ވެރިކަމުން މިހާރު ދުރުކުރެވިފައިވާ ސޫރިޔާގެ ރައީސް ބައްޝާރުލް އަސަދު ފިއްލަވައިގެން ރަޝިޔާއަށް ވަޑައިގެންނެވުމުގެ ކުރިން 250 މިލިޔަން ޑޮލަރު ސިއްރިޔާތުގައި މޮސްކޯއަށް ވައިގެ މަގުން އުފުލާފައިވާ ކަމަށް ފައިނޭންޝަލް ޓައިމްސް އިން ނެރުނު ރިޕޯޓެއްގައި ބުނެފިއެވެ.

ބައްޝާރުލް އަސަދުގެ އެންގެވުމަށް ސޫރިޔާގެ ސެންޓްރަލް ބޭންކުން މިކަން ކޮށްފައިވަނީ ދެއަހަރެއްހާދުވަހުގެ މުއްދަތެއްގެ ތެރޭގައި ކަމަށް ވެއެވެ.

ބޭރު ފައިސާގެ ދަތިކަން އިންތިހާއަށް ކުރިމަތިވެފައިވާ ސޫރިޔާ އިން ދެޓަނުހާ ނަގުދު ޑޮލަރު އަދި ޔޫރޯ ބޭރުކޮށްފައިވަނީ 100ޑޮލަރުގެ ނޫޓުންނާއި 500 ޔޫރޯގެ ނޫޓުން 2018 އާއި 2019އާއި ދެމެދު ކަމަށް ވެއެވެ.

މި ޓްރާންސެކްޝަންތަކާބެހޭ ޑޮކިއުމަންޓްތައް ފައިނޭންޝަލް ޓައިމްސް އަށް ލިބި، ހާމަކޮށްފައިވާއިރު، މިކަން ކުރި މައިގަނޑު ސަބަބެއްގެ ގޮތުގައި ބެލެނީ ހުޅަގުން އަސަދުގެ ފައިސާ ހިފަހައްޓަފާނެ ކަމަށްބަލާ،އެކަމުން ރެކުން ކަމަށްވެއެވެ. މީގެއިތުރުން ރަޝިޔާއިން އަގުބޮޑު މުދާ ގަތުމާއި އަދި ފައިސާ ރައްކާކުރުން ހިމެނެއެވެ.

މިހާ ގިނަ އަދަދަކަށް ފައިސާ ވަގަށް ބޭރުކޮށްފައިވަނީ ރަޝިޔާގެ މިލިޓަރީ އެއްބާރުލުމަށް ސޫރިޔާއިން ބަރޯސާ ވަމުން އައި ދުވަސްވަރެއްގައެވެ. ހަމަ އެ ދުވަސްވަރު އަސަދުގެ އާއިލާގެ ބައެއް މެމްބަރުން ވަނީ މޮސްކޯ އިން ލަގްޒަރީ ޕްރޮޕަޓީތައް ގަންނަން ފަށާފައެވެ.

އަސަދުގެ ޚުދުމުޚުތާރު ވެރިކަމުގެ ފަރާތުން، ހުޅަނގުގެ ދަތިކުރުމުގެ ފިޔަވަޅުތަކުން ނެއްޓި ގަތުމަށް ކޮންމެފަދަ ކަމެއްވެސް ކޮށްފާނެކަން، މި އަމަލުން ފެންނަކަމަށް ފައިނޭންޝަލް ޓައިމްސްގެ ރިޕޯޓްގައި ބުނެފައިވާ ކަމަށްވެއެވެ.

އެމެރިކާގެ އެސިސްޓަންޓް ސެކްރެޓަރީ އޮފް ސްޓޭޓް ޑޭވިޑް ޝެންކަރ އެފްޓީ އަށް ވިދާޅުވެފައިވާ ގޮތުގައި އަސަދު މިފަދަ ގޮތަކަށް ކަންތައް ކުރެއްވުމުން މާބޮޑަކަށް ހައިރާނެއް ނުވެއެވެ. އެހެނީ އެހާ ގިނަ ފައިސާ ހުރެގެން މެނުވީ އެ އާއިލާއިން އުޅެމުން އައި އަރާމު ތަނަވަސް ދިރިއުން ނުލިބޭނެތީއެވެ.

ސޫރިޔާގެ ރިސޯސްތައް އަސަދުގެ ސަރުކާރުން ލޫޓުވަމުން ދާކަމުގެ ތުހުމަތު ހުޅަގުގެ ސަރުކާރު ތަކުންނާއި އިދިކޮޅު ފަރާތްތަކުން އައީ ކުރަމުންނެވެ.

އިދިކޮޅު ހަނގުރާމަވެރިން 11 ދުވަސްވަންދެން ހިންގި އޮޕަރޭޝަން އަކަށްފަހު ބައްޝާރުލް އަސަދު ގައުމު ދޫކުރައްވާ ފިއްލަވާފައިވަނީ ޑިސެމްބަރަ 8ވަނަ ދުވަހުއެވެ. އިދިކޮޅު ހަގުރާމަވެރިން ފަހަރަކު ސިޓީއެއް ހިފަމުން އައިސް ވެރިރަށް ދިމިޝްގާ ކައިރިވެފައިވަނިކޮށް އަސަދު ވަނީ ދަންވަރުގެ ވަގުތެއްގައި އާއިލާ އާއިއެކު ރަޝިޔާއަށް ވަޑައިގެންފައެވެ. ފުރަތަމަ ވަޑައިގެންނެވި ތަނެއް ހާމަ ނުކުރި ނަމަވެސް ފަހުން ކްރެމްލިން އިން ވަނީ އަސަދަށް ޕޮލިޓިކަލް އެސައިލަމް ދީފައިވާކަން ޔަގީން ކޮށްދީފައެވެ.

އަނެއްކޮޅުން ޚަބަރު ލިބޭ ގޮތުގައި ހުންނެވީ ގައުމު ދޫކުރައްވާ ވަޑައިގަތުމަށް ގަސްތުކުރައްވައިގެން ނޫންކަމަށް އަސަދު ވިދާޅުވެފައިވާ ކަމަށް ސޫރިޔާގެ ސަރުކާރުން ބުނެފިކަމަށް ވެއެވެ.“ސީރިޔަން ޕްރެޒިޑެންސީ“ އިން ހިންގާ ޓެލެގްރާމް ޗެނެލްގައި އިގިރޭސި އަދި އަރަބި ބަހުންވާ ބަޔާނެއް ބުނާގޮތުން އަސަދު ރަޝިޔާގެ މިލިޓަރީ ބޭސް އަށް ވަޑައިގެންނެވީ އިދިކޮޅު ހަނގުރާމަވެރިންގެ ”މޫވްމަންޓް“ ތައް ބެއްލެވުމަށް ކަމަށާ، އެވަގުތު ރަޝިޔާއަށް ވަޑައިގެންނެވުމަށް އަސަދަށް ދެންނެވުނީ ކަމަށް ސރުކާރުގެ ބަޔާނުގައި ވެއެވެ.
”ސީރިޔަން ޕްރެޒިޑެންސީ“ ގެ ޓެލެގްރާމް ޗެނެލް ގައި ލިޔުނީ ކޮންފަރާތަކުން ކަމެއް އަދި ހެންޑްލް މިވަގުތު ހިންގަނީ ކޮންފަރާތަކުން ކަންވެސް ސާފުނުވާ ކަމަށް ބީބީސީން ބުނެއެވެ.