ރިސޯޓުތަކާއި ގެސްޓްހައުސްތަކަށް ލިބޭ ޑޮލަރު ބޭންކުތަކުގައި މާރު ކުރަންޖެހޭ ގަވާއިދަށް އެއްވެސް ލުޔެއް ނުދެވޭނެ ކަމަށާއި، މިހާރު އޮތް ގަވާއިދުތައް ގާނޫނަކުން ހަރުދަނާ ކުރެވޭނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެއެވެ.
އެމްއެމްއޭ އިން ވަނީ ފޮރިން އެކްސްޗޭންޖް ބިލް އަށް ޢާންމު ޚިޔާލު ހޯދުމަށް ހުޅުވާލާފައެވެ. މިކަމާ ގުޅިގެން ޑޮލަރު މާރު ކުރުމުގެ ގަވާއިދުތަކަށް ލުތަކެއް ދީފިކަމަށް ކަމަށް ބައެއް ފަރާތްތަކުން ދެކެމުންދާތީ، ގަވަރުނަރު މުނައްވަރު ވަނީ މި ބިލަކީ މައިގަނޑު ގޮތެއްގައި މިހާރު އޮތް ގަވާއިދުތައް ގާނޫނަކަށް ބަދަލުކުރުމާއެކު، ޓޫރިޒަމް އަދި ނޮން-ޓޫރިޒަމް ދާއިރާތަކަށް ހަމަހަމަކަން ގެނައުމަށް ގެނެވޭ ބަދަލުތަކެއް ކަމަށް ސާފުކޮށްދެއްވާފައެވެ.
”އެއްވެސް ލުޔެއް ދީފައެއް ނުވާނެ. ހަމަހަމަކަން ގެނައުމަށްޓަކައި ނޮން-ޓޫރިޒަމް ދާއިރާ ހިމެނުން ފިޔަވައި އިތުރު ބަދަލެއް ގެނެސްފައެއް ނުވާނެ،“ ގަވަރުނަރު މުނައްވަރު ވިދާޅުވިއެވެ.
ބިލްގެ މައިގަނޑު ކަންތައްތައް:
- ޑޮލަރު މާކު ކުރުމުގެ ޝަރުތުތައް:
- ކެޓަގަރީ އޭ ރިސޯޓުތަކާއި، ހޮޓާތަކާއި، ޓޫރިސްޓު އުޅަނދުތަކުން ކޮންމެ ޓޫރިސްޓަކަށް $500 ދިވެހިރާއްޖޭގެ ބޭންކެއްގައި އެކްސްޗޭންޖް ކުރަންވާނެއެވެ.
- ކެޓަގަރީ ބީ ގެސްޓްހައުސްތަކުން ކޮންމެ ޓޫރިސްޓަކަށް މަހަކު $25 ރާއްޖޭގެ ބޭންކު އެކައުންޓަކަށް ޖަމާކުރަންވާނެއެވެ.
- ނޮން-ޓޫރިޒަމް ވިޔަފާރިތައް:
- އަހަރަކު $20 މިލިއަނާ އެއްވަރުގެ ބޭރު ފައިސާ ލިބޭ ވިޔަފާރިތަކުން އެ އާމްދަނީގެ 25% އާ ހަމައަށް ރާއްޖޭގެ ބޭންކު އެކައުންޓަކަށް ޖަމާކުރަންވާނެއެވެ.
- އިސްތިސްނާވާ ހާލަތްތައް:
- 24 ގަޑިއިރަށްވުރެ މަދު މުއްދަތަކަށް ހުންނަ ޓޫރިސްޓުން
- 2 އަހަރުން ދަށުގެ ކުޑަކުދިން
- ހިލޭ ހުރުމުގެ ޚިދުމަތް
- 50 އެނދަށްވުރެ މަދު ޓޫރިސްޓު ހޮޓާތައް:
- ކެޓަގަރީ ބީގެ ދަށުން އަލުން ގިންތިކުރެވި، ކޮންމެ ޓޫރިސްޓަކަށް $25 ޖަމާކުރަންޖެހޭނެއެވެ.
- ގަވާއިދާ ޚިލާފުވުމުން ކުރެވޭ ޖޫރިމަނާ:
- މާރުނުކުރާ އަދަދުގެ 0.05% އިން 0.10% އާ ދެމެދުގެ އަދަދަކުން ލަސްވާ ކޮންމެ ދުވަހަކަށް ޖޫރިމަނާ ކުރެވޭނެއެވެ.
ގަވަރުނަރު ފާހަގަކުރެއްވި ގޮތުގައި އެމްއެމްއޭ އިން ވަނީ ޓޫރިޒަމް ދާއިރާގެ ފަރާތްތަކުން ފާޅުކުރާ ކަންބޮޑުވުންތަކަށް ރިޢާޔަތްކުރަމުން ގެންދާ ކަމަށާއި، ނަމަވެސް ޤައުމުގެ ބޭރު ފައިސާގެ ރިޒާވް އިތުރުކުރުމަކީ ސެންޓްރަލް ބޭންކުގެ ޤާނޫނީ ޒިންމާއެއް ކަމުގައި ވިދާޅުވިއެވެ. އަދި މި ގަވާއިދުތަކަކީ ޢަމަލުކުރަން އުނދަގޫ ގަވާއިދުތަކެއް ކަމަށް ބޮޑެތި ޓޫރިޒަމް ވިޔަފާރިތަކުން ކުރާ ފާޑުކިޔުންތައް ވެސް ވަނީ ދެކޮޅު ހައްދަވާފައެވެ.
