ރާއްޖެއާއި ޗާގޯސްއާ ދެމެދު އިން ވަކިކުރުކުގެ މައްސަލަ ނިމުނު ގޮތުން, ރާއްޖޭގެ އިގުތިސާދީ ސަރައްހައްދުން ބައެއް ގެއްލިފައިވާ ކަމަށް ބުނެ އެކަމާ ދެކޮޅަށް އިދިކޮޅު ފަރާތްތަކުން ބާއްވާ ޖަލްސާގައި ހަމަނުޖެހުން ހިންގަން އުޅޭކަމުގެ މައުލޫމާތު ލިބިފައިވާކަމަށާ އެފަދަ އެއްވެސް ކަމެއް ނުކުރުމަށް ފުލުހުންގެ މުއައްސަސާއިން މިއަދު ބުނެފިއެވެ.
އިމުގެ މައްސަލާގައި މިރޭ 20:30 ގައި އާޓިފިޝަލް ބީޗު ސަރަހައްދުގައި ޖަލްސާއެއް ކުރިއަށްގެންދަން ނިންމާފައިވާއިރު, ފުލުހުން ވަނީ އެކަމާ ގުޅޭ ގޮތުން ބަޔާނެއް ނެރެފައެވެ.
އެ ބަޔާނުގައި ބުނެފައިވަނީ މިރޭ ކުރިއަށް ގެންދިއުމަށް ތައްޔާރުވަމުންދާ ހަރަކާތުގައި ބައިވެެރިވުމަށް އަތޮޅުތެރެއިން މީހުން އަންނަ ކަމާއި މި ހަރަކާތުގައި ބައިވެރިވާ ބައެއް ފަރާތްތަކުން ގާނޫނާ ޚިލާފު އަމަލުތައް ހިންގުމަށް ރާވަމުންދާ ކަމާއި އަދި ބައެއް ފަރާތްތަކުން ގާނޫނާ ޚިލާފު އަމަލުތައް ހިންގާނެކަމަށް ބުނަމުންދާ ކަމުގެ މައުލޫމާތު ލިބިފައިވާ ކަމަށެވެ. އެހެންކަމުން މި ހަރަކާތުގައި އާންމު ސުލްހައަށް ބުރުއަރާނެ އެއްވެސް ކަމެއް ނުކުރުމަށާއި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގައި ބުނާ ހަމަތަކުގެ މަތިން ކުރިއަށް ގެންދިއުމަށާއި ގާނޫނާ ޚިލާފު އެއްވެސް އަމަލެއް ނުހިންގުމަށް ފުލުހުންގެ މުއައްސަސާއިން ވަނީ އިލްތިމާސްކޮށްފައެވެ.
ގާނޫނާ އެއްގޮތަށް ސުލްހަވެރިކަމާއެކު ހިންގާ ހަރަކާތްތަކަށް ފޯރުކޮށްދޭންޖެހޭ ރައްކާތެރިކަމާއި އެފަދަ ހަރަކާތްތައް ހިންގާ ސަރަހައްދުތަކުގެ މަގުތަކާއި އެ ނޫން ވެސް ތަންތަނުގެ ސަލާމަތާއި ރައްކާތެރިކަން ބެލެހެއްޓުމުގެ އިންތިޒާމުތައް ހަމަޖެއްސުމަކީ އެ ޚިދުމަތުން ވަރަށް ބޮޑު އިސްކަމެއްދީގެން ކުރަމުން އަންނަ ކަމެއް ކަމަށް ވެސް ބަޔާނުގައި ބުނެފައިވެއެވެ.
ރާއްޖޭގެ ކަނޑު ވިއްކައިލި ކަމަށް ބުނެ އެކަމާ ދެކޮޅަށް އަޑުއުފުލުމަށް މިރޭ ޖަލްސާ ބާއްވަން ނިންމާފައިވަނީ ޕީޕީއެމް/ޕީއެންސީއާއި އެމްއެންޕީއާއި ރައީސް މުޙައްމަދު ނަޝީދުގެ ފެކްޝަނާއި ބައެއް ސިޔާސީ ބޭފުޅުން ގުޅިގެން އުފައްދާފައިވާ އިއްތިހާދަކުންނެވެ.
