ކުރީގެ ރައީސް އިބްރާހިމް މުހައްމަދު ޞާލިހް އާއި އިތުރު ދެ ބޭފުޅަކާ ގުޅޭ ޖިނާއީ ތަހުގީގެއް ހިންގުމަށް މާލިއްޔަތު ކޮމިޓީން ފާސްކޮށްފިއެވެ. މާލިއްޔަތު ކޮމިޓީގެ މިއަދުގެ ބައްދަލުވުމުގައި، ކުރީގެ ރައީސް އިބްރާހިމް މުޙައްމަދު ޞާލިޙާއި، ރައީސް އޮފީހުގެ ކުރީގެ މިނިސްޓަރު އަލީ ޝިޔާމް، އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާޢީލްގެ މައްޗަށް ޖިނާއީ ތަޙުޤީޤެއް ހިންގުމަށް ޕްރޮސެކިއުޓަރ ޖެނެރަލްއަށް އެންގުމަށް ވަނީ ފާސްކޮށްފައެވެ.

”އެމްޑީޕީގެ ވެރިކަމުގައި ރައީސް އޮފީހުން ކޮމެޓީއެއް ހަދައިގެން ދިޔައީ ރައްޔިތުންގެ މުދަލާއި ފައިސާ އެކި ފަރާތްތަކަށް ބަދަލުގެ ގޮތުގައި ގޮތުގަ ދީފަ މިވަނީ. މީކީ ރާއްޖޭގެ ތާރީހުގައި ހިނގި ކަމެއްނޫން ކޮމިޓީއެއް ހަދައިގެން ރަައްޔިތުންގެ މުދާ ކައިގެން ބަދަލުދިނުމަކީ. ކޮމިޓީގައި ހިމެނޭ ފައްޔާޒު އިސްމާއިލުގެ އާއިލާ ބޭފުޅުންނަށްވެސް އެބަހުރި އެތައް އަހަރަކަށް ރިސޯޓް ހަދަން ރަށްތައްދީފައި ހަމަ ބަދަލުގެ ގޮތުގައި“ ރައްޔިތުންގެ މަޖީލީހުގެ ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގު ވިދާޅުވިއެވެ.

މި ކޮމިޓީން ފާސްކޮށްފައިވަނީ މި ތިން ބޭފުޅުން ދައުލަތުގެ އިސް މަޤާމުތަކުގައި ތިއްބަވައިގެން، ޤާނޫނުއަސާސީން މަތިކޮށްފައިވާ ވާޖިބުތަކާއި ޚިލާފަށް ދައުލަތުގެ ފައިސާއާއި މުދާ ސީދާ ގޮތުންނާއި ނުސީދާ ގޮތުން ޙައްޤުނޫން ފަރާތްތަކަށް ހޯދައިދީފައިވާ ކަމަށް ތުހުމަތުކުރެވޭތީ ކަމަށް އަޒާން ވިދާޅުވިއެވެ.

”ކުރީގެ ރައީސްކަން ކުރުމަކީ ވައްކަންކުރަން ލިބޭ ލައިސަންސެއް ނޫން އެ އިމްޕިއުނިޓީ ލިބޭ ކަމެއްވެސް ނޫން. ވައްކަން ކޮށްފަ ތިމަންނަ އަކީ ކުރީގެ ރައީސެކޭ ތިމަންނަ އަކީ ޕާޓީއެއްގެ ޗެއާޕާސަންއެކޭ މިހާރު އެހެންވީމަ ތިމަންނައަކަށް ދައުވާ ކޮށްގެން ނުވާނެއޭ އެއީ ސިޔާސީ ދައުވާއެކޭ އެހެންނެއް ނޫން ގާނޫނުން ރިކޮގްނައިޒްއެއް ނުކުރޭ ހުރި ހައިސިއްޔަތެއް އޭނަ ވައްކަމެއް ކޮށްފިއްޔާ އެކަންތައް ބަލަންޖެހޭނެ. އަޅުގަނޑު ކުރިޔަސް އަދި ތިޔަބޭފުޅުން ކުރިޔަސް އަދި ކުރީގެ ރައީސް އިބުރާހިމް ކުރެއްވިޔަސް ވައްކަމެއް ކޮށްފިއްޔާ ބަލަންޖެހޭނެ އެގޮތުގެ މަތިން އެބޭފުޅުންގެ ނަންތައް ހިމެނިފަ މިއޮތީ،“. އަޒާން ވިދާޅުވިއެވެ.

މީގެ އިތުރުން، ކޮމިޓީން ވަނީ ސެޓްލްމަންޓް ކޮމިޓީން 2019 އިން 2023 އާ ހަމައަށް ސޮއިކޮށްފައިވާ ސެޓްލްމަންޓްތަކަކީ ބާޠިލު އެއްބަސްވުންތަކެއް ކަމަށް ކަނޑައަޅައި، އެ އެއްބަސްވުންތައް ބާޠިލުކޮށް، ބަދަލު ދީފައިވާނަމަ އެ ފައިސާ އަނބުރާ ދައުލަތަށް ނެގުމަށް ބަންޑާރަ ނައިބަށާއި ކަމާ ގުޅުންހުރި އިދާރާތަކަށް އެންގުމަށްވެސް ފާސްކޮށްފައެވެ.

މާލިއްޔަތު ކޮމެޓީގެ މިއަދުގެ ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހު ވަނީ ސޯލިހާއި ޝިޔާމް އަދި ފައްޔާޒަށް ޖިނާއީ ތަހުގީގެއް ހިންގަން ޕީޖީއަށް އަންގަން ފެންނަ ކަމަށް ހުށަހަޅައިފައެވެ. މަމްދޫހުގެ އެ ހުށަހެޅުމަށް ތާއިދުކޮށްފައި ވަނީ ކެލާ ދާއިރާގެ މެންބަރު އަބްދުﷲ ޝަރީފެވެ. އެ ހުށަހެޅުން ފާސްކޮށްފައި ވަނީ ޖަލްސާގައި ބައިވެރިވެ ވޯޓުދިން ހަ މެންބަރުންގެ އިއްތިފާގުންނެވެ.

ބެލޭވޭ ގޮތުގައި މި ތަހުގީގުތައް ހިންގުމުގެ ބޭނުމަކީ އިދިކޮޅު އެމްޑީޕީއިން ސިޔާސީ ހަރަކާތްތައް ވަރުގަދަ ކުރަމުންދާ ދަނޑިވަޅެއްގައެވެ. އެގޮތުން ރޭ އިކޮޅުން ބޭއްވި ޖަލްސާގައިވަނީ ރައީސް ސޯލިޙް ވާހަކަދައްކަވާފައެވެ.