ދިވެހިންގެ ޢަޤީދާއަށް ނުފޫޒު ފޯރުވުމުގެ ޙައްޤެއް ބޭރުގެ ފަރާތްތަކަށް ނޯންނާނެ ކަމަށް އައްޝައިޚު ޢަބްދުﷲ ބިން މުޙައްމަދު އިބްރާހިމް ވިދާޅުވެއްޖެއެވެ.
އެހެން ދީނެއްގެ ފިކުރާއި ޝިޔާރު ފަތުރަން އުޅުނު ކަމަށް ކަނޑައަޅައި 2019 ވަނަ އަހަރު އުވައިލަން ނިންމި މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އަލުން ރުޖޫއަ ކުރުމަށް އދ. ގެ ހިއުމަން ރައިޓްސް ކޮމެޓީ (ސީސީޕީއާރު) އިން ވަނީ ގޮވާލައިފައެއެވެ. އެ ސެންޓަރުން އެގޮތަށް ގޮވައިލީ ބައިނަލްއަގުވާމީ މަދަނީ އަދި ސިޔާސީ ހައްގުތަކާ ބެހޭ މުއާހަދާ (އައިސީސީޕީއާރު) ގެ ދަށުން ރާއްޖެއިން ހުށަހެޅި ދެވަނަ ޕީރިއަޑިކް ރިޕޯޓު ދިރާސާ ކުރުމަށްފަހު ނެރުނު ރިވިއުގަ އެވެ. ރާއްޖެއަކީ އައިސީސީޕީއާރު ގެ މެންބަރު ގައުމެކެވެ.
މިކަމާ ގުޅިގެން މިދިޔަ ދައުރުގައި ހުންނެވި ޔޫތު މިނިސްޓަރު އަޙްމަދު މަޙްލޫފް ވިދާޅުވީ އެމްޑީއެން އުވާލާފައިވާނީ ޖަމުޢިއްޔާތަކާބެހޭ ގާނޫނުގައިވާ ހުރިހާ މަރުހަލާއެއް ފުރިހަމަކުރުމަށްފަހު ކަމަށެވެ. އަދި މިކަމާ ގުޅިގެން ބޭރުގެ އެކި ފަރާތްތަކުން އޭނާއަ ބައްދަލުކޮށް އަދި ފޯނުން ކުރި މަޝްވަރާތަކުގައިވެސް، އެމްޑީއެން އުވައިލީ ކަނޑައެޅިގެން ކީރިތި ރަސޫލާއަށް ފުރައްސާރަކޮށް އަދި އިސްލާމްދީނުގެ އަސްލުތަކާ ހިލާފު ވާހަކަތަކެއް ހުރުމުންކަމަށްވާނީ ދަންނަވާފައި ކަމަށެވެ.
އިސްލާމްދީނަށް ފުރައްސާރަނުކޮށް އަދި ޤާނޫނާއި ގަވައިދުގެތެރެއިން މިނިވަންކަމާއެކު ޖަމުޢިއްޔާތައް ހިންގުމުގެ މަގުވަނީ ފަހިވެފައި ކަމަށް ވެސް އޭނާ ވިދާޅުވިއެވެ.
މަހްލޫފުގެ ވާހަކައާ ގުޅިގެން ޖަމްއިއްޔަތުއްސަލަފުގެ ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ އެމްޑީއެންއިން ދިވެހިންގެ މުޖުތަމައު ގެއްލުވާލައި، ދީނަށް ފުރައްސާރަކޮށް، ބައިބައިވުން އުފައްދައި، ގައުމީ ސަލާމަތަށް ނުރައްކާވާ ފަދަ އަމަލުތައް ހިންގަމުންދާތީ ދިވެހިންގެ އިއްތިފާގުން އެމްޑީއެންގެ އެ އަމަލުތައް ކުށްވެރިކޮށްފައިވާ ކަމަށެވެ.
“އަޅުގަނޑުމެންގެ ޢަޤީދާއަށް ނުފޫޒު ފޯރުވުމުގެ ޙައްޤެއް އެމީހުންނަށް ނޯންނާނެ. އޭގެ ބަދަލުގައި ނިކަމެތި ފަލަސްތީނުގެ ހައްގުގައި ވަކާލާތު ކުރުމަށް ސަމާލުކަން ނުދެނީ ކީއްވެގެން ހެއްޔެވެ؟“
އެމްޑީއެން އުވާލީ އެ ޖަމިއްޔާ އިން އދ. އަށް ހުށަހެޅި ”ޕްރިލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސް“ ރިޕޯޓުގައި އިސްލާމް ދީނަށާއި ކީރިތި ރަސޫލާއަށް ފުރައްސާރަކޮށްފައިވާ މައްސަލައިގައެވެ.
ރިޕޯޓުގެ މައްސަލަ ފުލުހުން ތަހުގީގުކޮށް ހެދި އެސެސެމަންޓްގައި ޔޫތް މިނިސްޓްރީއަށް އަންގާފައިވަނީ އެމްޑީއެންގެ ރިޕޯޓުގައި ދީނަށާއި ރަސޫލާއަށް ފުރައްސާރަކޮށްފައިވާ ކަން ފާހަގަވެފައިވެއެވެ.
ފުލުހުންގެ ތަހުގީގަށް ބިނާކޮށް އެމްޑީއެން އުވާލުމަށް ކުރީގެ ޔޫތު މިނިސްޓްރީން ނިންމީ 5 ނޮވެމްބަރު 2019 ގައެވެ. ނަމަވެސް އެމްޑީއެން އުވާލިކަން ސަރުކާރުން ރަސްމީކޮށް އިއުލާންކުރީ 19 ޑިސެމްބަރު 2019 ގައެވެ.
އެމްޑީއެން އުވާލުމަށް ނިންމުމާ ގުޅިގެން އެ މައްސަލަ ސިވިލް ކޯޓަށް ހުށަހެޅީ އެ ޖަމިއްޔާގެ އެއް ފައުންޑަރު ޝަހިންދާ އިސްމާއިލެވެ.
މާޗު 2023 ސިިވިލް ކޯޓުން އިއްވި ހުކުމްގައި ބުނެފައިވަނީ އެމްޑީއެން އުވާލުމަށް ޖަމިއްޔާތަކާ ބެހޭ ރަޖިސްޓްރާ ނިންމާފައިވަނީ ޖަމިއްޔާތަކާ ބެހޭ ގާނޫނުގައި ބުނާ އިޖުރައާތު ފުރިހަމަކުރުމަށްފަހު ރަޖިސްޓްރާއަށް ލިބޭ ބާރުގެ ދަށުން ކަމަށެވެ. އެ ކޯޓުގެ ހުކުމުގައި ވެސް ވަނީ އެމްޑީއެންގެ ރިޕޯޓްގައި އިސްލާމްދީނާ ޚިލާފު ވާހަކަތަކެއް ހުރިކަން ފާހަގަކޮށްފައެވެ.
