އުތުރުތިލަފަޅު ނުވަތަ ޔޫޓީއެފް އެއްބަސްވުން އޮތީ ރާއްޖޭގެ ގާނޫނުއަސާސީއާ ޚިލާފަށް ކަމަށާ އެ އެގްރިމެންޓް ހަދާފައިވަނީ ގައުމުގެ މިނިވަންކަމާ ސިޔާދަތު ގެއްލޭގޮތަށް ކަމަށް އިނދިކޮޅު ކޯލިޝަން ޕީޕީއެމް/ ޕީއެންސީން ބުނެފިއެވެ.

ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ވަނީ އުތުރުތިލަފަޅު އެއްބަސްވުން ދިރާސާކުރުމަށް އަސްކަރިއްޔާގެ އިސް ބޭފުޅުންނާ އެކު އިއްޔެ ބައްދަލުވުމެއް ބާއްވާފައެވެ. ސިއްރުން ބޭއްވި އެ ބައްދަލުވުމުގައި އެމްއެންޑީއެފުން ވަނީ އެއްބަސްވުމުގެ ކޮޕީއެއް ދައްކައިފައެވެ.

އެކަމާ ގުޅިގެން މިއަދު އިނދިކޮޅު ކޯލިޝަން ނެރުނު ބަޔާނެއްގައި ބުނެފައިވަނީ އުތުރުތިލަފަޅުގެ އެގްރީމަންޓް ކަމަށް ބުނާ ލިޔުމެއް ސްކްރީނަކުން ސަލާމަތީ ހިދުމަތްތަކާބެހޭ ކޮމިޓީއަށް ދައްކާލުމުގެ ބަދަލުގައި އެ އެގްރީމަންޓްގައި ހުރި މާއްދާތައް ވަކިވަކިން ދިރާސާކުރުމުގެ ފުރުސަތު ހޯދުމަކީ ކޮމިޓީއަށް ލާޒިމު ކަމެއްކަމަށެވެ.

އަދި އެ އެގްރީމަންޓް ސަލާމަތީ ހިދުމަތްތަކާބެހޭ ކޮމިޓީއަށް ނުދިނުމަކީ އަދި ކޮމިޓީން އެ އެގްރީމަންޓް ހޯދާފައި ނުވުމަކީ އުތުރުތިލަފަޅުގެ އެގްރީމަންޓާގުޅިގެން ދިވެހި ރައްޔިތުންގެ މެދުގައި އުފެދިފައިވާ ނުތަނަވަސްކަމަށް ފަރުވާއެއް ހޯދައިދިނުމުގައި ރައްޔިތުންގެ މަޖިލީހާއި ސަރުކާރު ފެއިލްވެފައިވާކަން ހާމަވާ ކަމެއްކަމަށްވެސް ބަޔާނުގައި ބުނެފައިވެއެވެ.

ބަޔާނުގައި އިތުރަށް ބުނެފައިވަނީ  ސަލާމަތީ ހިދުމަތްތަކާބެހޭ ކޮމިޓީއަށް ހުށަހެޅި ޕްރެޒެންޓޭޝަނުން އެނގުނީ އުތުރުތިލަފަޅުގައި އިންޑިއާއިން ބޭނުންވާ ކޮންމެ ދާއިރާއެއްގެ ބަޔަކަށް ޑިޕޮލޮމެޓިކް އިމިއުނިޓީ ދީގެން، ކުރިއަށްއޮތް ފަސް އަހަރަށްވުރެ ގިނަ ދުވަހަށް ތިބެވޭނެކަން ކަމަށެވެ. އަދި އިންޑިއާއިން ގެންނަ މީހުންގެ ތެރޭގައި އިންޑިއާ ސިފައިން ނުހިމެނޭކަމަށް ބުނެފައިނުވާއިރު، ހާއްސަކޮށް، ދިވެހި އަސްކަރިއްޔާގެ މަރުކަޒެއްގައި އިންޑިއާގެ ސިފައިންނަށް ތިބުމަށް މަގުފަހިވާ އެއްބަސްވުމެއް ހަދައި، ރައްޔިތުންގެ މަޖިލީހުގެ ރުހުން ހޯދުމެއްނެތި ސޮއިކުރުމަކީ ދިވެހިޖުމްހޫރިއްޔާގެ ގާނޫނުއަސާސީގެ 115 ވަނަ މާއްދާގެ (ފ) ގެ (2) އާ ޚިލާފު ކަމެއްކަމަށް ވެސް ބަޔާނުގައިވެއެވެ.

މީގެއިތުރުން، މިއެއްބަސްވުމާ ގުޅޭ ޕްރެޒެންޓޭޝަން ހުށަހަޅަމުން މި އެއްބަސް ވުމަކީ ޔާމިން ސަރުކާރުން ސޮއިކޮށްފައިވާ އެގްރީމަންޓެއްކަމަށް ދެއްކުމަށް އަސްކަރިއްޔާއިން ވަނީ ވަރަށް ބޮޑަށް މަސައްކަތް ކޮށްފައިކަމަށްވެސް ޕީޕީއެމުން ތުހުމަތުކުރެއެވެ.

އެކަމުން ދޭހަވަނީ ދިވެހި އަސްކަރިއްޔާގެ ތެރެއަށް ސިޔާސީ ނުފޫޒު އިންތިހާއަށް ފޯރުވަމުންދާކަންކަމަށާއި ދިވެހި އަސްކަރިއްޔާގެ ތެރެއަށް ސިޔާސީ ނުފޫޒު ވެއްދުމަކީ އިއާދަ ނުކުރެވޭފަދަ ގެއްލުން ގައުމަށް ލިބިދާނެ ކަމެއްކަމަށްވެސް ބަޔާނުގައިވެއެވެ.

އިނދިކޮޅުން ވަނީ އެ އެއްބަސްވުން އުވާލުމަށާއި ދިވެހިރާއްޖޭގައި ތިބި އިންޑިޔާ ސިފައިން ފޮނުވާލުމަށް ގޮވާލާފައެވެ.

އަދި ގާނޫނުއަސާސީއާ ހިލާފު އެއްބަސްވުމެއް ހަދައި، ރައްޔިތުންގެ މަޖިލީހަށާއި ރައްޔިތުންނަށް ނާންގައި، އެތައް ދުވަހެއްވަންދެން ސިއްރު ކުރުމަށްފަހު، އެކަން ދިފާއު ކުރުމަކީ ދިވެހި ގައުމަށް ހިޔާނާތްތެރިވެ، ޣައްދާރުވެފައިވާ ޚާއިނުންތަކެއްގެ ފިނޑިއަމަލެއްކަމަށާއި މިކަމުގައި ޝާމިލްވާ އެންމެން ވަގުތުން އިސްތިއުފާ ދިނުމަށް އެ ކޯލިޝަނުން ވަނީ ގޮވާލާފައެވެ.