަންނަން އުޅުނު މީހަކު ހައްޔަރުކޮށް ބަންދުގައި ބަހައްޓަން ކޯޓުން އަމުރުކޮށްފިއެވެ.
އިއްޔެގެ ވަގުތެއްގައި އަލިކިލެގެފާނު މަގުން ސައިކަލެއްގައި ދުއްވާފައި ދަމުން، އެހެން ސައިކަލެއްގައި ދިޔަ އަންހެނަކު ހުއްޓުވައި ފޭރެން އުޅުނު މައްސަލައެއް ފުލުހުން ދަނީ ބަލަމުންނެވެ.
މި މައްސަލާގައި ހައްޔަރުކޮށްފައިވަނީ ވ.ފިޔަބަރި، ޙަސަން އިސާމް (30އ) އެވެ.
ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް މިއަދު ހާޒިރުކުރުމުން 7 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.
ސޯޝަލްމީޑިއާގައި އާންމުވެފައިވާ ވީޑިއޯއިން ފެންނަ ގޮތުގައި އިސާމު އުޅުނީ އަންހެން މީހާގެ ކަރުގައި އޮތް ފަށް ފޭރިގަތުމަށެވެ. އެކަން ނާކާމިޔާބުވުމުން އަންހެންމީހާގެ އަތްދަބަސް ޖަހައިގަންނަން ވެސް މަސައްކަތް ކުރިއެވެ.
