އެކުވެރި ދައުލަތްތަކުގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، ރައީސް ޑރ. މުޙައްމަދު މުޢިއްޒު އެމެރިކާގެ ނިއުޔޯކުން ފުރާވަޑައިގެންފިއެވެ.

އދ. ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށްޓަކައި، ރައީސް ޑރ. މުޢިއްޒު، އެމެރިކާގެ ނިއުޔޯކަށް ފުރާވަޑައިގަތީ މި މަހުގެ 20 ވަނަ ދުވަހުގެ ރޭ، އިރާކޮޅުގެ ވަގުތެއްގައެވެ. މިއީ އެމަނިކުފާނު އދ. ގެ އާންމު މަޖިލީހުގައި ބައިވެރިވަޑައިގެންނެވި ފުރަތަމަ ފަހަރެވެ.

މި ދަތުރުފުޅު ނިންމަވާލެއްވުމަށްފަހު ރައީސް ފުރާވަޑައިގަތީ މިއަދުގެ ވަގުތެއްގައެވެ.

މި ދަތުރުފުޅުގައި ރައީސް ވަނީ ޔޫއެންޖީއޭ 79 ގެ ޖެނެރަލް ޑިބޭޓް، ނުވަތަ ގައުމުތަކުގެ އެންމެ އިސްވެރިންގެ ބައްދަލުވުމުގައި ތަގުރީރު ކުރައްވާފައެވެ. އެމަނިމުފާނު ވަނީ އދ. ގެ ސަލާމަތީ މަޖިލީހުގައި ވެސް ތަގުރީރު ކުރައްވާފައެވެ.

މީގެއިތުރުން ރައީސް ވަނީ، ޔޫއެންޖީއޭ 79 ވަނަ ސެޝަންގައި ބައިވެރިވެ ވަޑައިގެންނެވުމަށް ނިއުޔޯކަށް ވަޑައިގެންނެވި އެކި ވަފުދުތަކުގެ އެންމެ އިސްވެރިންނާ ބައްދަލު ކުރައްވައި މަޝްވަރާތައް ވެސް ކުރިއަށް ގެންދަވާފައެވެ. އެގޮތުން އެމަނިކުފާނު ވަނީ، އދ. ގެ ސެކްރެޓަރީ ޖެނެރަލް، އެންޓޯނިއޯ ގުޓޭރޭޒްއާ ވެސް ބައްދަލު ކުރައްވާފައެވެ.

މި ދަތުރުފުޅުގައި ރައީސް ވަނީ ނިއުޔޯކްގައި ދިރިއުޅެމުންދާ ދިވެހިންނާ ވެސް ބައްދަލު ކުރައްވާފައެވެ.

މީގެއިތުރުން މި ދަތުރުފުޅުގައި ރައީސް ވަނީ ”ޑީންސް ލީޑަރޝިޕް ސީރީޒް“ގެ ދަށުން، ޕްރިންސްޓަން ޔުނިވަރސިޓީގެ ޕްރިންސްޓަން ސްކޫލް އޮފް ޕަބްލިކް އެންޑް އިންޓަރނޭޝަނަލް އެފެއަރޒްގައި ތަގުރީރު ކުރައްވާފައެވެ. އަދި ނިއުޔޯކްގައި ހުންނަ ގޫގްލްގެ މައި އޮފީހަށް ވެސް ޒިޔާރަތް ކުރެއްވިއެވެ.