ދުނިޔޭގެ އެންމެ މާތް ދުވަސްތަކަކީ ޙައްޖުމަހުގެ ފުރަތަމަ 10 ދުވަސްކަމަށްވާތީ އެ ދުވަސްތަކުގައި ފާފަތަކަށް އަރައިގަތުމުން ދުރުހެލިވުމަށާއި ހެޔޮ އަމަލުތައް ކުރުން ގިނަކުރުމަށް މިއަދުގެ ހުކުރު ޚުޠުބާގައި އިލްތިމާސް ކުރައްވައިފިއެވެ.

މިއަދުގެ ޚުޠުބާގައި މައިގަނޑު ގޮތެއްގައި އަލިއަޅުވައިލާފައިވަނީ ޙައްޖުމަހުގެ ފުރަތަމަ 10 ދުވަހުގެ މާތްކަމާއި އެ ދުވަސްތަކުގައި ކުރުން މޮޅު އިތުރުވެގެންވާ ހެޔޮ އަމަލުތަކާއި ނުބައި ކަންކަމުން ދުރުހެލިވުމުގެ މައްޗަށެވެ.

ޚުޠުބާގައި ފާހަގަކޮށްފައިވާ ގޮތުގައި މަތިވެރި އިލާހުގެ ހަޟްރަތުގައި އެންމެ ލޮބުވެތިވެގެންވާ މައްސަރުތަކަކީ ހުރުމަތްތެރިވެގެންވާ މައްސަރުތަކެވެ. އެއީ ރަޖަބު މަހާއި ޛުލްޤައިދާ މަހާއި ޛުލްޙިއްޖާ މަހާއި މުޙައްރަމް މަހެވެ. އޭގެތެރެއިން ވެސް އެންމެ މާތް މައްސަރަކީ ޙައްޖު މަސް ކަމަށާއި ޙައްޖުމަހުގެ ފުރަތަމަ 10 ދުވަހަކީ އެ މަހުގެ އެންމެ މާތް ދުވަސްތައްކަމަށް ޚުޠުބާގައި ބުނެފައިވެއެވެ.

ދުނިޔޭގެ އެންމެ މާތް ދުވަސްތަކަކީ ޙައްޖުމަހުގެ (ފުރަތަމަ) ދިހަ ދުވަހެވެ.“ ރަސޫލާ (ޞޢވ) މިފަދައިން ހަދީސް ކުރައްވާފައިވާ ކަމަށް ޚުޠުބާގައި ބަޔާންކޮށްފައިވެއެވެ.

ޚުޠުބާގައި ބުނެފައިވަނީ އިންސާނާގެ ކުރު ހަޔާތުގައި ހެޔޮކަމުގެ މާތް މޫސުންތައް ގިނަގުނަ ދަރުމަޔާއި ސަވާބު ލިބޭ ގޮތުން ތަކުރާރުވާ ގޮތެއްގައި ލައްވާފައިވުމީ އެކަލާނގެ އޯގާވަންތަކަމާއި ރަހުމަތްވަންތައް ކަމުގެ ބޮޑުކަން ހާމަވެގެންދާ ކަމެއް ކަމަށެވެ.

ޚުޠުބާގައި ފާހަގަކޮށްފައިވާ ގޮތުގައި:

ޙައްޖު މަހުގެ ފުރަތަމަ ދިހަ ދުވަހުގައި ކުރެވެން އޮތް އެންމެ ހެޔޮ އަމަލުތަކުގެ ތެރޭގައި ރޯދަހިފުން ހިމެނޭ.

ޚާއްސަކޮށް ޙައްޖުމަހުގެ ނުވަވަނަ ދުވަހު ރޯދައިގެ ދަރުމަޔާއި ސަވާބު މަތިވެރިވެގެންވޭ. އެ ދުވަހުގެ ރޯދައަކީ ވޭތުވެދިޔަ އަހަރާއި އަންނާން އޮތް އަހަރުގެ ފާފަތައް ފުއްސަވާނެ ރޯދައެއް ކަމުގައި ރަސޫލާ ހަދީސް ކުރައްވާފައިވޭ.

މީގެއިތުރުން މި ދުވަސްތަކުގެތެރޭގައި ކުރެވިދާނެ ހެޔޮ އަމަލުތަކުގެ ތެރޭގައި ތަކްބީރާއި ތަސްބީޙަ ކިޔައި މަތިވެރި ރައްބުގެ މަތިން ހަނދުމަކުރުން ހިމެނޭ.

ދުވަސްތަކުގެ ބޭނުން ހެޔޮ ގޮތުގައި ހިފުމަށް ގިނަގިނައިން ޞަދަޤާތް ކުރުމަކީ ވެސް މަތިވެރިވެގެންވާ އަޅުކަމެއް.

އުޟުހިޔާ ކަތިލުމަކީ މި ދުވަސްވަރު ކުރުމަށް ޝަރުޢުގައި ކަނޑައަޅުއްވާފައިވާ ކަމެއް. އެއީ ގަދަވެގެންވާ ސުންނަތެއް.
އުޟުހިޔާގެ ގޮތުގައި ކަތިލެވޭނީ ނަޢަމް ސޫފީގެ ބާވަތްތަކުގެތެރެއިން ބާވަތެއް. ޢީދު ނަމާދުގެ ފަހުން އައްޔާމުއްތަޝްރީޤުގެ ފަހު ދުވަހާ ހަމައަށް މިކަމުގެ ވަގުތު ތަނަވަސްވެގެންވޭ.

ދުވަސްތަކުގައި ކުރެވޭނެ އެންމެ ހެޔޮ އަމަލަކީ ޙައްޖުގެ އަޅުކަން އަދާކުރުން.

ޙައްޖުމަހުގެ މަތިވެރި ދުވަސްތަކުގެ ބޭނުން ހެޔޮ ގޮތުގައި ހިފުމަށްޓަކައި މިދުވަސްވަރުގައި ނުބައި ކަންކަމާ ދުރުހެލިވުމަކީ ވަރަށް މުހިންމު ކަމެއްކަމަށް ޚުޠުބާގައި ފާހަގަކޮށްފައިވެއެވެ.

ހެޔޮ ކަންކަމަކީ މީހާއަށް މަތިވެރި ރައްބުގެ ރަހުމަތާއި ނިއުމަތްތައް ލިބުމުގެ ސަބަބެއްކަމުގައި ދަންނަންޖެހޭ ކަމަށާއި ހަމައެފަދައިން ފާފަތަކަށް އަރައިގަތުމަކީ މަތިވެރި އިލާހުގެ ރަހުމަތުން ދުރުކުރެވި ނިއުމަތްތަކުން މަހުރޫމުވެދާނެ ސަބަބެއްކަން ދަންނަންޖެހޭ ކަމަށް ވެސް ޚުޠުބާގައި ބުނެފައިވެއެވެ.

އެހެންކަމުން ޙައްޖުމަހުގެ މަތިވެރި ދުވަސްތަކުގައި ފާފަތަކަށް އަރައިގަތުމާއި ނެތިމޮށުމާއި ދެބައޮޑުވުމާއި ދޮގުހެދުމާއި އަރައިރުންވުމާއި މަލާމަތްކުރުމާއި ފުރައްސާރަކުރުމާއި ބާތިލު ވާހަކަދެއްކުމާއި ފިތުނަ އުފައްދައި ފަސާދަކުރުންފަދަ އެންމެހައި ނުބައި ކަންކަމުން ދުރުހެލިވެ ތިބޭ ބަޔަކަށްވާށެވެ!“ ޚުޠުބާގައި އިލްތިމާސް ކޮށްފައިވެއެވެ.

މި އަހަރުގެ ޙައްޖުމަހުގެ ފުރަތަމަ ދުވަހަކީ މި ހިނގާ ޖޫން މަހުގެ 19 ވާ ހޯމަ ދުވަހެވެ. ޙައްޖުމަހުގެ ނުވަވަނަ ދުވަހަށް ވާނީ ޖޫން 27 ވާ އަންގާރަ ދުވަހެވެ.