ސީޔާސީ ދާއިރާ ތަޣައްޔަރުވެ، ރީތި އާދަތައް ދަނީ ގެއްލެމުންދާ ކަމަށާއި، ރީތި އާދަތައް އަލުން އިއާދަކުރަންޖެހޭ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ އަރިއަތޮޅު ދެކުނުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅު މަހިބަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
“އަމުދުން މި ފަހަކަށް ސިޔާސީ މައިދާން ފުޅާވެ ތަޣައްޔަރުވަމުންދާ ވަރަކަށް އޭގެތެރޭގަ އެ އަވައިގަ ޖެހިގެން އަޅުގަނޑުމެންގެ ތެރޭގަ ހުރި ވަރަށް ގިނަ ރީތި އާދަތަކެއް ގަސްދުގަ ނޫނަކަސް އެބަ ގެއްލޭ. އެހެންވީމަ އެބަޖެހޭ އެ ކަންކަން އިއާދަކުރަން. އެހެންނޫނީ ހަގީގަތުގަ ގައުމެއް ނެތް“
އެގޮތުން މީހުންނަށް އިހުތިރާމުކުރުމާއި، ރީތި ބަހުން ވާހަކަދެއްކުމާއި މިފަދަ ރަނގަޅު ސިފަތައް އިއާދަކުރުމަކީ ކޮންމެހެން ކުރަންޖެހޭ ކަމެއް ކަމަށް ރައީސް ވިދާޅުވިއެވެ.
އަންނާން އޮތް ޖީލުތަކަށް ގައުމުގެ މުސްތަގުބަލު ރަނގަޅު ގޮތުގައި ފޯރުކޮށްދޭން ބޭނުންވާނަމަ އަމިއްލަވަންތަކަން ނުވަތަ ކުރީގައި އޮތް ރީތި އާދަތައް އަނބުރާ ގެނެސް ފޯރުކޮށްދޭންޖެހޭ ކަމަށް ވެސް ރައީސް ވިދާޅުވިއެވެ.
ބަވަނަވަމުންދާ ދުނިޔޭގައި ނޭދެވޭ ބައިވަރު ކަންކަން އެބަ ކުރިމަތިވާ އެ ކަންކަމުން ސަލާމަތްވާންޖެހޭ ކަމަށް ވެސް ރައީސް ވިދާޅުވިއެވެ.
