އިސްރާއީލުގެ ޙަމަލާތަކުގައި ފަލަސްތީނުގެ 14 މީހުން މަރުވެއްޖެއެވެ.
ޣައްޒާގެ ސިވިލް ޑިފެންސް އޭޖެންސީން ހޮނިހިރު ދުވަހު ބުނި ގޮތުގައި އިސްރާއީލީ ވައިގެ ޙަމަލާތަކުގައި މަދުވެގެން 14 ފަލަސްޠީނު މީހުން، އޭގެ ތެރޭގައި އަންހެނުންނާއި ކުޑަކުދިން ހިމެނޭ ގޮތަށް، ރޭގަނޑު މަރުވެފައިވެއެވެ. އިސްރާއީލުގެ ސިފައިން ބުނާ ގޮތުގައި އުތުރު ސަރަޙައްދުން ގިނަ އަދަދެއްގެ ހަނގުރާމަވެރިން މަރާލެވުނެވެ.
ޚާން ޔޫނިސްގެ ދެކުނު ސަރަޙައްދުގައި ހުރި ނަޤިލުވެފައިވާ ފަލަސްޠީނުން ތިބި ޓެންޓުތަކަކަށް އެއްލި ވައިގެ ޙަމަލާއެއްގައި މަދުވެގެން 9 މީހުން މަރުވެފައިވާ ކަމަށް ސިވިލް ޑިފެންސްގެ ތަރުޖަމާން މަޙްމޫދު ބައްސާލް އޭއެފްޕީއަށް ބުންޏެވެ.
ފަލަސްޠީނު ރެޑް ކްރެސެންޓުންވެސް މި އަދަދު ކަށަވަރުކޮށް، އިތުރު 11 މީހުން ޙަމަލާގައި ޒަޚަމްވެ ނާޞިރު ހޮސްޕިޓަލަށް ގެންދެވުނު ކަމަށް ބުންޏެވެ.
ދެވަނަ ވައިގެ ޙަމަލާއެއްގައި 5 މީހުން މަރުވެ، 22 މީހުން ޒަޚަމްވިއެވެ. މިއީ ”އިސްރާއީލީ ހަނގުރާމަ މަތިންދާބޯޓުތަކުން ފަހަދު އަލް-ސަބާހް ސްކޫލަށް“ އެއްލި ޙަމަލާއެކެވެ. މި ސްކޫލަކީ ”ހާސްތަކެއް ނަޤިލުވެފައިވާ މީހުން“ ތިބި ހިޔާވަހިކަމެއްގެ ގޮތުގައި ބަދަލުކުރެވިފައިވާ ތަނެކެވެ. މިއީ ޣައްޒާ ސިޓީގެ އަލް-ޠުއްފާހް ސަރަޙައްދުގައި ހިނގި ކަމެއް ކަމަށް ބައްސާލް ބުންޏެވެ.
މަރުވެފައިވާ މީހުންނާއި ޒަޚަމްވެފައިވާ މީހުން ގެންދެވުނީ އަލް-އަހްލީ ޢަރަބް ހޮސްޕިޓަލަށެވެ.
ފާއިތުވި މަސްތަކުގައި، ފަލަސްޠީނު ހަނގުރާމަވެރިން ޙަރަކާތްތެރިވާ ކަމަށް އިސްރާއީލުން ބުނާ ހިޔާވަހިކަމުގެ ގޮތުގައި ބަދަލުކުރެވިފައިވާ އެތައް ސްކޫލަކަށް ސިފައިން ވަނީ ޙަމަލާދީފައެވެ.
އެއާއެކު، އިސްރާއީލީ ސިފައިން ބުނާ ގޮތުގައި އުތުރު ޣައްޒާގެ ޖަބާލިޔާ ސަރަޙައްދުން ”ގިނަ އަދަދެއްގެ ޓެރަރިސްޓުން“ މަރާލެވުނެވެ. މިއީ ޙަމާސް އަލުން އެއްވެ ނުތިބުމަށް މަހަށްވުރެ ގިނަ ދުވަސްވަންދެން ހިންގަމުންދާ ފުޅާ ވައިގެ އަދި އެއްގަމުގެ އޮޕަރޭޝަނެއްގެ ބައެކެވެ.
އިސްރާއީލީ ސިފައިންވެސް ޣައްޒާގެ ދެކުނު ސަރަޙައްދު ރަފާހްގައި އެތައް ހަނގުރާމަވެރިންނެއް މަރާލި ކަމަށް އިތުރުކޮށްފައިވެއެވެ.
މިވަގުތު ސިފައިން ވަނީ ދެ ކޮޅަކުން ހަނގުރާމައެއްގައި ބައިވެރިވެފައެވެ. އެއީ ލުބުނާނުގައި ހިޒްބުއްލާއާ އެކު އަދި ޣައްޒާގައި ޙަމާސްއާ އެކުގައެވެ.
ޙަމާސްއާއި ހިޒްބުއްލާ ވަނީ އެމެރިކާ، ޔޫކޭ އަދި އެހެނިހެން ހުޅަނގުގެ ގައުމުތަކުން ޓެރަރިސްޓް ޖަމާޢަތްތަކެއްގެ ގޮތުގައި ކަނޑައަޅާފައެވެ.
”ފާއިތުވި 24 ގަޑިއިރުގެ ތެރޭގައި، އައިއޭއެފް (ވައިގެ ބާރު) އިން ލުބުނާނާއި ޣައްޒާ ސްޓްރިޕްގައި 50 އަށްވުރެ ގިނަ ޓެރަރިސްޓް އަމާޒުތަކަށް ޙަމަލާދީފައިވެއެވެ.“ ސިފައިންގެ ބަޔާނެއްގައި ބުނެފައިވެއެވެ.
”ޙަމަލާދެވުނު އަމާޒުތަކުގެ ތެރޭގައި ސިފައިންގެ އިމާރާތްތަކާއި، ހަތިޔާރު ރައްކާކުރާ ތަންތަނާއި އަދި ލޯންޗަރުތައް ހިމެނެއެވެ.“ އެ ބަޔާނުގައި އިތުރުކޮށްފައިވެއެވެ.
އިސްރާއީލުގެ ޣައްޒާގެ ހަނގުރާމަ ފެށުނީ 2023 އޮކްޓޯބަރ 7 ގައި ޙަމާސް ހަނގުރާމަވެރިން އިސްރާއީލަށް ޙަމަލާދިނުމަށް ފަހުގައެވެ.
މި ޙަމަލާގައި، ޙަމާސް ހަނގުރާމަވެރިން 1,200 މީހުން މަރާލައި، 250 އާ ގާތްކުރާ އަދަދެއްގެ މީހުން ރަހީނުކުރިއެވެ. މިއީ ޣައްޒާގެ ހަނގުރާމަ ފެށުނު ސަބަބެވެ. އިސްރާއީލުން ބުނާ ގޮތުގައި އަދިވެސް ޙަމާސްގެ އަތުގައި 101 ރަހީނުން ތިބިކަމަށް ޤަބޫލުކުރެވެއެވެ. އޭގެ ތެރެއިން 35 މީހުން މަރުވެފައިވާ ކަމަށް ސިފައިން ބުނެއެވެ.
ޣައްޒާގައި އިސްރާއީލުގެ ޖަވާބީ ޙަމަލާތަކުގައި 43,000 އަށްވުރެ ގިނަ މީހުން މަރުވެފައިވާ ކަމަށް އެ ސަރަޙައްދުގެ ޞިއްޙީ މިނިސްޓްރީން ބުނެއެވެ. މި އަދަދުގައި ހަނގުރާމަވެރިންނާއި އާންމު ރައްޔިތުން ވަކިކޮށްފައެއް ނުވެއެވެ.
