ކޯރަކަށް ގަވާއިދާ ޚިލާފަށް އުކާލެވުނު ކެމިކަލް ތަކެއްގެ ސަބަބުން އުފެދުނު ވިހަ ގޭހެއްގެ އަސަރުކޮށްގެން ކައިރީގައި ހުރި ޕްރިންޓިނގް އަދި ޑައި ކުރުމުގެ މަސައްކަތް ކުރާ ކާރުޚާނާއެއްގައި މަސައްކަތް ކުރަމުންދިޔަ މީހުންގެ ތެރެއިން 6 މީހަކު މަރުވެ، 23 މީހުން ހޮސްޕިޓަލަށް ގެންގޮސް ފަރުވާދޭންފަށައިފިއެވެ.
މިހާދިސާ ހިނގާފައި ވަނީ ގުޖުރާތު ސްޓޭޓްގެ އިންޑަސްޓްރިއަލް ސިޓީއެއް ކަމަށްވާ ސޫރަތުގައެވެ. ކެމިކަލްތައް އުކާލި ވަގުތަކީ ކާރުޚާނާތަކުގައި މަސައްކަތް ކުރަމުން ދިޔަ ވަގުތެކެވެ.
ސޫރަތުގެ މުނިސިޕަލް ކޯޕަރޭޝަންގެ ޗީފް ފައަރ އޮފިސަރު، ބަސާންތު ޕަރީކް ހާމަކުރިގޮތުގައި ގިނަ އަދަދެއްގެ ކެމިކަލްތަކެއް ވަނީ ގަވާއިދާ ހިލާފަށް އެ ސަރަހައްދުގައި އޮތް ފެންގަނޑަކަށް އުކާލެވިފައެވެ. އަދި ލަފާކުރެވޭ ގޮތުގައި މި ކެމިކަލްތައްވަނީ އެ ފެންގަނޑުގައި ކުރިން ހުރި ކެމިކަލްތަކަކާ ރިއެކްޓްވެ ވިހަ ގޭސްތަކެއް އުފެދިގެން ގޮސްފައެވެ.
ޕަރީކް ބުނި ގޮތުގައި ކަމާ ބެހޭ ފަރާތްތަކަށް އެހިސާބަށް ދެވުނު އިރު ގިނަ އަދަދެއްގެ މަސައްކަތު މީހުންވަނީ ނޭވާލުމަށް އުނދަގޫވެގެން ހޭނެތިފައެވެ.
މިހާދިސާގައި ހަ މީހަކު މަރުވެ 23 މީހަކު ވަނީ ހޮސްޕިޓަލުގައި އެޑްމިޓްކުރެވިފައެވެ. މީގެތެރެއިން 7 މީހުންގެ ހާލު ވަރަށް ސީރިއަށް ކަމަށް މައުލޫމާތު ލިބެއެވެ.
މި ހާދިސާއާ ގުޅިގެން ކަމާ ބެހޭ ފަރާތްތަކުން އަދި އެއްވެސް މީހަކު ހައްޔަރު ކޮށްފައެއް ނުވެއެވެ.
