ރައްޔިތުންގެ މަޖިލީހުގެ މެންބަރުން އިންތިޚާބުވާ ޕާޓީ ބަދަލުކޮށްފިނަމަ، މެންބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާއެކު ރިޔާސީ ނިޒާމު ފުނޑާލައި، މަޖިލިސް ވާކޮށްލައިފި ކަމަށް ކުރީގެ ޑިފެންސް މިނިސްޓަރު މާރިޔާ އަޙްމަދު ދީދީ އިއްޔެ ވިދާޅުވެއްޖެއެވެ.

މި މަހުގެ 20 ވަނަ ދުވަހު މަޖިލީހުން ފާސްކޮށް، ހަމަ އެ ދުވަހު ތަސްދީގުކުރެއްވި ދިވެހިރާއްޖޭގެ ޖުމްހޫރިއްޔާގެ ގާނުނުއަސާސީއަށް 6 ވަނަ އިސްލާހު ގެނައުމުގެ ބިލުގައި ވަނީ ގާނޫނުއަސާސީގެ 73 ވަނަ މާއްދާގެ (ރ) ގެ ފަހަތަށް އަކުރެއް އިތުރުކޮށް ބަދަލުތަކެއް ހިމަނާފައެވެ. މި ބަދަލުތަކާއެކު، ރައްޔިތުންގެ މަޖިލިސް މެންބަރުންގެ ގޮނޑި ގެއްލޭނެ އާ ތިން ހާލަތެއް އިތުރުކުރެވިފައިވެއެވެ.

އެގޮތުން، ސިޔާސީ ޕާޓީއެއްގެ ޓިކެޓުގައި އިންތިޚާބުވެފައިވާ މެންބަރަކު އެހެން ޕާޓީއަކަށް ބަދަލުވުމުން ނުވަތަ އަމިއްލަ ގޮތުން ކުރިމަތިލައިގެން އިންތިޚާބުވި މެންބަރަކު ޕާޓީއަކަށް ބަދަލުވުމުން ނުވަތަ ރައްޔިތުން މަޖިލީހުގެ މެންބަރަކު، އެ މެންބަރަކު ރައްޔިތުންގެ މަޖިލީހުގެ ޢުމުރުގެ ތެރޭގައި، ތަމްސީލުކުރާ ޕާޓީއިން އަމިއްލައަށް ވަކިވުމުން ނުވަތަ ޕާޓީއިން ވަކިކުރުމުން އެ މެންބަރެއްގެ ގޮނޑި ގެއްލޭނެއެވެ.

އެކްސްގައި ކުރެއްވި ޕޯސްޓެއްގައި މާރިޔާ ވިދާޅުވީ ގާނޫނުއަސާސީއަށް ޕީއެންސީއިން އެ ގެނައި އިސްލާހާއެކު ރައްޔިތުންގެ ވޯޓަކާ ނުލައި ރައްޔިތުންގެ އާންމު ވޯޓުން ރައްޔިތުން ގެނައި 3 ބާރު ވަކިވެފައިވާ ރިޔާސީ ނިޒާމު ފުނޑާލައި، މުޅި ދައުލަތް އެ މަހާލީ ރައީސުލްޖުމްހޫރިއްޔާގެ މުށަށް ކަމަށެވެ.

“ސަރުކާރު ޖަވާބުދާރީ ކުރުވުމުގެ ދައުރު ގެއްލި މަޖިލިސް ވާކޮށްލީ!“

ސަރުކާރުން ގާނޫނުއަސާސީއަށް ގެނައި އިސްލާހާ ގުޅިގެން ކެންދޫ ދާއިރާގެ ކުރީގެ މެންބަރު ޢަލީ ޙުސައިން އަދި މަޝްހޫރު ގާނޫނީ ވަކީލު ރައްޔިތުންގެ މަޖިިލީހުގެ މެންބަރުންގެ މިނިވަންކަން ކަށަވަރުވެފައި އޮތުމަކީ ގާނޫނުއަސާސީގެ އެެންމެ އަސާސީ އެއް ސިފަ ކަމަށެވެ. އަދި އެއީ ހެޔޮ ރިޔާސީ ނިޒާމެއް ހިންގުމަށް ހަމަކޮންމެހެން ލާޒިމު ކަމަކަށްވާއިރު، މެންބަރުންގެ މިނިވަންކަން ގެއްލޭ ގޮތަށް ގާނޫނުއަސާސީ ބަދަލުކުރުން ވެސް ގާނޫނުއަސާސީއާ ޚިލާފުވާނެ ކަމަށެވެ.

އަދި ގާނޫނުއަސާސީއަށް ގެނައި އިސްލާހު މިހާރު ރައްޔިތުންގެ މަޖިލީހަށް ހޮވިފައިވާ މެންބަރުންގެ މައްޗަކަށް ނުހިނގާނެ ކަމަށާއި، ފަހުން ހެދި ގާނޫނެއް ކުރިން ހިނގާފައިވާ ކަމަކަށް ނުވަތަ މާކުރިން މަޖިލީހަށް ހޮވިފައިވާ ބައެއްގެ މައްޗަށް ރެޓްރޮސްޕެކްޓިވްކޮށް ތަޠުބީޤެއް ނުކުރެވޭނެ ކަމަށް ވެސް ޢަލީ ޙުސައިން ވިދާޅުވިއެވެ.