ދޭދޭ ގައުމުތަކުގެ މެދުގައި ކުރެވޭ ވިޔަފާރީގެ މުއާމަލާތު ތަކުގައި ޔޫއެސް ޑޮލަރުގެ ބަދަލުގައި އެގައުމެއްގެ ފައިސާއިން އަގުއަދާކުރާގޮތަށް ހަމަޖައްސާ ގައުމު ތަކުން، އެމެރިކާގެ 100 ޕަސެންޓް ޓެރިފް އާއި ކުރިމަތިލާން ޖެހޭނެ ކަމަށް ވިދާޅުވެ ޑޮނަލްޑް ޓްރަމްޕް ވަރުގަދަ އިންޒާރެއް ދެއްވައިފިއެވެ.
އިންޑިޔާއާއި އެހެންވެސް ”ބްރިކްސް“ ޖަމާއަތުގައި ހިމެނޭ ގައުމު ތަކުން ދަނީ ބްރިކްސްގެ ފައިސާއެއް އުފެއްދުމަށް ނުވަތަ އެގައުމެއްގެ އަމިއްލަ ފައިސާއިން އަގުދެއްކޭ ގޮތަށް ހަމަޖެހޭތޯ މަސައްކަތް ކުރަމުންނެވެ.
ބްރިކްސް ޖަމާއަތުގައި ހިމެނޭ ގައުމު ތަކަކީ އިންޑިޔާ، ބްރެޒިލް، ރަޝިޔާ، ޗައިނާ، ދެކުނު އެފްރިކާގެ އިތުރުން، އެ ޖަމާއަތާ އެންމެ ފަހުން ގުޅުނު އީރާން، އީޖިޕްޓް އަދި ޔޫއޭއީ އަށް ވާއިރު، އެ ގައުމުތަކުން އެފަދަ ފިޔަވަޅެއް އަޅައިފިނަމަ ޔޫއެސް ޑޮލަރަށް އޮތް ޑިމާންޑް ވަރަށް ބޮޑަށް ވެއްޓި އެމެރިކާގެ އިގުތިސާދަށް ވެސް އެކަމުގެ ނޭދެވޭ އަސަރު ވަރަށް ބޮޑަށް ކުރާނެއެވެ.
އަމިއްލަ ސޯޝަލް މީޑިޔާ ޕްލެޓްފޯމް ”ޓްރުތު ސޯޝަލް“ ގައި ލިއުއްވަމުން ޓްރަމްޕް ވިދާޅުވީ ގައުމުތަކުން ޔޫއެސް ޑޮލަރަށް ބޭނުން ގޮތެއް ހަދަމުންދާއިރު އެމެރިކާއިން މަޑުން ބަލަން އޮންނަ ދުވަސް ފާއިތުވެ ހިނގައްޖެ ކަމުގައެވެ. އަދި ޔޫއެސް ޑޮލަރުގެ ބާރު ކަނޑުވާލުމަށް ބްރިކްސް ޖަމާއަތުން ކުރަމުންދާ މަސައްކަތް ހުއްޓާލުމަށް ގޮވާލެއްވިއެވެ. މީގެ އިތުރުން ބްރިކްސްގެ އަމިއްލަ ކަރެންސީއެއް ނުއުފައްދާނެކަމާއި އަދި ޔޫއެސް ޑޮލަރުގެ ބަދަލުގައި އެހެން އެއްވެސް ކަރެންސީއެއް ގަބޫލު ނުރާނެ ކަމުގެ ޔަގީންކަން އެގައުމުތަކުން ދިނުމަށްވެސް ޓްރަމްޕް ގޮވާލައްވާފައި ވެއެވެ.
އެފަދަ ކަމެއް ކުރާ ގައުމުތަކުން ޖެހޭނީ އެމެރިކާގެ ”ވޮންޑަފުލް“ އިކޮނޮމީ އަށް ވިއްކުން ހުއްޓާލަން ކަމަށާ އެކަމުތަކާ ދެކޮޅަށް 100 ޕަސެންޓް ޓެރިފް އިއުލާން ކުރައްވާނެ ކަމަށް ޓްރަމްޕް ވިދާޅުވެފައި ވެއެވެ.
އޮކްޓޯބަރުމަހު ރަޝިޔާގެ ކަޒާންގައި ބޭއްވުނު ބްރިކްސް ގެ އެންމެ އިސްވެރިންގެ ބައްދަލް ވުމުގައި ލީޑަރުން ވަނީ ޔޫއެސް ޑޮލަރު ފިޔަވާ އެގައުމެއްގެ އަމިއްލަ ފައިސާއިން ވިޔަފާރީގެ ޑީލްތައް ނިންމުމާއި ބެހޭ ގޮތުން ވަރަށް ބޮޑަށް މަޝްވަރާކޮށްފައެވެ.
ބްރިކްސްގެ ވަކި ކަރެންސީއެއް ހެދުމަށް ރަޝިޔާގެ ރައީސް ވްލަޑިމިއަރ ޕޫޓިން ދެކޮޅު ހެއްދެވި ނަމަވެސް މެމްބަރު ގައުމުތަކުގެ ބޭންކިންގ ނެޓްވާކްތައް ވަރުގަދަކޮށް، ކްރޮސްބޯޑަރ އިނީޝިއޭޓިވް އެއްގެ ދަށުން އެގައުމެއްގެ ލޯކަލް ކަރެންސީން އަގުދެއްކުމަށް ހިއްވަރުދޭ ކަމަށް ބުނެ ޖޮއިންޓް ޑިކްލަރޭޝަން އެއް ސަމިޓުން ފާސް ކޮށްފައިވެއެވެ.
One Response
ދެނެއް ފުއްޕާނެ ކަމެއްނެތް! މިހާރު ތީ އެވަރުގެ އުރަތްޕެއް ހުރިބައެއްނޫން! ﷲ އިރާދަކުރެއްވިއްޔާ ކުރިއަށް މި އޮތް 12 ވަރަކަށް އަހަރުގެ ތެރޭގައި ބްރިކްސްގެ ފައިބުޑަށް ތިރިވާންޖެހޭނީ، އީރާން ފަދަ ޤައުމުތައް ކުރިއަރައި އެ ދިޔައީ ކަލޭމެންގެ ޢުޤޫބާތުގެ ދަށުގައި ފިތިފައި އޮވެގެންނެވެ. ކަލޭ މުޅިޔޫރަޕު ގޮވައިގެން ގޮސް ޔުކްރޭނުގައި ތިޔައުޅެނީ ރަޝިޔާ ބަލިނުކުރެވިގެނެވެ. ﷲ އިރާދަކުރެއްވިއްޔާ މިހާރު ކުރިޔަށް އެދާ އިޤުތިޞާދީ ހަނގުރާމަ ނިމޭނީ އެމެރިކާ އާއި އެމެރިކާގެ ބައިވެރި ޔޫރަޕުވެސް ބަލި ކޮށްފައެވެ. އެހާރުން އެމެރިކާ އުޅޭނީ ނިއުކުލިޔާގައި ހިފާށެވެ. ނަމަވެސް ﷲ އިރާދަކުރެއްވިއްޔާ ރަޝިޔާ އޭގެ ކުރިން ވަގުތުގެ ބޭނުން ކުރާނެއެވެ. އެހާއިރުން ﷲ އިރާދަކުރެއްވިއްޔާ އޭސިޔާއަށް ހުރިހައި ބާރެއް ލިބޭނެއެވެ. ވައްﷲއަޢުލަމް!!!