ދުނިޔޭގެ އެންމެ ބޮޑު ސީޕްލޭން އޮޕަރޭޓަރު، ޓްރާންސް މޯލްޑިވިއަން އެއާވޭސް (ޓީއެމްއޭ) ވިއްކާލަން އެ ކުންފުނީގެ ހިއްސާ އޮންނަ ކާލައިލް ގްރޫޕުން ވިސްނަމުންދާ ކަމަށް ވިޔަފާރި ހަބަރުތައް ގެނެސްދޭ ”ބްލޫމްބާގް“ ނޫހުން ރިޕޯޓުކޮށްފިއެވެ.

ބްލޫމްބާގެ ރިޕޯޓެއްގައި ވަނީ ކާލައިލް އާއި އެ ކުންފުންޏާ އެކު އިންވެސްޓްކޮށްފައިވާ ކިންގް ސްޓްރީޓް ކެޕިޓަލް މެނޭޖްމަންޓާއި ޑެވިޑްސަން ކެމްޕްނާ ކެޕިޓަލް މެނޭޖްމަންޓުން ޓީއެމްއޭ ވިއްކާލަން މަސައްކަތް ކުރަމުންދަނީ 500 މިލިއަން ޑޮލަރާ 700 މިލިއަން ޑޮލަރާ ދެމެދުގެ އަގެއްގައި ކަމަށެވެ.

އެ ރިޕޯޓުގައިވާ ގޮތުން ޓީއެމްއޭ ގަތުމަށް ބައެއް ފަރާތްތަކުން ވަނީ ޝައުގުވެރިކަން ފާޅުކޮށްފައެވެ. ނަމަވެސް ޓީއެމްއޭ ވިއްކާލުމާ މެދު މަޝްވަރާތައް އަދިވެސް ކުރިއަށްދާ ކަމަށް ބުނެފައިިވެއެވެ.

ކާލައިލް އަތް ދަށަށް ޓީއެމްއޭ ދިޔައީ، އެ ކުންފުނީގެ މެޖޯރިޓީ ހިއްސާ އޮތް ބެއިން ކެޕިޓަލްގެ ލޯނެއް ރީސްޓްރަކްޗާ ކުރުމުގެ ތެރެއިން މިދިޔަ އަހަރުގެ މެދުތެރޭގައެވެ.

ޓީއެމްއޭގެ 80 ޕަސެންޓް ހިއްސާ 2013 ވަނަ އަހަރުން ފެށިގެން އޮންނަނީ އެމެރިކާގެ ބްލެކް ސްޓޯން ގްރޫޕުގައެވެ. މައިނޯރިޓީ ހިއްސާ އޮންނަނީ ރާއްޖޭގެ މަޝްހޫރު ވިޔަފާރިވެރިޔާ ޗަމްޕާ ހުސެއިން އަފީފްގެ ކާސާ ހޮލްޑިންގްސްގައެވެ. ނަމަވެސް 2017 ވަނަ އަހަރުގެ ޑިސެމްބަރު މަހުގެ ތެރޭގައި ޓީއެމްއޭގައި އޮތް ބްލެކް ސްޓޯންގެ މެޖޯރިޓީ ހިއްސާ ބައިން ކެޕިޓަލް އާއި ޗައިނާގެ ޓެމްޕަސް ގުރޫޕް ގުޅިގެން ވަނީ ގަނެފައެވެ.

ރާއްޖޭގައި 1989 ވަނަ އަހަރު އޮޕަރޭޝަންތައް ފެށި ޓީއެމްއޭ (އޭރު ހަމިންބާޑް އައިލެންޑް ހެލިކޮޕްޓާސް)ގެ ފްލީޓުގައި 57 ސީޕްލޭން އޮވެއެވެ.