ޖަލުގައި ހުންނެވި ކުރީގެ ރައީސް ޔާމީން ޢަބްދުލްޤައްޔޫމް މިނިވަން ކުރަން ގޮވައިލާ މުޅި ރާއްޖޭގައި އިހުތިޖާޖެއް ކުރިއަށް ގެންދަން އިދިކޮޅު ޕްރޮގްރެސިވް ކޮންގްރެސް ކޯލިޝަނުން ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އިދިކޮޅު ކޯލިޝަނުން ބުނީ އެ އިހުތިޖާޖު އޮންނާނީ އަންނަ ހުކުރު ދުވަހު 16:00 ގައި ކަމަށެވެ.
މާލޭގައިި މި އިހުތިޖާޖު ކުރިއަަަށް ގެންދާނީ ރަސްފަންނުގައެވެ. އިހުތިޖާޖު ކުރިއަށް ގެންދާއިރު އެ ސަރަހައްދުގައި މާހެފުމެއް ވެސް އޮންނާނެއެވެ.
މީގެ އިތުރުން އެ ގަޑީގައި ރާއްޖޭގެ ހުރިހާ ރަށެއްގައި ވެސް އިހުތިޖާޖު ކުރިއަށްދާނެކަމަށް އިދިކޮޅު ކޯލިޝަނުން ބުންޏެވެ.
މި އިހުތިޖާޖު ކުރުމުގެ މަގުސަދަކީ ރައީސް ޔާމީނުގެ މައްޗަށް އިިއްވި ނުހައްގު ޖަލު ހުކުމާއެކު ރޯދަމަހުގައި ވެސް އެމަނިކުފާނު ޖަލުގައި ބަހައްޓައިގެން އަނިޔާދެމުންދާނެތީ އެކަމާ ދެކޮޅަށް އަޑުއުފުލުން ކަމަށް އިދިކޮޅު ކޯލިޝަނުން ބުންޏެވެ.
ވ.އާރަށު މައްސަލައިގައި ރައީސް ޔާމީންގެ މައްޗަށް ދައުލަތުން އުފުލި ދެ ދައުވާ ސާބިތުވާކަމަށް ކަނޑައަޅައި އެމަނިކުފާނަށް 11 އަހަރުގެ ހުކުމެއް އިއްވީ ޑިސެމްބަރު 25 ގައެވެ.
އޭގެފަހުން އިދިކޮޅު ކޯލިޝަނުން އަންނަނީ ކޮންމެ ރެއަކު ވެސް އިހުތިޖާޖުތައް ކުރަމުންނެވެ. އަންނަ ރޯދަމަހު ވެސް އިހުތިޖާޖުތައް ކުރިއަށްދާނެ ކަމަށާއި ނަމަވެސް ރޯދަމަހަކީ އަޅުކަމުގެ މަހަކަށްވާތީ ފަހު ދިހައިގައި ހަރަކާތްތައް މަޑުޖައްސައިލާނެ ކަމަށް އިދިކޮޅު ކޯލިޝަނުން ވަނީ ބުނެފައެވެ.
