މި މަހުގައި މައްކާގައި ބާއްވަން ހަމަޖެހިފައިވާ ކީރިތި ޤުރުއާން ކިޔެވުމުގެ މުބާރާތުގައި ރާއްޖެއިން ބައިވެރިވާ 2 ދަރިވަރުން ސައޫދީ ޢަރަބިއްޔާއަށް ދިއުމަށް ފުރައިފިއެވެ.
އެ ދެ ދަރިވަރުން ސައޫދީ ޢަރަބިއްޔާއަށް ދިއުމަށް ފުރީ އިއްޔެގެ ވަގުތެއްގައެވެ.
މައްކާގައި ބާއްވަން ހަމަޖެހިފައިވާ ކިންގް ޢަބްދުލްޢަޒީޒު އިންޓަރނޭޝަނަލް ކޮމްޕެޓިޝަން ފޮރ ދަ މެމޮރައިޒޭޝަން، ރެސައިޓޭޝަން އެންޑް އިންޓަރޕްރިޓޭޝަން އޮފް ދަ ހޮލީ ޤުރްއާން (44) ގައި ރާއްޖެއިން ބައިވެރިވާ 2 ދަރިވަރުންނަކީ ޝަޢަފް ޙާމިދު އިބްރާހިމް (މަލާޒް/ޅ.ނައިފަރު) އާއި އަރީކް މުޙައްމަދު ޙާމިދު (ކެކުރިގެ/އައްޑޫ ސިޓީ, ހިތަދޫ) އެވެ.
ޝަޢަފްއަކީ އަމީނިއްޔާ ސްކޫލުގެ ގްރޭޑް 8 ގައި ތައުލީމު ހާސިލުކުރަމުންދާ ދަރިވަރެކެވެ. އަރީކްއަކީ އައްޑޫ ސިޓީގެ ހިތަދޫގައި ހުންނަ ޙިރާ ސްކޫލުގެ ގްރޭޑް 9 ގައި ތައުލީމު ހާސިލުކުރަމުންދާ ދަރިވަރެކެވެ.
44 ވަނަ ސެޝަން އޮފް ކިންގް ޢަބްދުލްޢަޒީޒު އިންޓަރނޭޝަނަލް ކޮމްޕެޓިޝަން ފޮރ ދަ މެމޮރައިޒޭޝަން، ރިސައިޓޭޝަން އެންޑް އިންޓަރޕްރިޓޭޝަން އޮފް ދަ ހޯލީ ޤުރްއާން މުބާރާތް ކުރިއަށްދާާނީ މި މަހުގެ 9 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށެވެ.
