ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ވީހާވެސް އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫއު އިފުތިތާހުކޮށްފިއެވެ.

މި މަޝްރޫއު އިފުތިތާހުކޮށްދެއްވާފައިވަނީ މިކަމަށް ޚާއްސަކޮށް، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޖަލްސާއެއްގައި
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.

މި މަސައްކަތުގެ ދަށުން މާލެ ސިޓީގެ ހުރިހާ ސަރަހައްދެއްގެ އިތުރުން ލ.އަތޮޅާއި ދ.އަތޮޅަށް މި މަސައްކަތް ވަނީ ފުޅާކޮށްފައެވެ.

އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ.ކުޑަހުވަދޫ، ލ.ފޮނަދޫއިން ޕާސްޕޯޓުގެ ޚިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފަށާފައެވެ.

މީގެއިތުރުން އައިޑީކާޑުގެ ޚިދުމަތް މާލެ ސިޓީގެ ހުރިހާ ސަރަހައްދެއްގެ އިތުރުން ހދ.އަތޮޅަށް ވަނީ ފުޅާކޮށްފައެވެ. އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެއާއި، ކުޅުދުއްފުށީ ސިޓީއިން އައިޑީ ކާޑުގެ ޚިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފަށާފައެވެ.

މިއަދު ބޭއްވި ޖަލްސާގައި ވަނީ އައިޑީ ކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަގުޗާޓު ވެސް ހިއްސާކުރައްވާފައެވެ.

އެ މަގުޗާޓުގައި ވަނީ 2025 ވަނަ އަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައިވެސް ކަނޑައެޅޭ ވަކި ސަރަހައްދުތަކުގައި މި ޚިދުމަތްތައް ގާއިމުކުރުމަށް ނިންމާފައެވެ.

އެގޮތުން މި މަހުގެ ނިޔަލަށް ދ.ކުޑަހުވަދޫ އާއި ހދ. ކުޅުދުއްފުށީގައި މި ޚިދުމަތް ގާއިމުކުރުމަށާއި، އަންނަ ފެބްރުއަރީ މަހުގެ ނިޔަލަށް ހދ.މަކުނުދޫގައި ޚިދުމަތް ގާއިމުކުރުމަށާއި، މާރިޗުމަހުގެ ނިޔަލަށް ގދ.ތިނަދޫ އަދި ގދ.ގައްދޫގައި މި ޚިދުމަތް ގާއިމުކުރުމަށާއި، އެޕްރިލް މަހުގެ ނިޔަލަށް އައްޑޫ ސިޓީގެ ހިތަދޫ އާއި ހުޅުމީދޫގައްޔާއި ފުވައްމުލައް ސިޓީގައި މި ޚިދުމަތް ގާއިމުކުރަން ވަނީ ކަނޑައަޅާފައެވެ.

މީގެއިތުރުން އަންނަ އަހަރުގެ މޭމަހުގެ ނިޔަލަށް ހއ.ދިއްދޫ، ހއ. އިހަވަންދޫ، ރ.އުނގޫފާރު އަދި ރ.އަލިފުށީގައި މި ޚިދުމަތް ގާއިމުކުރުމަށާއި، ޖޫންމަހުގެ ނިޔަލަށް، ށ.މިލަންދޫ އާއި ށ.ފުނަދޫ އާއި ލ.ފޮނަދޫގައި މި ޚިދުމަތް ގާއިމުކުރުމަށާއި، ޖުލައި މަހުގެ ނިޔަލަށް ނ.ވެލިދޫ އާއި ތ.ވޭމަންޑޫގައި މި ޚިދުމަތް ގާއިމުކުރުމަށާއި، އޯގަސްޓު މަހުގެ ނިޔަލަށް އދ.މަހިބަދޫ އާއި ބ.ދަރަވަންދޫގައި މި ޚިދުމަތް ގާއިމުކުރުމަށް ވަނީ ނިންމާފައެވެ. އަދި ސެޕްޓެމްބަރު މަހުގެ ނިޔަލަށް ޅ.ނައިފަރު އަދި ފ.ނިލަންދޫގައި، އޮކްޓޯބަރ މަހުގެ ނިޔަލަށް، މ.މުލި އަދި އއ.ރަސްދޫގައި ނޮވެމްބަރު މަހުގެ ނިޔަލަށް ވ.ފެލިދޫ، ކ.ތުލުސްދޫ އަދި ކ.ގުރައިދޫގައި މި ޚިދުމަތް ގާއިމުކުރުމަށް ވަނީ ހަމަޖެހިފައެވެ.