ތިނަދޫ ސިޓީގައި ހުންނަ ޑިޓޮކްސް ސެންޓަރުން ދެމުން ގެންދާ ޚިދުމަތްތައް އިތުރަށް ހަރުދަނާ ކުރުމާ ގުޅޭ ގޮތުން މަޝްވަރާކޮށްފިއެވެ.
މި މަޝްވަރާތައް ކުރިއަށްދިޔައީ ނޭޝަނަލް ޑްރަގް އެޖެންސީ (އެންޑީއޭ) ގެ ބޯޑުގެ ނުވަވަނަ ބައްދަލުވުމުގައެވެ.
މި ބައްދަލުވުމާ ގުޅޭ މައުލޫމާތު ހިއްސާކޮށް ހޯމް މިނިސްޓްރީން މިއަދު ބުނީ މި ބައްދަލުވުމުގައި ތިނަދޫ ޑިޓޮކްސް ސެންޓަރުން ދެމުން ގެންދާ ޚިދުމަތްތައް އިތުރަށް ހަރުދަނާ ކުރުމާ ގުޅޭ ގޮތުންނާއި، ޕްރޮގްރާމްތަކަށް ފެސިލިޓޭޓަރުންނަށް ލައިސަންސް ދޭނެ މިންގަނޑެއް ކަނޑައެޅުމަށް މަޝްވަރާކުރައްވާފައިވާ ކަމަށެވެ. އަދި ޑްރަގް ކޯޓާއި ސީއެސްސީއާއެކު ކުރަންޖެހޭ މުހިންމު ކަންކަމާ ގުޅޭ ގޮތުން ވެސް މަޝްވަރާ ކުރުމަށް ބޯޑުން ނިންމަވާފައިވާ ކަމަށެވެ.
ހޯމް މިނިސްޓްރީން އިތުރަށް ބުނީ ސަރުކާރުން އެންޑީއޭގެ މަސައްކަތަށް އަދި މަސްތުވާތަކެތީގެ ފަރުވާދޭ ނިޒާމްތައް ހަރުދަނާކުރުމަށްޓަކައި ކުރާ ހޭދަ އެތަކެއް ގުނައެއް އިތުރުކޮށްފައިވާ ކަމަށެވެ.
ހޯމް މިނިސްޓްރީން މިހާރު ވަނީ ގދ.އަތޮޅުގައި ހިމެނޭ 8 ރަށު ކައުންސިލާއި ތިނަދޫ ސިޓީ ކައުންސިލާއެކު އެމްއޯޔޫއެއްގައި ސޮއިކޮށްފައެވެ.
މި އެމްއޯޔޫތަކުގެ މަގުސަދަކީ ކުށް މަދުކުރުމަށް ކުރަންޖެހޭ މަސައްކަތް ދެނެގަތުމަށާއި، ރަށުގެ ސަލާމަތާއި ރައްކާތެރިކަމުގެ ހާލަތާއި ގުޅޭގޮތުން ދާޚިލީ ވުޒާރާއަށް ލަފާއަރުވައި، ރަށުގެ ކުށްމަދުކުރުމަށް އެ ރަށެއްގައި މާހައުލުގައި ހިމެނޭ ފަރާތްތަކާއިއެކު މަސައްކަތް ކުރުމަށް ކޮމެޓީތަކެއް އެކުލަވާލުމެވެ. މި ކޮމެޓީތައް ހޯމް މިނިސްޓްރީއާއެކު މަސައްކަތް ކުރަމުންދާއިރު ކޮމެޓީތަކުގެ މަސައްކަތް ވިލަސްރެސް ކުރާނީ ކައުންސިލްތަކުގެ ބެލުމުގެ ދަށުންނެވެ.
