ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާ ގޮތް އިސްލާހު ކުރުމަށްޓަކައި ގާނޫނުއަސާސީއަށާއި ގާނޫނަށް ގެންނަންޖެހޭ އިސްލާހުތައް އެކުލެވޭ ދެ ބިލު އެޓާނީ ޖެނެރަލްގެ އޮފީހުން މިއަދު ރައްޔިތުންގެ މަޖިލީހަށް ފޮނުވައިފިއެވެ.
މިކަން ހާމަކުރެެއްވީ އެޓާނީ ޖެނެރަލް އިބްރާހިމް ރިފްޢަތު ކުރެއްވި ޓުވީޓެއްގައެވެ.
ބިލުތަކުގައި ހިމަނާފައިވާ މައިގަނޑު އިސްލާހުތައް:
ޖޭއެސްސީގެ މެންބަރުންގެ އަދަދަކީ 7 ކަމުގައި ކަނޑައެޅުން.
އެއީ ރައީސުލްޖުމްހޫރިއްޔާގެ މެންބަރާއި ރައްޔިތުންގެ މަޖިލީހުގެ ރައީސާއި ސިވިލް ސަރވިސް ކޮމިޝަންގެ ރައީސާއި ޖޭއެސްސީގެ މެންބަރުންގެ ގޮތުގައި ނުހިމެނޭ ގޮތަށް.
މިގޮތަށް ހުށަހެޅީ ޝަރުއީ ދާއިރާގެ މައްޗަށް ދައުލަތުގެ އެހެން ބާރުތަކުން ނުފޫޒު ފޯރުވުން ހުއްޓުވުމަށާއި މިކަންކުރަން އެންމެ އެކަށޭނެ ގޮތެއް ހޯދުމަށް ޝަރުއީ ދާއިރާއާއި އެނޫން ވެސް ފަރާތްތަކާއި ގާނޫނީ ފަންނުގެ ދާއިރާއާއި މަދަނީ ޖަމްއިއްޔާތަކާއި އާންމުންގެ ޚިޔާލާއި މަަޝްވަރާގެ އަލީގައި ކަމަށް ރިފްޢަތު ވިދާޅުވިއެވެ.
ރިފްޢަތު ވިދާޅުވީ ޝަރުއީ ދާއިރާ އިސްލާހުކުރުމަކީ އިޖުތިމާއީ އަދުލުވެރިކަމުގެ ދާއިރާއިން އަދުގެ ސަރުކާރުން ވެފައިވާ އެންމެ މުހިންމު އެއް ވައުދު ކަމަށެވެ.
މި މަސައްކަތް 2019 ގައި ފަށާފައިވާކަން ފާހަގަކުރައްވައި ރިފްޢަތު ވިދާޅުވީ މިހާތަނަށް ކަމާގުޅޭ ނުވަ ބިލެއް މަޖިލީހަށް ހުށަހަޅާފައިވާއިރު މިއަދުގެ ދެ ބިލާއެކު މި އިސްލާހީ މަސައްކަތް ފުރިހަމަކުރެވިއްޖެ ކަމަށެވެ.
ޖޭއެސްސީ މިހާރު އެކުލެވިފައިވާ ގޮތް:
ރައްޔިތުންގެ މަޖިލީހުގެ ރައީސް.
ރައީސުލްޖުމްހޫރިއްޔާ އައްޔަންކުރައްވާ މެންބަރެއް.
އެޓާނީ ޖެނެރަލް.
މަޖިލީހުގެ މެންބަރުންގެތެރެއިން ކަނޑައަޅާ މެންބަރެއް.
އާންމުންގެތެރެއިން މަޖިލީހުން ކަނޑައަޅާ މެންބަރެއް.
ސިވިލް ސަރވިސް ކޮމިޝަންގެ ރައީސް.
ސްޕްރީމް ކޯޓުގެ ފަނޑިޔާރުންގެ ތެރެއިން އެ ކޯޓުން އިންތިޚާބުކުރާ ފަނޑިޔާރެއް (އުއްތަމަ ފަނޑިޔާރު ފިޔަވައި).
ހައިކޯޓުގެ ފަނޑިޔާރުންގެ ތެރެއިން އެ ކޯޓުން އިންތިޚާބުކުރާ ފަނޑިޔާރެއް.
ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން އިންތިޚާބުކުރާ ފަނޑިޔާރެއް.
ޖޭއެސްސީ އިސްލާހުކުރުމަކީ ރައީސް އިބްރާހިމް މުޙައްމަދު ޞާލިޙްގެ ރިޔާސީ ވައުދެކެވެ. ޖޭއެސްސީ އެކުލެވޭ ގޮތް ބަދަލުކުރުމަށް މީގެކުރިން ދެފަހަރެއްގެ މަތިން މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ވެސް މަޖިލީހަށް އިސްލާހު ހުށަހެޅުއްވިއެވެ. ނަމަވެސް އެމްޑީޕީގެ ސުޕަރމެޖޯރިޓީ އޮތް މަޖިލީހުން ވަނީ އެ އިސްލާހުތައް ފާސްނުކޮށް ބޭރުކޮށްލައިފައެވެ.
One Response
ކޮންމެގޮތަކަށް އިސްލާޙުކުރިޔަސް އަދީބު ކަހަލަ ޢަލިއްޕެކަހަލަ ވަޒީފާގެ ދަހިވެތިކަމުގެ މީހުން ލައްވާ އޭރަކު ހުންނަ ރައީސްއަކު ޝަރުޢީދާއިރާއަށް އަތާ ފައި ބާނަންޔާ މާތްﷲދެކެ ބިރުވެތި ނުވަންޏާއި ދެން ވާނެ ރަނގަޅު އެއްގޮތެއްވެސް ނޯންނާނެއެވެ. މައްސަލަޔަކީ ރާއިސް މީހާއެވެ. އޭނާ ޒީރޯ ޓޮލެރެންސް ގެ ކަންފުޅެއްވެސް ނެތީއެވެ.