ބޭންކް އޮފް މޯލްޑިވްސް (ބީއެމްއެލް) ގެ ޗީފް އެގްޒެކްޓިވް އޮފިސަރު (ސީއީއޯ) ގެ މަގާމަށް މުޙައްމަދު
ޝަރީފް އައްޔަންކޮށްފިއެވެ.
ބީއެމްއެލްއިން މިއަދު ބުނީ ޝަރީފް މަގާމާ ހަވާލުވެވަޑައިގަންނަވާނީ މާދަމާއިން ފެށިގެން ކަމަށެވެ.
ބޭންކުގެ މި ނިންމުމާއެކު ޝަރީފަކީ ބީއެމްއެލްގެ ފުރަތަމަ ދިވެހި ސީއީއޯއެވެ.
ބީއެމްއެލްއިން ބުނީ މިއީ ބޭންކަށާއި ދިވެހިރާއްޖޭގެ މާލީ ދާއިރާއަށްވެސް ހާސިލު ކުރެވުނު މުހިންމު ލަނޑުދަނޑިއެއް ކަމަށެވެ.
މާލީ ދާއިރާގައި 25 އަހަރަށްވުރެ ދިގު މުއްދަތެއްގެ ތަޖުރިބާ ހޯއްދަވާފައިވާ ޝަރީފް ވަނީ އެގްޒެކްޓިވް އަދި ބޯޑު ލެވަލްގައި 7 އަހަރަށްވުރެ ދިގު މުއްދަތެއްގެ ތަޖުރިބާ ހޯއްދަވާފައެވެ.
ޝަރީފަކީ އިނގިރޭސިވިލާތުގެ ޔުނިވަރސިޓީ އޮފް މެންޗެސްޓަރ އިން އެމްބީއޭ ހާސިލު ކުރައްވާފައިވާ އަދި ލަންޑަން ބިޒްނަސް ސްކޫލް އިން ސީއީއޯ އިންނާއި
ސީނިއަރ އެގްޒެކްޓިވުންނަށް ފަރުމާކޮށްފައިވާ ’ސީނިއަރ އެގްޒެކްޓިވް ޕްރޮގްރާމް‘ ފުރިހަމަ ކުރައްވާފައިވާ ބޭފުޅެކެވެ.
ޝަރީފް ވަނީ 2018 އިން 2020 އަށް އޭޝިއަން ބޭންކަރސް އެސޯސިއޭޝަންގެ ވައިސް ޗެއަރމަންގެ މަގާމް ވެސް އަދާކުރައްވާފައެވެ.
