އަބަދުވެސް މަސައްކަތް ކުރައްވަނީ ދީނާއި ގައުމާއި ރައްޔިތުންގެ މަސްލަހަތު ދަމަހައްޓަވަން ކަމުގައި އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ. ޝަހީމް މިހެން ވިދާޅުވީ އެމަނިކުފާނަށް ފުރައްސާރަކޮށް ފަތުރަމުން ގެންދަނީ ހަގީގަތާއި ޚިލާފު ދޮގު ވާހަކަތަކެއް ކަަމަށް ބުނެ, އެކަން އެންމެ ހަރުކަށި އިބާރާތުން ކުށްވެރިކޮށް, ސަރުކާރު ހިންގާ ޕީއެންސީން ނެރުނު ބަޔާނާ ގުޅިގެން އެކަމަަށް ޝުކުރު އަދާކުރައްވައި އެކްސްގައި ކުރެއްވި ޕޯސްޓެއްގައެވެ.
އިސްލާމިކް މިނިސްޓަރެއްގެ ހައިސިއްޔަތުން ރައީސް ޑރ. މުޙައްމަދު މުޢިއްޒުގެ ދީނީ ސިޔާސަތުތައް ކުރިއެރުވުމަށް ޑރ. ޝަހީމް ކުރައްވަމުން ގެންދަވާ މަސައްކަތްތަކަށް ޕީއެންސީން ނުހަނު ފަހުރުވެރިވާކަން ފާހަގަކޮށް ނެރެފައިވާ ބަޔާނާ ގުޅިގެން ކުރެއްވި ޕޯސްޓުގައި ޑރ. ޝަހީމް ވަނީ ރައީސް ޑރ. މުޢިއްޒު އަބަދުވެސް ބަހައްޓަވާ ގާތް ކަމާއި ކުރައްވާ އިތުބާރަށް ޝުކުރު ދަންނަވައިފައެވެ. އަދި އަބަދުވެސް މަސައްކަތް ކުރައްވަނީ އަމާނާތްތެރިކަމާއެކު ރައީސްގެ އިރުޝާދުގެ ދަށުން ދީނާއި ގައުމާއި ރައްޔިތުންގެ މަސްލަހަތު ދަމަހައްޓަވަން ކަމަށް ވެސް މިނިސްޓަރު ވަނީ ވިދާޅުވެފައެވެ.
“އަޅުގަނޑު އަބަދުވެސް މަސައްކަތް ކުރަނީ އަމާނާތްތެރިކަމާއެކު ރައީސްގެ އިރުޝާދުގެ ދަށުން ދީނާއި ޤައުމާއި ރައްޔިތުންގެ މަސްލަހަތު ދަމަހައްޓަން.“
ޕީއެންސީން ރޭ ނެރުނު ބަޔާނުގައި ވަނީ ޝޯޝަލް މީޑިއާގެ އިތުރުން ބައެއް މީޑިއާތަކުގައި ޑރ. ޝަހީމާ ގުޅުވައިގެން ފަތުރާފައިވާ ވާހަކަތަކަކީ އެމަނިކުފާނުގެ އަބުރު ނަގާލުމުގެ ބޭނުމުގައި ފަތުރާ ހަގީގަތާ ޚިލާފު ވާހަކަތަކެއް ކަމަށް ބުނެފައެވެ.
