އިރުމަތީ ޕާކިސްތާނުގެ އަވަށެއްކަމަށްވާ ލާހޫރުގެ ބާޒާރަކަށް އަމާޒުކޮށް ދިން ބޮމުގެ ހަމަލާއެއްގައި 3 މީހުން މަރުވެ 28 މީހުންނަށް އެކިވަރުގެ ޒަހަމުތައް ވެފައިވާކަމަށް ޕާކިސްތާނުގެ ފުލުހުން ހާމަކޮށްފިއެވެ.
ބުރާސްފަތި ދުވަހު ފުލުހުންގެ ތަރުޖަމާނަކު ހާމަކޮށްފައިވާ ގޮތުގައި ބޮން ގޮވާފައިވަނީ ލާހޫރުގެ ގޭޓް ސަރަހައްދުގައެވެ. އެ ސަރަހައްދަކީ ހަނި ގޯޅިތަކެއް އޮންނަ ކުދި ފިހާރަތައް ގިނަ ސަރަހައްދެކެވެ.
މިހާދިސާގައި ތިން މީހުން މަރުވިކަން ވަނީ ޔަގީންވެފައެވެ. އަދި ޒަހަމްވެފައިވާ މީހުންގެ ތެރެއިން ހަތަރު މީހަކަށް އަންނަނީ އައިސީޔޫގައި ފަރުވާ ދެމުންނެވެ. ޚަބަރު ލިބިފައިވާ ގޮތުގައި ޒަހަމްވި ގިނަ މީހުންނަށް ހާނީއްކަ ވެފައި ވަނީ އުނަގަނޑުން ތިރީގެ އެކި ހިސާބުތަކަށެވެ.
މިބޮމަކީ ބަޔަކު ރާވައިގެން ކުރިން އެތާގައި ބާއްވާފައިވާ ބޮމެއްކަމަށް ޝައްކު ކުރެވޭ ކަމަށް ސީނިއަރ ޕޮލިސް އޮފިސަރް، ޢާބިދް ޚާން ވަނީ މީޑިއާއަށް މައުލޫމާތު ހިއްސާކުރަމުން ހާމަކޮށްފައެވެ. މިހާދިސާ އިތުރަށް ތަޙުޤީޤު ކުރަމުން ދާކަމަށް ފުލުހުން ވަނީ ހާމަކޮށްފައެވެ.
