އެމެރިކާގެ ރައީސް ޖޯ ބައިޑެންގެ ނެޝަނަލް ސެކިއުރިޓީ އެޑްވައިޒަރ ވިދާޅުވެފައިވާ ގޮތުގައި، އަންނަ ބުދަ ދުވަހު ބޭއްވުމަށް ހަމަޖެހިފައިވާ ޓްރާންސިޝަން ބައްދަލުވުމުގައި، އިންތިޚާބުވެފައިވާ ރައީސް ޑޮނަލްޑް ޓްރަމްޕަށް ޔުކްރެއިންއަށް ދެމުންދާ އެހީތެރިކަން ކުރިއަށް ގެންދިއުމަށް ބާރުއަޅުއްވާނެކަމަށް ވިދާޅުވެއްޖެއެވެ.

ޖޭކް ސަލިވަން ސީބީއެސް ނިއުސްއަށް ދެއްވި އިންޓަވިއުއެއްގައި ވިދާޅުވި ގޮތުގައި، ޔޫރަޕްގެ ސަލާމަތަށްޓަކައި ޔުކްރެއިންއަށް އެހީތެރިވުން މުހިންމުކަން ޓްރަމްޕަށް ބައިޑެން ވިދާޅުވެދެއްވާނެއެވެ. ބައިޑެންގެ ވެރިކަމުގައި، އެމެރިކާއިން ޔުކްރެއިންއަށް 174 ބިލިއަން ޑޮލަރުގެ އެހީތެރިކަން ވަނީ ފޯރުކޮށްދީފައެވެ.
އެހެންނަމަވެސް، ޓްރަމްޕް ވަނީ ޔުކްރެއިންއަށް ދެމުންދާ އެހީތެރިކަމާމެދު ފާޑުކިޔުއްވާފައެވެ. އަދި އެމަނިކުފާނު ވެރިކަމަށް ވަޑައިގަތުމުން ”އެންމެ ދުވަހެއްގެ ތެރޭގައި“ ހަނގުރާމަ ނިންމަވާލައްވާނެ ކަމަށް ވިދާޅުވެފައިވެއެވެ. މިކަން ކުރެއްވުމަށް، ޔުކްރެއިންއިން ބައެއް ސަރަޙައްދުތައް ދޫކޮށްލަން ޖެހިދާނެ ކަމަށް ޓްރަމްޕް ވިދާޅުވެފައިވެއެވެ.
ބައިޑެންގެ އިދާރާއިން މިހާރު މަސައްކަތް ކުރައްވަމުން ގެންދަވަނީ، ޖެނުއަރީގައި ޓްރަމްޕް ވެރިކަމާ ހަވާލުވުމުގެ ކުރިން، ބާކީ އޮތް 6 ބިލިއަން ޑޮލަރުގެ އެހީތެރިކަން ޔުކްރެއިންއަށް ފޯރުކޮށްދިނުމަށެވެ. މި ބައްދަލުވުމުގައި، ޔުކްރެއިންގެ މައްސަލައާއި އެހެނިހެން ބައިނަލްއަޤްވާމީ މައްސަލަތަކާ ބެހޭގޮތުން ދެ ރައީސުން މަޝްވަރާކުރައްވާނެއެވެ.
ހަނގުރާމައިގެ ކުރިމަގާމެދު ކަންބޮޑުވުން އޮތުމާއެކު، ޔުކްރެއިންގެ ރައީސް ވޮލޮޑިމިރް ޒެލެންސްކީ އަދި ޖަރުމަނުގެ ޗާންސެލަރ އޯލަފް ޝޯލްޒް ވަނީ ޓްރަމްޕާ ވާހަކަދައްކަވާފައެވެ. ޔުކްރެއިންއަށް ދެމުންދާ އެހީތެރިކަން ހުއްޓާނުލުމަށް އެދި، ޔޫރަޕްގެ ނޭޓޯ މެންބަރު ޤައުމުތަކުން ވެސް ވަނީ އިންތިޚާބުވެފައިވާ ރައީސް ޓްރަމްޕާ ވާހަކަދައްކަން މަސައްކަތް ފައްޓާފައެވެ.