ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެކަމަށް އެމްޑީޕީގެ ޗެއާޕާސަން ފައްޔާޟް އިސްމާޢީލް މިއަދު ވިދާޅުވެއްޖެއެވެ.

ފައްޔާޟް މިހެން ވިދާޅުވީ އެމްޑީޕީގެ އެކްޓިވިސްޓެއް ކަމަށްވާ ހއ.ތުރާކުނު، ނިޔަދުރުމާގެ، ޙުސައިން ޝާފިޢު (ތުއްތު)، ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަނަށް ހާޒިރުވާން އަންގައި ދިވެހި ފުލުހުންގެ ޚިދުމަތުން ފޮނުވާފައިވާ ޗިޓާ ގުޅިގެން އެކްސްގައި ކުރެއްވި ޕޯސްޓެއްގައެވެ.

ފައްޔާޟް ވިދާޅުވީ ޓްވީޓު ކުރާތީ ފުލުސް އޮފީހަށް ހާޒިރުވާން ޝާފިއު (ތުއްތު) އަށް އަންގައިފި ކަމަށާއި، ރައީސުލްޖުމްހޫރިއްޔާއާއި ސަރުކާރުގެ އިސްވެރިންގެ ”އަބުރުފުޅު“ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށެވެ.

ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށާއި، ރައްޔިތުންގެ އަޑު ކަނޑުވާލައި، ޚިޔާލު ފާޅުކުރުމަށް ޚުދުމުހުތާރު ވެރިން އަބަދުވެސް ހުރަސް އަޅާނެކަމަށް ފައްޔާޟް ވިދާޅުވިއެވެ.

“ޚިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ.“

މާދަމާ 13:30 އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަނަށް ހާޒިރުވާން އަންގައި ޙުސައިން ޝާފިޢުއަށް ފޮނުވި ޗިޓުގައިވާ ގޮތުން އޭނާ ފުލުހަށް ހާޒިރުކުރަނީ “ޗާލީ ތުއްތު“ ގެ ނަމުގައި ހަދާފައިވާ ހޭންޑްލައިންއިން ނޮވެމްބަރު 08 ވަނަ ދުވަހުގެ 1.14 ގައި ހަޑިހުތުރު ބަސް ބޭނުންކޮށްގެން ބިރުވެރިކަން އުފެދޭ ގޮތަށް އެކްސްގައި ޕޯސްޓެއްކޮށްފައިވާ މައްސަލައަކާ ގުޅިގެން ސުވާލުކޮށް ބަޔާން ނެގުމަށެވެ.

ޝާފިޢު ބުނެފައިވަނީ ކިތަންމެ ގިނައަކުން ޗިޓު ފޮނުވައި ފުލުހަށް ހާޒިރުކޮށް ބިރުދެއްކިޔަސް ސަރުކާރުގެ އަނިޔާވެރިކަމާއި ކޮރަޕްޝަނުގެ ވާހަކަ ދެއްކުން ހުއްޓާނުލާނެ ކަމަށެވެ. އަނގައިގައި މަލަން އަޅައި އަޑުކަނޑުވާލަން އުޅުނަސް ފާޅުގައި ބަސް ބުނާނެ ކަމަށެވެ.