ހިޔާ ފްލެޓްތަކުގައި އަލަށް ލިފްޓް ހަރުކުރުމަށް 278 މިލިއަން ރުފިޔާ (18 މިލިއަން ޑޮލަރު) ޚަރަދުވާނެ ކަމަށް އެޗްޑީސީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު މިއަދު ވިދާޅުވެއްޖެއެވެ. ޖުމްލަ 32 ލިފްޓް ހަރުކުރުމަށް މިހާ ބޮޑު އަދަދެއް ޚަރަދުކުރަން ޖެހުމާމެދު ގިނަ ފަރާތްތަކުން ކަންބޮޑުވުން ފާޅުކޮށްފައިވެއެވެ.
މި ޚަރަދުގެ ބޮޑުކަން އިތުރަށް ފާހަގަވަނީ ވޯލްޑް ބޭންކުން ކުރިން ފާހަގަކޮށްފައިވާ ހިޔާ މަޝްރޫޢުގެ ޖުމްލަ އަގާ އަޅާބަލާއިރުއެވެ. ވޯލްޑް ބޭންކުގެ 2022 އޮކްޓޯބަރު މަހުގެ ރިޕޯޓުގައި ބަޔާންކޮށްފައިވާ ގޮތުގައި، މުޅި ހިޔާ މަޝްރޫޢުގެ ޖުމްލަ އަގަކީ 679 މިލިއަން ޑޮލަރެވެ. މިއީވެސް ޕްރޮޖެކްޓްގެ ސައިޒަށް ބަލާއިރު އިންތިހާއަށް ބޮޑު އަގެއް ކަމަށް ވޯލްޑް ބޭންކުން ފާހަގަކޮށްފައިވެއެވެ.
ކޮންމެ ފްލެޓަކަށް ސަރުކާރުން 31,800 ޑޮލަރުގެ ސަބްސިޑީއެއް ދޭންޖެހޭއިރު، މިހާރު އަލަށް ލިފްޓް ހަރުކުރުމަށް ހިނގާ ޚަރަދު މިއަދަދަށް އިތުރުވެގެންދާނެއެވެ. މީގެ އިތުރުން، އެޗްޑީސީއަށް ދިމާވެފައިވާ ފައިސާގެ ދަތިކަމާއި، ފްލެޓްތަކުގެ ކުލި ނުދައްކާ ފަރާތްތައް ގިނަވުމުގެ ސަބަބުން މި އިތުރު ޚަރަދު އުފުލުމަކީ އިތުރު ގޮންޖެހުމެއް ކަމުގައި ފާހަގަކުރެވެއެވެ.
ރިޕޯޓުގައި ފާހަގަކޮށްފައިވާ ގޮތުގައި ހުޅުމާލޭ ފޭސް 1 އަދި 2 ގައި ހުރި ސޯޝަލް ހައުސިންގ ޕްރޮޖެކްޓްތަކުގެ 37 އިންސައްތަ (6,338 ޔުނިޓުގެ ތެރެއިން 2,345) ފްލެޓުގެ ކުލި ނުދައްކާ ވާކަން ފާހަގަކޮށްފައިވެއެވެ. މި ހާލަތުގައި، އިތުރު 278 މިލިއަން ރުފިޔާގެ ޚަރަދެއް ކުރުމަކީ ދައުލަތުގެ މާލީ ދުޅަހެޔޮކަމަށް އިތުރު ނޭދެވޭ އަސަރެއް ކުރާނެ ކަމެއް ކަމަށް ފާހަގަކުރެވެއެވެ.
