މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދާނެ ރަށެއް ނެތް މައްސަލައަށް ހައްލެއް ހޯދައި ދިނުމަށް ކ. ކުޑަގިރި ފަޅު ހިއްކައިގެން ހެދުމަށް ހަމަޖެހިފައިވާ ޕިކްނިކް އައިލެންޑް މާޗް މަހު ނިމޭނެ ކަމަށް ޕްލޭނިން މިނސްޓްރީން ބުނެފިއެވެ.
އެ މިނިސްޓްރީން ބުނީ ޕިކްނިކް އައިލެންޑްގައި މަސައްކަތް ހިނގާ ކަމަށާއި އަންނަ އަހަރުގެ މާޗް މަހު ނިމޭ ހިސާބު ރަށް ތަރައްގީކޮށް ނިމޭނެ ކަމަށެވެ.
ފަސް މަސް ދުވަހުގެ ތެރޭގައި މަސައްކަތް ނިންމާ ގޮތަށް މި މަޝްރޫއު އެމްޓީސީސީ އާއި ހަވާލުކުރީ 41.4 މިލިއަން ރުފިޔާއަށެވެ.
ޕިކްނިކް އައިލެންޑް ތަރައްގީކުރުމުގެ މަޝްރޫއުގެ ދަށުން ކުޑަގިރި ފަޅުގައި ދެ ރަށެއް ހިއްކާނެ އެވެ. އެއް ރަށް ހިއްކަނީ އަށް ހެކްޓަރަށެވެ. އަނެއް ރަށް ހިއްކަނީ ފިނޮޅެއް ގޮތަށް 1.5 ހެކްޓަރަށެވެ.
މި މަޝްރޫއުގެ ތެރޭގައި އެރަށުގައި 397.27 މީޓަރުގެ ބޮޑު ހިލައިގެ ބްރޭކްވޯޓާ އަކާއި، 428.32 މީޓަރުގެ ބޮޑު ހިލައިގެ ގްރޮއިންސް އަޅުން ވެސް ހިމެނެއެވެ.
މި ދެ ރަށުގައި ވެސް، ދަތުރުދާ މީހުންނަށް ހާއްސަކޮށްގެން ތަފާތު އެކި ވަސީލަތްތައް ގާއިމުކުރުމަށް ވަނީ ނިންމާފައެވެ. އޭގެ ތެރޭގައި ކޮޓަރިތަކާއި، ޕޫލް ސަރަހައްދަކާއި، ފުޓްސަލް ދަނޑު ފަދަ ތަންތަން ހިމެނެ އެވެ.
ކުޑަގިރި ފަޅުން ދެ ރަށް ހިއްކާނެ އެވެ. އެއީ އަށް ހެކްޓަރުގެ ޕިކްނިކް އައިލެންޑާއި ސޭންޑްބޭންކް ގޮތަށް ހަދާ 1.5 ހެކްޓަރުގެ ރަށެކެވެ.
