ދިވެހިރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރަކަށް އިލެކްޝަންސް ކޮމިޝަން (އީސީ) ގެ ކުރީގެ ރައީސް ފުއާދު ތައުފީޤު އައްޔަންކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ފުއާދުގެ ނަން ރައްޔިތުންގެ މަޖިލީހަށް ފޮނުއްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރަކަށް ފުއާދު އައްޔަންކުރެއްވުމަށް ނިންމަވައި، ރައީސް ޑރ. މުޢިއްޒު މަޖިލީހަށް ފޮނުއްވި ސިޓީ އިއްވަވާފައެވެ.
ސިޓީ އިއްވެވުމަށްފަހު ވަނީ އެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވައިފައެވެ.
ދެ ދައުރުގައި އީސީގެ ރައީސްކަން ކުރެއްވި ފުއާދުގެ ރައީސްކަމުގެ ދެވަނަ ދައުރު ހަމަވީ މިދިޔަ ހޮނިހިރު ދުވަހުއެވެ.
ދެވަނަ ދައުރުގައި އީސީގެ މެމްބަރުކަމަށް ފުއާދު އައްޔަންކޮށްފައިވަނީ 2019 ވަނަ އަހަރުގެ ނޮވެމްބަރު 24 ގައެވެ. އެ ކޮމިޝަންގެ ރައީސްގެ މަގާމަށް އޭނާ ހަމަޖެއްސީ 2021 ވަނަ އަހަރުއެވެ.
ފުއާދު، ސަރުކާރަށް ޚިދުމަތްކުރައްވަމުން ގެންދަވާތާ މިހާރު 35 އަހަރުވެއްޖެއެވެ.
