ސްޓެމްގެ މާއްދާތަކަށް ދަރިވަރުންގެ މެދުގައި ހޭލުންތެރިކަން އިތުރުކުރުމުގެ މަގުސަދުގައި އުރީދޫ މޯލްޑިވްސްއިން ކުރިއަށްގެންދިޔަ ސްޓެމް ފެއާގެ އެންމެ މޮޅު ސްކޫލުގެ މަގާމު އިސްކަންދަރު ސްކޫލުން ހޯދައިފި އެވެ.
ހަތް ސްކޫލަކުން ބައިވެރިވި އެ ފެއާގެ އެއް ވަނަ އިސްކަންދަރުން ހޯދައިފައިވަނީ ފެއާއަށް ކަނޑައެޅި ތިން އުމުރުފުރާ (ހަގު އުމުރުފުރާ، މެދު އުމުރުފުރާ އަދި ދޮށީ އުމުރުފުރާ) އިންވެސް ގިނަ ވަނަތަކެއް ހާސިލުކޮށްގެންނެވެ.
އެންމެ ހަގު އުމުރުފުރާއިންނާއި އެންމެ ދޮށީ އުމުރުފުރާއިން އެއް ވަނަ އެ ސްކޫލުން ހޯދިއިރު، އެންމެ ހަގު އުމުރުފުރާއިންނާއި މެދު އުމުރުފުރާ އަދި އެންމެ ދޮށީ އުމުރުފުރާއިން ވެސް ދެ ވަނަ ހޯދައިފައި ވަނީ އިސްކަންދަރު ސްކޫލުންނެވެ.
ސްޓެމް ފެއާގެ އެއްވަނައަށް އުރީދޫ މޯލްޑިވްސްއިން ވަނީ 50،000 ރުފިޔާގެ ފައިސާގެ އިނާމެއް ދީފައެވެ. .
އިސްކަންދަރު ސްކޫލުގެ އިތުރުން ދެން އެންމެ ގިނަ ވަނަ ހާސިލު ކޮށްފައި ވަނީ ގިޔާސުއްދީން ސްކޫލުންނެވެ.
އުރީދޫން ބުނި ގޮތުގައި، ސްޓެމް ދާއިރާތަކުން މާހިރުން ބިނާކުރުމަށް އަންނަން އޮތް ޖީލަށް ހިތްވަރު ދިނުމުގައި ކުރިއަށް އޮތްތަނުގައި އެ ކުންފުނިން މަސައްކަތްތައް ކުރާނެއެވެ.
