އިންޓެލެކްޗުއަލް ޕްރޮޕަޓީ (އައިޕީ) ގާނޫނުތައް އިސްލާހުކުރުމުގެ މަސައްކަތް ކުރިއަށްދާ ކަމަށާއި މި ގާނޫނުތަކުގެ ސަބަބުން ދިވެހި އުފެއްދުންތަކަށް ބޭރުގެ ބާޒާރުތަކުގައި އިތުރު ރައްކާތެރިކަމެއް ލިބިގެންދާނެ ކަމަށް އިގުތިސާދީތަރައްގީއާއި ވިޔަފާރިޔާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު ސަޢީދު ވަނީ އޯގާ ސްޓޫޑިއޯ އަށް ޒިޔާރަތްކުރައްވައި، އޯގާގެ އުފެއްދުންތައް ބައްލަވާލައްވައި, އޯގާ ސްޓޫޑިއޯގެ އިސްވެރިންނާ ބައްދަލުކުރައްވައި، އުފެއްދުންތެރިކަމުގެ ދާއިރާގައި ހުރި ގޮންޖެހުންތަކާއި ގުޅޭ ގޮތުން މަޝްވަރާކުރައްވާފައެވެ.
މި ބައްދަލުވުމުގައި އޯގާ ސްޓޫޑިއޯގެ އިސްވެރިޔާ އަޒޫ ވަނީ ވިޔަފާރިއަށް ދިމާވެފައިވާ ގޮންޖެހުންތަކާއި ދަތިތައް ވަޒީރާ ހިއްސާކުރައްވައިފައެވެ.
އެގޮތުން އުފެއްދުންތަކަށް ބޭނުންވާ ބައެއް ރޯ މެޓީރިއަލްސް ރާއްޖެއިން ނުލިބޭތީ، އެތަކެތި ބޭރުން އެތެރެކުރަންޖެހޭ ކަމަށާއި، އެކަމުގެ ސަބަބުން އުފެއްދުންތަކުގެ އަގު ބޮޑުވާކަން އޭނާ ފާހަގަކުރެއްވިއެވެ. އަދި ވިޔަފާރި ތަރައްގީކުރުމަށް ޖާގައިގެ ދަތިކަމާއި، އެހެނިހެން ގޮންޖެހުންތައް ވެސް ހުރިކަން އޭނާ ފާހަގަކުރެއްވިއެވެ.
މީގެއިތުރުން އޯގާ ސްޓޫޑިއޯގެ އުފެއްދުންތައް ގަތުމަށް ޝައުގުވެރިވާ ބޭރުގެ ފަރާތްތައް އެބަތިބިކަމާއި، ނަމަވެސް އެ ފަރާތްތަކަށް އެކަށީގެންވާ އަގެއްގައި އަދި ފަސޭހަކަމާއެކު ތަކެތި ޝިޕްކުރުމުގެ ދަތިތަކެއް ހުރިކަމަށާއި މި ކަންކަމަކީ އުފެއްދުންތައް ވިއްކުމުގައި ހުރި ދަތިތަކެއް ކަމުގައި ވެސް އަޒޫ ފާހަގަކުރެއްވިއެވެ.
އެ ވާހަކަތައް އަޑުއައްސަވައި ވަޒީރު ވިދާޅުވީ މި ދަތިތައް ހައްލުކުރުމަށްޓަކައި ކުދި ވިޔަފާރިތަކުން ތަކެތި އުފެއްދުމަށް އެތެރެކުރަންޖެހޭ ރޯމެޓީރިއަލްސްތަކުގެ ޑިއުޓީ ކުޑަކޮށްދެވޭނެ ގޮތްތައް ބައްލަވައި، ރައީސް ޑރ. މުޙައްމަދު މުޢިއްޒުގެ ލަފާފުޅާއެކު، އެކަމަށް މަސައްކަތްކުރައްވާނެ ކަމަށެވެ.
އޭގެ މަގުސަދަކީ ދިވެހި އުފެއްދުންތަކަށް ބޭރުގެ އުފެއްދުންތަކާ ވާދަކުރުމުގެ ގާބިލުކަން އިތުރުކޮށްދިނުން ކަމަށް ވަޒީރު ސަޢީދު ވިދާޅުވިއެވެ.
ކުރިއަށް އޮތްތަނުގައި މިނިވަން ވިޔަފާރީގެ އެއްބަސްވުންތައް ތަންފީޒުވެގެންދާއިރު, ދިވެހި އުފެއްދުންތައް ބޭރުގެ ބާޒާރުތަކުގައި ވިއްކުމަށް އިތުރު ފުރުސަތުތަކެއް ހުޅުވިގެންދާނެ ކަމަށް ވެސް ސަޢީދު ވިދާޅުވިއެވެ. އަދި ޚާއްސަކޮށް އަންނަ މަހު ތަންފީޒުކުރުމަށް ތައްޔާރުވަމުންދާ ޗައިނާ އެފްޓީއޭގެ ބޭނުން އެންމެ ފުރިހަމަ ގޮތުގައި ހިފުމަށް ކުރެވިދާނެ ކަންކަމާ ގުޅޭގޮތުން ވެސް މަޝްވަރާ ކުރެއްވިއެވެ.
މީގެއިތުރުން ސަޢީދު ވަނީ ދިވެހި އުފެއްދުންތައް ޕްރޮމޯޓްކުރުމަށް އިގުތިސާދީ ވުޒާރާއިން ޚާއްސަ ޕްރޮގްރާމްތަކެއް ރާވަމުންދާ ކަމަށާއި މިފަދަ ޕްރޮގްރާމްތަކުގެ ސަބަބުން ދިވެހި އުފެއްދުންތަކަށް އިތުރު ފުރުޞަތުތަކެއް ހުޅުވިގެންދާނެ ކަމަށް ސަޢީދު ވިދާޅުވިއެވެ.
ދިވެހި އުފެއްދުންތަކަށް ބައިނަލްއަގުވާމީ ފެންވަރުގެ ރައްކާތެރިކަން ހޯދައިދިނުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވަމުން ވަޒީރު އިތުރަށް ވިދާޅުވީ އައިޕީ ގާނޫނުތައް އިސްލާހު ކުރުމުގެ މަސައްކަތް ކުރިއަށްދާ ކަމަށެވެ.
މި ގާނޫނުތަކުގެ ސަބަބުން ދިވެހި އުފެއްދުންތަކަށް ބޭރުގެ ބާޒާރުތަކުގައި އިތުރު ރައްކާތެރިކަމެއް ލިބިގެންދާނެ ކަމަށް ވެސް ވަޒީރު ވިދާޅުވިއެވެ.
