ސީޓު އެއަރ ކާގޯގެ ޚިދުމަތަކީ ކައިރި މުސްތަގުބަލެއްގައި ރާއްޖޭގެ އިގުތިސާދަށް އިތުރަށް ދިރުން ގެނެސްދޭނޭ ސިނާއަތަކަށް ވެގެންދާނެ ކަމަށް އެމްޕީއެލްގެ ސީއީއޯ މުޙައްމަދު ވަޖީހު މިއަދު ވިދާޅުވެއްޖެއެވެ.
ސީޓު އެއަރ ކާގޯގެ ޚިދުމަތަކީ ކަނޑު މަގުން އަންނަ މުދާ، ޓުރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މި މަސައްކަތަކީ ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ އަދި މި މަސައްކަތުން އެ ގައުމު ތަކުގެ އިގުތިސާދަށް ބޮޑެތި މަންފާތަކެއް ހޯދަމުން އަންނަ މަސައްކަތެއްކަން ވަޖީހު ފާހަގަކުރެއްވިއެވެ.
ރާއްޖޭގައި ސީޓު އެއަރ ކާގޯގެ ޚިދުމަތް ފެށުމުގެ ގޮތުން މިދިޔަ މާޗު މަހުގައި އެމްޕީއެލްއިން ފުރަތަމަ ފަހަރަށް އެއްބަސްވުމެއްގައި ސޮއިކޮށްފައިވަނީ ޓާކިޝް އެއަރލައިނާއެކުއެވެ. އެއަށްފަހު ފުރަތަމަ ކާގޯ ޝިޕުމެންޓު ފޮނުވައިލީ މެއި މަހުގައެވެ.
ފޭސްބުކްގައި ކުރެއްވި ޕޯސްޓެއްގައި ވަޖީހު ވިދާޅުވީ މިވަގުތު ރާއްޖެއިން ބޭރު ކުރެވޭ މުދަލަކީ ބަނގްލަދޭޝްގައި އުފައްދާ އަންނައުނުގެ ބާވަތްތައް ކަމަށެވެ. އަދި ބަނގްލަދޭޝްގެ ގާމެންޓު އިންޑަސްޓްރީގެ ބޮޑު ޕަސެންޓޭޖެއް ވައިގެ މަގުން ފޮނުވަނީ ޔޫރަޕުގެ ގައުމު ތަކަށް ކަމަށާއި، މިހާތަނަށް މި މުދަލުގެ ބޮޑު ބައެއް ދުނިޔޭގެ އެކި ގައުމު ތަކަށް ގޮސްފައިވަނީ، އިންޑިޔާ އާއި، ސްރީލަންކާ މެދުވެރިކޮށް ކަމަަށް ވަޖީހު ވިދާޅުވިއެވެ.
ވަޖީހު ވިދާޅުވީ ރާއްޖޭގައި މި ޚިދުމަތް ފެށި ފަހުން މިކަމަށް ލިބޭ ތަރުހީބު ބޮޑުވެ، މިވީ ކުޑަ ދުވަސްކޮޅު ތެރޭގައި މި ޚިދުމަތުގެ ޑިމާންޑު ވަރަށް ބޮޑަށް އިތުރުވެފައި ކަމަށެވެ.
އެގޮތުން ނިމިދިޔަ އޮކްޓޯބަރ މަހު އެކަނިވެސް، 96 ކޮންޓެއިނަރ (418 ޓަނުގެ މުދާ /34946 ދާގީނާ) ގެ މުދާ ވައިގެ މަގުން ރާއްޖެއިން ބޭރަށް ފޮނުވާފައިވާ ކަމަށާއި، މި މަސައްކަތުގައި މިވަގުތު ރާއްޖެ އަށް ދަތުރުކުރާ 7 އެއަރ ލައިނަރ އަކުން ބައިވެރިވި ކަމަށް ވަޖީހު ވިދާޅުވިއެވެ.
ވަޖީހު ވިދާޅުވީ ރާއްޖޭގައި މި ޚިދުމަތް ފުޅާވެ، މިކަމުގެ ޑިމާންޑު ބޮޑުވަމުންދާތީ މި ވިޔަފާރީގައި އުޅޭ މި ސަރަހައްދުގެ ބައެއް ގައުމުތައް ކަންބޮޑުވާން ފަށާފައިވާ ކަމަށެވެ.
މީގެއިތުރުން ވަޖީހު ވިދާޅުވީ ރާއްޖޭގައި މި ޚިދުމަތް އިތުރަށް ފުޅާކޮށް، ކަސްޓަމަރުންގެ އިތުބާރު ހޯދުމަށް ކުރަމުންދާ މަސައްކަތްތަކުގެ ތެރެއިން ދާދިފަހުން އެމްޕީއެލްގެ ޓީމަކާއި، މި މަސައްކަތުގައި އިސްކޮށް އުޅުއްވާ، އެއްފަރާތް ކަމަށްވާ، އިނަރ މޯލްޑިވްސްގެ ވެރިޔާ މުޙައްމަދު ފިރާޤާއެކު ބަނގްލަދޭޝްގެ ޗިޓަގޮންގ އަށް ޒިޔާރަތްކޮށް ބަނގްލަދޭޝްގެ ގާމެންޓު ފެކްޓަރީތަކުގެ ވެރިންނާއެކު މަޝްވަރާކޮށްފައިވާ ކަމަށެވެ. އަދި މި މަޝްވަރާތަކުން އެނގިގެންދިޔަ މުހިންމު އެއްކަމަކީ މިކަން ރަނގަޅަށް ކުރެވޭ ގޮތް ވެއްޖެނަމަ މަހެއްގެ މައްޗަށް 400 އަށްވުރެ ގިނަ ކޮންޓެއިނަރ ގެ މުދާ ކަނޑު މަގުން ރާއްޖެ ގެނެސް، ވައިގެ މަގުން ދުނިޔޭގެ އެކި ގައުމު ތަކަށް ފޮނުވުމުގެ ފުރުސަތު އޮތްކަން ކަމަށް ވަޖީހު ވިދާޅުވިއެވެ.
މިކަމަށްޓަކައި، (ކޮންޓއިނަރ ތައް ރާއްޖެ ގެނައުމަށްޓަކައި) ރާއްޖެއަށް ދަތުރު ކުރާ ޝިޕިންގ ލައިންތަކާއެކު ވާހަކަ ދެކެވެމުންދާ ކަމަށާއި، މި މަސައްކަތަށް ބޭނުންވާ މެޝިނަރީތަކާއި އިކުއިޕްމެންޓުސްތައް ހަމަކޮށް، ކަސްޓަމަރުން ހިތްހަމަޖެހޭފަދަ ޚިދުމަތްތަކެއް ފޯރުކޮށްދެވޭތޯ ވަރަށް ބޮޑަށް މަސައްކަތް ކުރެވެމުންދާ ކަމަށް ވެސް ވަޖީހު ވިދާޅުވިއެވެ.
މިއީ ކައިރި މުސްތަގުބަލެއްގައި ރާއްޖޭގެ އިގުތިސާދަށް އިތުރަށް ދިރުން ގެނެސްދޭނޭ ސިނާއަތަކަށް ވެގެންދާނެ ކަމަށް ވެސް ވަޖީހު ވިދާޅުވިއެވެ.
One Response
ކަލޯ ތިޔައިން ސީދާ ގައުމަށް ވަތް ރުފިޔާގެ ތަފްސީލުތައްވެސްދިނީމަދޯ އަހަރެމެންނަށް އެނގޭނީ ތިވާ ފައިދާއެއްވެސް. އެއާއަރލައިންތައް އެކަމާ އުޅޭނެތާ އެމީހުންނަށްވިއްޔާ ތިކަމުން ބޮޑުފައިދާއެއް އޮތީ. އެމް.ޕީ.އެލް އާއި އެމް.އޭ.ސީ.އެލް ގެ ހެންޑްލިންގް ޗާޖާއި ލޯކަލް އޭޖޭންޓުގެ ފައިސާ މީގެއިން ލިބެނީމި. ލޮޖިސްޓިކްސްގައިވެސް ލަންކާ ކުންފުނިތައް ފައިދާ ނަގަނީ. މީހާގެ ފޮޓާ ޖަހާފަ އިރުއިރުކޮޅާ ތިވާހަކަ ހިފައިގެން އަރަންޔާ ތިޔަކަމަކުން ގައުމެއްގެ ނިސްބަތުން ލިބުން އާމްދަނީގެ ތަފްސީލު ކިޔާލަބަލަ.