ހުޅުމާލޭގައި ސަރުކާރުން އެޅި ފުރަތަމަ ޕްރީ ސްކޫލް ”މުހައްމަދު ގާސިމް ޕްރީ ސްކޫލް“ މިއަދު ރަސްމީކޮށް ހުޅުވައިފިއެވެ.
މި ޕްރީ ސްކޫލް ހުޅުވައިދެއްވީ މިއަދު ބޭއްވި ރަސްމިއްޔާތެއްގައި ނައިބު ރައީސް ފައިސަލް ނަސީމެވެ.
އޯޓިޒަމް ސެންޓަރު ކައިރީގައި ހަދާފައިވާ 10 ކްލާސްރޫމުގެ ޕްރީ ސްކޫލަކީ 750 ކުދިންގެ ޖާގައިގެ ސްކޫލެކެވެ. އެލްކޭޖީ އާއި ޔޫކޭޖީ އަށް ކިޔަވައިދޭ މި ސްކޫލަށް ވަންނަން ބޭނުންވާ ދަރިވަރުންނަށް އެ ފުރުސަތު ހުޅުވާލީ މިމަހުގެ 11 ވަނަ ދުވަހު އެވެ. މިހާތަނަށް 22 ކުއްޖަކު ވަނީ ރަޖިސްޓްރީ ކޮށްފައެވެ.
ހުޅުމާލޭގައި ހަދާފައިވާ ޕްރީ ސްކޫލު ހިންގަން އެޗްޑީސީން، އެޑިޔުކޭޝަން މިނިސްޓްރީއާ އެތަން ހަވާލުކުރީ ޖެނުއަރީ 17، 2019 ގައެވެ.
އެޑިއުކޭޝަން މިނިސްޓްރީން ބުނީ މި ސްކޫލަށް ވައްދާ ދަރިވަރުންގެ ޔުނިފޯމްގެ ގޮތުގައި، މިހާރު ދަރިވަރު ކިޔަވަމުންދާ ސްކޫލްގެ ޔުނިފޯމް މިއަހަރުގެ ޑިސެމްބަރުމަހުގެ ނިޔަލަށް ބޭނުންކުރެވޭނެ އިންތިޒާމް ހަމަޖައްސާފައިވާކަމަށެވެ. އަދި ބެލެނިވެރިން ބޭނުންނަމަ، ސްކޫލް ފެށޭއިރު މި ސްކޫލަށް ހާއްސަ ޔުނީފޯމްވެސް ބޭނުންކުރެވޭނެކަމަށްވެސް އެޑިއުކޭޝަނުން ބުނެއެވެވެ
މި ސްކޫލް ހިންގާބެ ބަޔަކު ހޯދަން ހަތަރުފަހަރެއްގެ މަތިން އިއުލާން ކުރުމަށްފަހު އެންމެ ފަހުން އެޑިއުކޭޝަން މިނިސްޓްރީން ނިންމީ އެ މިނިސްޓްރީގެ ދަށުން ސްކޫލް ހިންގުމަށެވެ.
ހުޅުމާލޭގެ ޕްރީ ސްކޫލު ހިންގަން އެންމެ ފަހުން ކުރި އިއުލާނާ ގުޅިގެން ހަތަރު ފަރާތަކުން ޝައުގުވެރިކަން ފާޅުކުރި އެވެ. އެއީ ކޮލިޓޭޓް އެޑިއުކޭޝަނާއި، އައިލެންޑާސް އެޑިއުކޭޝަނާއި އިރުސިޔާދު އިންޓަނޭޝަނަލްގެ އިތުރުން އިލްމު އެޑިއުކޭޝަނެވެ.
ރާއްޖޭގައި ކޮވިޑުގެ ހާލަތު ގޯސްވި ދުވަސްވަރު މިތަން ފްލޫ ކްލިނިކެއް ގޮތުގައިވެސް ވަނީ ބޭނުންކޮށްފައެވެ.
މި ޕްރީ ސްކޫލް ހުޅުވުމަށް ބޭއްވި ރަސްމިއްޔާތުގައި އެޑިއުކޭޝަން މިނިސްޓަރު ޑރ. އައިޝަތު އަލީ، އެޗްޑީސީގެ އެމްޑީ އަހްމަދު ސުހައިލާއި ސްކޫލުގެ އިސްވެރިންނާއި މުވައްޒަފުންނާއި ބެލެނިވެރިން ވެސް ބައިވެރިވެފައިވެ އެވެ.
