މަސްވެރިން މިފްކޯއަށް ކިރުވި މަހަށް ޖަމާކުރަންޖެހޭ ފައިސާގެތެރެއިން މިއަދު 17 މިލިއަން ޖަމާކުރާނެ ކަމަށް އެ ކުންފުނިން ބުނެފިއެވެ.
މިފްކޯއިން މިދިޔަ ބުރާސްފަތި ދުވަހު ބުނީ މި މަހުގެ ކުރީކޮޅުން ފެށިގެން މަސްއޮޑިފަހަރުގެ ޕެންޑިންގ ބިލްތަކާ ގުޅޭގޮތުން ފިޝަރީޒް މިނިސްޓްރީއާއި ފިނޭންސް މިނިސްޓްރީއާއި އެ ކުންފުންޏާ ދެމެދު މަޝްވަރާކޮށްގެން މިވަގުތަށް ހައްލުތަކެއް ހޯދިފައިވާ ކަމަށެވެ. އަދި ސަރުކާރުން ދަނީ ކެނޑިނޭޅި މިފްކޯއަށް ދޭންޖެހޭ ސަޕޯޓު ފޯރުކޮށްދެމުން ކަމަށެވެ.
ސަރުކާރުގެ އަމާޒަކީ މި ފައިސާ މި ހަފްތާގެ ނިޔަލަށް އެއްކޮށް ދައްކާ ޚަލާސްކުރުން ކަމަށް ވެސް މިފްކޯއިން އެ ދުވަހު ބުނެފައިވެއެވެ.
މިފްކޯއިން މިއަދު ވަނީ މަސްވެރީން މިފްކޯއަށް ކިރާފައިވާ މަހުގެ ފައިސާގެ އެންމެ ފަހުގެ ތަފްސީލު އާންމުކޮށްފައެވެ.
އެގޮތުން 24 އޮގަސްޓުން 25 ސެޕްޓެމްބަރު މަހުގެ ނިޔަލަށް މިފްކޯއަށް ކިރުވި މަހުގެ ޖުމްލަ އަގަކީ 17,350,903 ރުފިޔާ ކަމަށް މިފްކޯއިން ބުންޏެވެ.
މިފްކޯއިން ބުނީ ސަރުކާރުގެ އެހީތެރިކަމާއެކު މި ފައިސާ އެއްކޮށް އޮޑިވެރީންނަށް މިއަދު ޖަމާވަމުންދާނެ ކަމަށެވެ.
