ތަފާތު ދާއިރާތަކުން ގައުމުގެ ތަރައްގީއަށް ޒުވާނުން ކުރާ އަގުހުރި މަސައްކަތްތައް ފާހަގަކޮށް، ހިތްވަރުދިނުމުގެ ގޮތުން ދޭ ޒުވާނުންގެ އެވޯޑަށް ނަން ހުށަހެޅުމަށް އަލުން ހުޅުވައިލި ފުރުސަތު އަންނަ ބުރާސްފަތި ދުވަހަށް ހަމަވާނެއެވެ.

ފުރުސަތު ހަމަވާނީ އެ ދުވަހުގެ މެންދުރުފަހު 14:00 އަށެވެ.

ޔޫތު މިނިސްޓްރީން ބުނީ އެވޯޑަށް އެޕްލިކޭޝަން ހުށަހަޅާނީ ގޫގުލްލިންކް ނުވަތަ ޔޫތު މިނިސްޓްރީ (ސޯޝަލްސެންޓަރ) އަށް ކަމަށާއި އެޕްލިކޭޝަން ބަލައިގަތުމަށް ހަމަޖެހިފައިވަނީ ސަރުކާރު ބަންދުނޫން ކޮންމެދުވަހަކު ހެނދުނު 8:30 އިންމެންދުރު 14:00 އަށް ކަމަށެވެ. އަދި ރަށްރަށުން އެޕްލިކޭޝަން ހުށަހަޅާ ފަރާތްތަކުން އެ މިނިސްޓްރީގެ މެއިލް މެދުވެރިކޮށް ކަމަށެވެ.

ކުރިން އެޕްލިކޭޝަން ފުރިހަމަކުރުމަށްފަހު، ހުށަހަޅާފައިވާ ފަރާތްތަކުން އަލުން އެޕްލިކޭޝަން ހުށަހަޅަން ނުޖެހޭނެ ކަމަށް މިނިސްޓްރީން ވަނީ ބުނެފައެވެ.

މިއަހަރު ޒުވާނުންގެ އެވޯޑުގެ ގޮތުގައި ތަފާތު 17 ދާއިރާއަކުން އިނާމު ދިނުމަށް ނޑައަޅާފައިވެއެވެ.

އެ ދާއިރާތަކަކީ:

·ވިޔަފާރިއާއި އިގުތިސާދު

·އާރޓްސް އެންޑް ކަލްޗަރ-ފަންނުވެރިކަމާއި ސަގާފަތް ދިރުވުން

·މަސްތުވާތަކެއްޗާ ދެކޮޅަށް މަސައްކަތްކުރުން

·ދަރުމަވެރިކަން

·ވޮކޭޝަނަލް ޓްރެއިނިންގ-ދަސްކޮށްދިނުން

·ނަފްސާނީ ގޮތުން ދުޅަހެޔޮ ސިއްހަތެއް ބިނާކުރުމަށް މަސައްކަތްކުރުން

·ތިމާވެށި ހިމާޔަތްކުރުމަށް މަސައްކަތްކުރުން

·މަސްވެރިކަމުގެ ދާއިރާ

·ދަނޑުވެރިކަމުގެ ދާއިރާ

·މިންތީގެ ހަމަހަމަކަން ގާއިމުކުރުމަށް މަސައްކަތްކުރުން

·ނުކުޅެދުންތެރިކަން ހުންނަ ފަރާތްތައް ބާރުވެރިކުރުމަށް މަސައްކަތްކުރުން

·ޒުވާނުންގެ ބާރުވެރިކަން އިތުރުކުރުމަށް މަސައްކަތްކުރުން

·ހަށިހެޔޮ ދުޅަހެޔޮ ސިއްހަތެއް ބިނާކުރުމަށް މަސައްކަތްކުރުން

·ދިވެހިބަސް ދިރުވުމަށް މަސައްކަތްކުރުން

·ކުޅިވަރުގެ ދާއިރާއިން އާދަޔާ ޚިލާފު ހުނަރެއް ދައްކާފައިވާ ފަރާތްތައް

·ފަންނިއްޔާތުގެ ދާއިރާ

·ޝަހީދު ޖަވާދު އުމަރުގެ ހަނދާނީ ފިލާ

ޒުވާނުންގެ އިނާމު ދިނުމަކީ ގައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް، ޒުވާނުންނަކީ މުޖުތަމައުއަށް ފައިދާހުރި، އުފެއްދުންތެރި، ޒިންމާދާރު ބަޔަކަށް ހެދުމަށް ބާރުއަޅައި، ވާގިދިނުމުގެ ގޮތުން ދޭ އިނާމެކެވެ.