ގެދޮރުވެރިޔާ ސްކީމްގެ ދަށުން ހުޅުމާލޭގައި އިމާރަތްކުރަން ފަށާފައިވާ 4,000 ފުލެޓު ލިބޭ މީހުންގެ ލިސްޓު އާންމުކުރުން ފަސްކޮށްފިއެވެ.
ހައުސިންގ މިނިސްޓްރީން އެންމެ ފަހުން ބުނެފައި އޮތީ މިއަދު ފުލެޓް ލިސްޓް އާންމުކުރާނެ ކަމަށެވެ.
ހައުސިންގ މިނިސްޓްރީން މިއަދު ނެެރުނު ބަޔާނެއްގައި ބުނީ ގެދޮރުވެރިޔާ ސްކީމުގެ އުސޫލުގެ ދަށުން ހުށަހަޅާފައިވާ 20,697 އެޕްލިކޭޝަން ފޯމް ބެލުމުގައި ކަށަވަރުކުރަންޖެހޭ ގިނަ ކަންތައްތަކެއް ހުރުމާ ގުޅިގެން މި މަސައްކަތް ނިންމަން އިތުރު ވަގުތު ބޭނުންވާތީ، މި ސްކީމްގެ ވަގުތީ ލިސްޓާއި ރީ-އިވެލުއޭޝަނާ ގުޅިގެން ކުރިއަށްގެންދެވުނު މަސައްކަތްތަކުގެ ތަފުސީލުތައް މި މަސައްކަތްތައް ނިމުނުހައި އަވަހަކަށް އާންމުކުރާނެ ކަމަށެވެ.
މިނިސްޓްރީން ބުނީ މި މަސައްކަތައް އިތުރު މުއްދަތު ދިންކަމުގައި ވިޔަސް، ސަރުކާރުގެ މަގުސަދަކީ މި ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގު ގެއްލިގެން ނުދާނެކަން ކަށަވަރުކުރުމާއެކު މި ސްކީމުގެ ދަށުން ތަރައްގީކުރާ ފްލެޓްތައް ދޫކުރެވޭނީ ހައްގުވެރިން ކަމަށް ޔަގީންކުރުން ކަމަށެވެ.
ގެދޮރުވެރިޔާ ސްކީމްގެ ދަށުން ދޫކުރާ ފުލެޓުތައް ހަވާލުކުރުން ލަސްވީ، މި ސްކީމުގެ ދާއިމީ ލިސްޓު އެކުލަވައިލުމުގައި ކުރީ ސަރުކާރުން ގޯސްތަކެއް ހަދާފައި ހުރިކަމަށް ތުހުމަތުކޮށް، އާންމު ފަރާތަކުން އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހެޅުމާ ގުޅިގެންނެވެ.
އެ މައްސަލަ ބެލުމަށްފަހު އޭސީސީއިން ބުނެފައިވަނީ ފްލެޓްތައް ދޫކުރުމުގައި ކުރީ ސަރުކާރުން ގޯސްތަކެއް ހަދާފައިވާ ކަމަށެވެ.
